Hechos 11

Pedropa nepɨrɨda ijãapataarã Jerusalende pꞌanadapꞌedaarãmaa

1Cristopa jɨrɨtꞌeradaarã mãikꞌaapa apemaarã ijãapataarã Judea eujãde pꞌanɨɨrãpa ũrijida judio–eerãpa Tachi Akꞌõrepa jara pëida ũridapꞌeda, ichiaba Cristode ijãadapꞌedaa. 2Mapa Pedro waya chekꞌãri Jerusalendee, ũkꞌuru judiorã Cristode ijãa pꞌanadapꞌedaarã kꞌĩrau pꞌanajida irua ooda kꞌaurepa judio–eerã tꞌãide. 3Iidijida:

—¿Sãapꞌeda judio–eerã akꞌɨnajima? ajida. ¿Sãapꞌeda ãra ome nekꞌojima? ajida.

4Mãpai Pedropa nepɨrɨmaa beeji jõmaweda Tachi Akꞌõrepa ichimaa kꞌawapida:

5—Mɨ bajida aji, Jope pꞌuurude. Ɨtꞌaa tꞌɨ̃maa bɨde kꞌãimokꞌaraa pɨkꞌa bɨde unuji lienzokꞌa bɨ ɨtꞌariipa mɨmaa che wã. Ma kꞌɨ̃ chaa jɨ̃ beeji. 6Pi–ia akꞌɨji kꞌawaaitꞌee kꞌãata edajãde paraaji. Unuji ne–animalaarã kꞌĩra tꞌãdoo, bɨɨrɨpa nĩuteepata, kꞌachia beepata, bipa nĩuteepata mãikꞌaapa wãabaipata. 7Maapꞌeda pedee ũriji: “Pedro, pꞌirabáiji. Peepꞌeda, kꞌóji.” 8Mãpai mɨa pꞌanauji: “Waide jãgee ne–animalaarã pɨa kꞌoikꞌaraa bɨda adadepema kꞌokꞌaada” aji.

9ʼMãpai ɨtꞌariipa waya pedeeji: “Akꞌõrepa kꞌoipia papida kꞌoikꞌaraa bɨda anáaji.” 10Jarada õpee mãga jaraji. Maapꞌeda ma lienzokꞌa bɨ waya ɨtꞌaa jidiu ataji. 11Aramata eperãarã õpee pëidapꞌedaa Cesareadeepa mɨ jɨrɨ chejida mɨ te badamãi. 12Tachi Akꞌõre Jaurepa mɨmaa jaraji wãmerã ãra ome, kꞌĩsia–ee. Na kꞌõpꞌãyoorã seis wãjida ichiaba mɨ ome. Jõmaweda tꞌĩujida ma eperã ichi mimiapataarã pëi bada temãi. 13Ma eperãpa taimaa nepɨrɨji ichia ángel unuda mãikꞌaapa ma angelpa jarada: “Eperã pëipáde aji, Jope pꞌuurudee eperã tꞌɨ̃jarapata Simón Pedro atanadamerã. 14Irua jarayada aji, sãga Akꞌõrepa pɨ o kꞌachiadeepa kꞌaripa atai pɨchi te pidaarã ome.”

15ʼMɨ pachepꞌeda, pedeemaa beekꞌãri, Akꞌõre Jaure ãramaa cheji, naaweda tachi judiorãmaa chedakꞌa. 16Mãga pakꞌãri, mɨa kꞌirãpaji Tachi Waibɨapa jarada: “Wãara Juan Bautistapa poro choopachi paniapa. Mamĩda Tachi Akꞌõrepa ichi Jaure ba chepiitꞌee parã kꞌapꞌɨade.” 17Mãgá mɨa kꞌawaaji Tachi Akꞌõrepa ichi Jaure ba chepi kꞌinia bɨ ãra ome tachi ome ba chepidakꞌa, aukꞌa ijãapata perã Tachi Waibɨa Jesucristode. Mãga bɨta ¿sãga mɨa Tachi Akꞌõrepa ooda kꞌachia bɨda ayama? aji.

18Jerusalendepema ijãapataarãpa mãga ũridakꞌãri, kꞌĩupꞌee para beeji. Maapꞌeda ɨtꞌaa tꞌɨ̃jida Tachi Akꞌõremaa. Mãgajida:

—¡Mãgara Tachi Akꞌõrepa ichi Jaure judio–eerã kꞌapꞌɨade ichiaba ba chepiitꞌee, kꞌachia oodaamaa pꞌaneedakꞌãri mãikꞌaapa Jesucristode ijãadakꞌãri! ¡Mãgá ichita iru ome chokꞌai pꞌanapataadaitꞌee!

Ijãapataarã Antioquía pꞌuurude chipꞌepatapꞌedaa

19Esteban piuda tꞌẽepai, Jesucristode ijãapataarã jɨrɨmaa pꞌanadakꞌãri peedaitꞌee, ũkꞌuru mirukꞌoodachida Fenicia eujãdee, Chipre isladee mãikꞌaapa Antioquía pꞌuurudee. Ãchi wãdapꞌedaa chaa Cristopa ooda eperãarã kꞌaripaitꞌee jarateepachida judiorãmaa aupai. 20Mamĩda Cristode ijãapataarãpa Chipredepemaarã mãikꞌaapa Cirene pꞌuurudepemaarã chedapꞌeda Antioquía pꞌuurude, Jesupa ooda eperãarã kꞌaripaitꞌee jarateepachida judio–eerãmaa. 21Tachi Akꞌõrepa ãra kꞌaripaji. Mapa judio–eerã chokꞌara Jesucristode ijãa pꞌaneejida.

22Ijãapataarã Jerusalendepemaarãpa mãga ũridakꞌãri, Bernabé pëijida Antioquiadee. 23Panakꞌãri, Bernabepa unuji Tachi Akꞌõrepa ãra kꞌaripada. Mapa o–ĩadachi. Ũraaji tꞌãripa Cristode ijãadamerã mãikꞌaapa irua oopi bɨkꞌa oodamerã. 24Bernabé eperã tꞌãri pia bapachi. Cristode pia ijãapachi mãikꞌaapa oopachi Tachi Akꞌõre Jaurepa oopi bɨkꞌa. Maperã eperãarã chokꞌara Cristode ijãajida iru kꞌaurepa.

25Ma tꞌẽepai Bernabé wãji Tarso pꞌuurudee Saulo jɨrɨde. 26Unu atakꞌãri, ateeji Antioquiadee. Mama pꞌaneejida año aba ijãapataarã ome jarateemaa Cristopa ooda eperãarã kꞌaripaitꞌee. Eperãarã chokꞌaraarãpa ãchia jarateeda ũripachida. Antioquía pꞌuurude naapɨara Cristode ijãapataarã tꞌɨ̃ bɨjida Cristodeerã.#11.26 Cristodeerã jara kꞌinia bɨ Cristode ijãapata mãikꞌaapa oopata iru ũraade jara bɨkꞌa.

27Maapai Akꞌõre pedee jarapataarã ũkꞌuru wãjida Jerusalendeepa Antioquiadee. 28Mama pꞌanɨde mãɨrãdepema aba tꞌɨ̃jarapatapꞌedaa Agabo, ijãapataarã kꞌĩrapite bainɨ̃ beepꞌeda, Tachi Akꞌõre Jaurepa jarapiji jarra oodaitꞌee jõmaweda Roma jua ekꞌari pꞌanɨɨrã eujãde. Wãara, aɨ tꞌẽepai mãgɨpa jaradakꞌa pꞌasaji César Claudio Romadepema reyrã poro waibɨa bakꞌãri. 29Antioquiadepema Cristode ijãapataarãpa mãga ũridakꞌãri, pedeeteejida Judeadepema ijãapataarã kꞌaripadaitꞌee, ãchia pꞌaratꞌa teedai pitapai. 30Mãgɨ́ pꞌaratꞌa pꞌedapꞌeda, Judeadepema ijãapataarã akꞌɨpataarãmaa tee pëijida Bernabé ome mãikꞌaapa Saulo ome.

Currently Selected:

Hechos 11: sjaB

Highlight

Copy