Popular Bible Verses from Hebreea 11

Share

Laalanndo co sinaa ni maa ɲɛm vana kɛsi kɔllo coo-on toɲaa lekɛ́ndɛi n co ni, nduyɛ maa vana co mun sɔla. Seile ɲɛm vana co cɔ a lehɔl te-on o co ni. Le laalanndo vannda sɔla seile kɛndɛlen sindɛ ni.

Nduyɛ, te o co a laalanndo le, vana-vana nɔla Hala hɛnan te. Kani, vana va pɛ Hala sɔɔnguuo ikɛi, fɔ mò laalan maa Hala co, maa o salanin vanaa co ndu nuwviaa-a.

N laalàn Hala, lelan naa n bii bila ni maa a Sɔɛi Hala cɔw ceendo ni. O kon mí ɲɛm vana ca-on toosian a kpaaya ɲɛm vana ci le-on.

A laalanndo Abraham cɛl veelu Hala-o ni, mó kɔa o lɛŋnde Hala yiilu ndu kpemaa le ndu len keo kɛ́ɔ len nin, ndóò sínà vɔ bɛɛ lon te, mó kɔa. A laalanndo, mó kɔ cal o sumialle o lɛŋnde Hala ndóò dimul ndu le ndu keo len nin. Mó kɔ cal lon o cɛila-kolala-toandaalan nin nda Isaak a Yakɔb. Nda bɛɛ, kpema pilɛ kon ndóò yiinun le nda.

Le laalan Noe ndóò nɔ-o, mí Hala cɔm ndu dɛnnda vanaa ci vɔ le lan. Mí Noe luɛi sɔɛi Hala-e yii, mó toosiaa dɛ̀ndɛ̀ mamɛn bɛndoo le yungu ndɔɔ ciindiaa. Le hee, mí Noe cɔm maa dɛnnda vanndacieea o ceendo coo la niŋ te. O kon mí Hala ca ndu vana sandaa le laalan ndɔɔ.

A laalanndo, mí Enɔk hel o halataala, o ci piɔ́mndo le. Vana ci lɛ ndu le, mí Hala heelun ndu ikɛi. Sɛbɛ Hala-o dimi maa lɔ́ɔ́ pá mó hel, Enɔk ndóò hɛnan Hala.

Mí Abɛl solul Hala sálà hiow naŋɔɔ a laalanndo, mó hiaw sálà Kaɛn-ndo naŋɔɔ. Le laalan ndɔɔ, mí Hala ca ndu vana sandaa, mó hini kɔl a ɲɛm o solul ndu sálàá-on. Abɛl co bɛɛ o vílɛ́iyo, kɛ nduyɛ le laalan ndɔɔ, o co vɔ sɔɛi.

Le laalan Abraham ndóò laalan Hala-o o sɔla kpaayaa le hɔ́ɔ́ violɔɔ ni. O va nin bɛɛ o yuuvɛiyo taw-taw. Sara laa ndɔ ve vɛlɛ vana vialaa le, kɛ ndóò laalan maa vana lo o lediom coo-o Hala co ni.

Kani Abraham va cumndo le kɔlan o kobi nda caa kila ɲɛkɛndɛi-yo nin, o Hala pila tuu mó tangul-lo.

Moise ndóò laalan Hala, lelan telen o sul-lo, mó kɛɛ le vannda ndu veeloo aa po masaa Esipte-o. Mó hɛli le sangaa sɔlaa nda vanaa Hala-a latulu, hiovɔɔ kɔlkɛndɛ yɔŋ vɔɔndo coo, o co le telen bingi-o pɛɛn. Mó ca maa sangaa sɔlaa le Krista co fisa a bolofaa Esipte. Kani vɔ̀ngɔ́ va ndu laci-o caando va cɔu ni. A laalanndo, mí Moise faŋan Esipte, siòòŋii bii ndu le kɔl tambɛi masaa le. Mó sim yili, vanáà ca ko aa Hala vana ci loo o va cɔu ni.

A laalanndo Abraham cɛ̀l sindɛ le Isaak sálàá solio ni, telen Hala tɔɔndan ndu-o. Mó cɛl le po ndɔ pilɔɔ sálàá solio, nduyɛ a ndu Hala yiilu Abraham kpemaa ni.

A laalanndo, Rahab cua suundaa sɔla piɔ́mndo latulu nda vanaa simul Hala-a le, kani mó yiya suansuaŋaa Israɛlla ɲɛkɛndɛi.

A laalanndo Israɛlla taŋ mɛmma ihɛlma makpɛ̀ndɛ̀an o lɛŋnde vesɛilen nin ni, kɛ Esiptea tɔɔndanndo le tolɔɔ, má miisuu o mɛnndan nin.

Israɛlla ndáà laalan Hala. O kon ndáà balɔɔ Yeriko palɛi ndii ŋɔmmɛw, mí kpaki kobio komba.

A laalanndo, mó tosa kafo-hiavaa-coo, mó dimul vannda le koovan suiyo o kèéden lacɛiyon coo. O kon mɛlɛkanɔ piɔ́mndo dii poaa tasea Israɛlla le.

A laalanndo Yosɛf soo a fula Israɛlla o lɛŋnde Esipte len nin o kɔɔ telen o va le vuo-o ni, mó cɔm nda mɛɛ ndáà bɛnda le tosaa a dialun ndɔn yɛ.

A laalanndo Yakɔb dɔw poaa Yosɛf-a a pilɛn-pilɛnnda duaa ni lɔ́ɔ́ pá mó vu ni, mó tiindan o tindà ndɔɔ coo, mó biilu Hala.

A laalanndo Isaak dɔw Yakɔb nda Esau duaa le siɔdii ndaa ni.