Hebreea 13
13
Mɛɛ vana looku Hala hɛnan yɛ
1La hiow laci a kaolianndo vellaa-velle maa n'puapilɛ. 2La pɔɛɛnun le mialla biyɔɔ le, kani o mialla biyɔɔ vanaa pum a yiya mɛlɛkaa ni, a ve sina le. 3La yiyan vanaa co o kaasolan-nda coo maa niaa ndaa co o kaasoo ni, mì la yiyan vanaa nda co saangiaa-a coo maa mɛɛ nda va niaa bɛɛ saangiaa yɛ.
4Vannda kpede bɛnda mà ke nɔu bɛɛlen, mì vanaa co o nɔ̀u nin-nda, vana-vana lo o lediom coo a vanndo pilɔɔ vellaa-velle. Kani Hala kialunin yamɛi vanaa laasiannda a vanaa suundaa.
5La káolà volion mò hiow ɲɛ-ɲɛ fee le, kɛ la hinì kɔl a ɲɛm niaa nɔ-on. Kani Hala pila dimi aa: «I kɛɛnin nɔm te, i melnin nɔm te.» 6Lelan n tiwba mì n dimi a laalanndo aa:
«Mɛlɛka co vana co ya malaa-o ni,
siòòŋii co ya a ɲɛ-ɲɛ le.
Yɛɛ vanndacieea nɔla yɛ ya yɔŋ?»
7La loonun ndɔ a simlacia niaa paandua, a tiiyal niaa sɔɛi Hala-e-a pɛɛn. Mì la dɔw mɛɛlula ndalan taasi, mì la tuula laalan ndaa. 8Mɛɛ Yeesu Krista va cɛi yɛ, lende koni o co hau ni, lende vɛlɛ koni o vanin le fɛɛn a fɛɛn ni. 9La del pɛɛkula súú-súù ka kɔɔli le. Kani o naŋ mì kɔllo sɔla kpaayaa o kɛndɛi Hala-e nin, kɛ o va a tɔŋnda ɲɛdiaa le. La mala vanaa bii lan-nda le lan.
10Fonda-loamaa-lasálà naa n nɔ-o, vanaa-solia-lasálà co vallo o cɛi-kola-toandaa diandaa nin-nda bɛnda mà de ɲɛ solin sálà lecoo-o le. 11Kani kooma cɔlua nda soli sálàá le hakio-a bolle vanaa-solia-lasálàá co cua ni, mò luɛi a man o fonda diandaa-diandaa le sálà malaa lahakio solio. Kɛ mà kɔ lom cɔlua kalaa kpow o dɔ́ɔ́ngɔ́ɔ̀ kɔɔli. 12Lelan Yeesu bɛɛ sanga o kobio kɔɔli ni, mó dindi vannda a kooma ndɔma ndu pila-an. 13Mɛɛ n kɔnnun o ndu lo o dɔ́ɔ́ngɔ́ɔ̀ kɔɔli, mì n cɛlnun sɔɔlɛmaa maa ndu. 14Kani n nɔ calta fɛɛn-fɛɛn o ceendo coo nanu le, ciee bɛndu co naa laci-o naa n co nuwviaa ni. 15N solulun Hala sálàlan o ndu sangalaa nin, condon ndu solullo o diola Yeesulan pɛɛn. 16La pɔɛɛnun kɛndɛi tosaa a maalianndo vellaa-velle le, kani sálàla vaa lende la hɛnan Hala ni.
17La bii diomnda simlacia niaa mì la tuisin nda o labɛngunin. Kani a nɔ niaa hɔlten coo le kona nda hun dɔawnunnin o Hala lo-o. Lelan te la tuei nda pɛ diom, a tosa baala ndaa a ɲaaloo, o ve a cɛɛŋɔn te, la sɔla mala oo mala o ken nin te.
18La piɛi Hala le naa. N laalan maa n dendu kɔltan, nduyɛ yeemɛi co naa mì n kela kela kɛndɔɔ o dɛnndan kpow nin. 19Kɛ taama-taama, la piɛi Hala le ya mì yala niaa muungu tɛɛn.
Hala piɛiyo
20Hala yɔngù naa kɔlɲuloo ni. Mó mingi Maalii Yeesu, vana mandaa n'saa bɛndoo, yoomu fulaa vanvílɛ́iya tɛɛn. Mí kooma sálà ndɔɔ ma siŋnun sabuo le kpema fɛɛn-fɛɛndo. 21Màá Hala kon ke niaa kpaayaa le dɛnnda kɛndɛla súú-súù ka tosaa, mì la nɔla hɛnan ndɔɔ tosaa. Màá o mala naa o diola Yeesu Krista lan mì n tosà hɛnan ndɔɔ. Màá biiloo va le ndu Yeesu Krista le fɛɛn a fɛɛn! Amiina!
Sɔɔn mɛɛlan a yilɔɔlan
22Puapilɛa nia, i co niaa tɛɛlɔn mì la yaŋ nilan ɲɛkɛndɛi o sɔɔn ya sɛval niaa mun le niaa yoomuan lueiyo-on. O co bɛɛ sɔɔn bɔɔ le ya sɛval niaa le. 23La sínà maa Timote puapilɛ naa sɔla malɔɔ. Te o yala pɛ tiiya nanu, n kɔanin niaa yilɔɔ naa ndu.
24La yil simlacia niaa a vanaa laalaŋaa tɔ̀a kpow. Vanaa laalannda Itali yil niaa.
25Màá dɛnɛ kɛndɛ Hala-o va niaa coo kpede!
Currently Selected:
Hebreea 13: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
