Hebreea 10
10
Sálà kpeekpeiyo
1Vundule ɲɛm kɛndɛn co laci-on daama tɔŋndo co ni. O yeema mi sálàla pilɛlan la va solinndo vɔsi oo vɔsi, pɛngi ve le. Lelan o tiwba mì vanaa co sɔɔnguuo Hala ikɛi o nɛi kon coo-a a peelun te. 2Te vanaa co kaannde vaa lende len tosaa-a ndáà sɔlà pɛ dindin kpeekpeiyo le hakila ndalan kpede, ndáà nɔ lɛnin buulan maa hakila ndalan la co vɔ nda kɔɔli le, o kon ndáà pɛngi sálàlan solio. 3Kɛ o co lende le, sálàla lan kpeekpei la mingi nda yiyando vɔsi oo vɔsi o hakila ndalan coo ni. 4Kani kooma navaa tovaa a ma cuinaa toovia ma nɔla hakilan faŋaa le.
5Lelan telen Krista va luɛyɔɔ o ceendo nin-ndo, mó dimul Hala aa:
«A yeema lasálà le, a yeema ɲɛm-kéa le,
kɛ má toosiaa ya kɔɔlen.
6A yeema sálàla loamaa lan te,
a yeema sálàla malaa lahakilan te.
7O kon mí dimi aa:
‹Ya pila co hunɔɔ o nɔm ndo ni,
mì tosa hɛnan nɔmndo,
maa mɛɛ o co o sɛvaa a ya o kɔɔ o sɛbɛ diandaa nin yɛ.›»
8Mí Krista dimi fɔlɔn aa:
«A yeema lasálà le, a yeema ɲɛm-kéa le,
a yeema cɔlua nda loam o fonda-loamaa-lasálàá coo-a le,
a yeema sálàla malaa lahakilan te,
la hɛnan nɔm te.» 9O kon mó dimi vɛlɛ aa: «Ya pila i co hunɔɔ le hɛnan nɔmndo tosaa.» Mó faŋa sálàla paandulan, mó mingi la ndɔlan. 10Yeesu Krista tosa hɛnan Hala-o, mí ndu pila yɔngun lepilɛ kpé, ken tosa ni mí n sɔla baŋaa a hakio.
11Vana-solia-lasálà kɛ́-kɛ̀ bɛnda mò sim lepalaa-lepala le vali Hala-o tosaa. Sálàla pilɛlan tuŋ o soli ni, kɛ la tiwba hakilan faŋaa le. 12Kɛ Krista ndu sálàá ndu pilɛ kpé o soli le hakilan ni, mó cal Hala o ba kɛndɔɔ coo le fɛɛn a fɛɛn. 13Lon o co lo cumndo ni, mì Hala kɛsi yaamɔaa ndaa ndu o pelon bɛngu. 14O yɔngɔn ndɔ kon nin, mí vanaa o dindi a hakio-a peelun le fɛɛn a fɛɛn.
15Ken Hala Kɔl-Diandaa bɛɛ dimi ni aa:
16«Mɛlɛka dimi aa kpema ya yiinin a nda
o palɛi ken kɔɔli-o co hoo ni:
I vownin tɔŋnda nilan nda nin,
mì sɛva nda lan o lakɔl.»
17O kon kɔɔli, mó dimi vɛlɛ aa: «I loonun ndɛnin a tɛɛmbuula ndalan a á hakila ndalan te.» 18Nduyɛ te hakilan la cuunin pɛ malɔɔ, mɛɛ vana soli lɛ sálà le lan te.
N sɔɔngun Hala ikɛi
19Le kooma fula Yeesu-an puapilɛa nia, n laalan lekɛ́ndɛi maa n tiw nin ba mì n luɛi o fonda diandaa-diandaa. 20O kumbil naa nɛi sɛnɛiyo, o kiyɛiyo, keiyo o kola landaa, dialun ndɔn pɛɛn. 21N nɔ bolle vanaa-solia-lasálàá naa laci o Cɛi-Hala-o nin. 22Lelan n sɔɔngun Hala ikɛi a laalan naa kpow a á kɔltan diandaa lan, mì pilun dialun naan a mɛmma diandan. 23N simnun yili o ɲɛ naa n laalan-ndo coo, kani Hala faŋàn o diomnde o dimi len coo le. 24N nɔnnan hɔlten kɔɔli vellaa-velle, haliko mi n lueinan yoomuan le kaolaa cɔmanndo a le dɛnnda kɛndɛlan tosaa. 25N málnùn cuungiannda naalan mɛɛ vannda pum tosa yɛ le. Kɛ n hiownun laci a siilianndo vellaa-velle mɛɛ niaa co cɔu paale Maalii len sɔɔnguuo yɛ.
26Kani te n va pɛ hiovɔɔ laci a nila kalulan tosaa o hakilan nin, nduyɛ n sina nin toɲaa, mɛɛ sálà faŋa hakila vaa lende-o co le, 27fɔ calle cumndo a siòònde, le yamɛi Hala kilulnin vana kon-nde a yinnde bɛndule loamnin vanaa nila kalua len. 28Vana-vana tɛɛmbuu pɛ tɔŋ Moise-o mì vanaa ŋiɔn te kon te a yaa tɛnda seilen maa lende i co ni, o bɛnda mò sɔla piɔ́mndo, a tuinun vana kon iɲíí le. 29Vɛ̀ɛ̀ kpeekpei ɲɔɔ va yɛnin niko le vana pɛɛsa sɔɛi Po Hala-o-a? Vana cì kooma Yeesu baŋa ndu a hakio-an ɲɛ-ɲɛ loo pɛɛn? Hala Kɔl-Diandaa cɔm naa kɛndɛi Hala-e-o o pilan tana lende ni. 30N sínà maa vana dimio aa: «Ya bɛnda le màá mingi o ni. I salanin vana-vana mɛɛ o bɛnda yɛ». Ndu koni dimi vɛlɛ ni aa: «Mɛlɛka kialunin vanaa ndɔa iyama.» 31Dɛnɛ dɔaw vana siòònnde tawvo o co ni, le vanacieo delɔɔ Hala nɔ yoomoo o ba-o o ba.
32La yiyan-ndɔ, telen niaa sɔla sɛnɛi ɲɛ-tengaa Hala-o-o, mí la sɔla sangaa taw, kɛ mí la biwnun, mí la sim yili. 33A yeow vanaa pum niaa tɛɛn, má saangiaa nda vannda o hɔl kpendekele, kɛ nduyɛ vanaa pum a va vanaa nda saangiaa kan-nda malaa. 34Mí mɔnɛi bii niaa niaa vanaa kaasoa latulu, mí la cɛl a ɲaaloo le niaa ɲɛm nian poondiaa o laba, kani la sínà maa la nɔ ɲɛm hiow naŋɔɔ-on, n co le fɛɛn a fɛɛn-ndon. 35Lelan, la màl laalanndo le, la sɔlanin sala bɛndoo le ndu. 36La hiow laci a biuvɔnndo le hɛnan Hala-o tosaa, mì la sɔla ɲɛm o dimi-on. 37Kani nanu a telen bingi, o le cobe,
mì vana bɛnda le hunɔɔ-o hin,
o tamalanin bɛɛ le.
38Mí Hala dimi aa:
«Vana sandaa vana laalan ya-o co ni,
duyɛ vana sandaa vanin yoomu le laalan ndɔɔ.
Kɛ te o muungu pɛ a makɔɔ,
kɔl nuu downun ndɛ ɲaale a ndu le.»
39Naa, n co vanaa muungu a makɔɔ le lou o ɲánndávàà le naa n co le, kɛ vanaa laalan Hala le cindaa sɔlaa-a.
Currently Selected:
Hebreea 10: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
