Hechos 10

Corneliopa Pedro tꞌɨ̃ pëida

1Pedro Jope pꞌuurude bɨ misa, Cesarea pꞌuurude baji eperã tꞌɨ̃jarapatapꞌedaa Cornelio. Mãgɨ́ Romadepema soldaorã batallondepema poro paji. Ma batallón tꞌɨ̃jarapachida Italiadepema. 2Mãgɨ́ eperã tꞌãri pia bapachi. Ichi tedepemaarã ome Tachi Akꞌõrede ijãapachida. Ichiaba pꞌaratꞌa teepachi judiorã kꞌaripaitꞌee mãikꞌaapa Tachi Akꞌõremaa ɨtꞌaa tꞌɨ̃pachi.

3Ewari aba a las tres, kꞌãimokꞌaraa pɨkꞌa bɨde taawapemakꞌa unuji ɨtꞌaripema ángel ichimãi tꞌĩuru mãikꞌaapa jararu:

—¡Cornelio!

4Corneliopa waaweede mãgɨ́ ángel kꞌĩra akꞌɨ nɨ̃beepꞌeda, iidiji:

—¿Kꞌãata kꞌinia bɨma? aji.

Pꞌanauji:

—Tachi Akꞌõrepa ũrijida aji, pɨa ɨtꞌaa iidida mãikꞌaapa unu bɨ pɨa pꞌaratꞌa teepari chupɨria beerãmaa. Pɨa pia oo bɨ iru kꞌĩrapite. 5Eperã pë́iji Jope pꞌuurudee aneemerã Simón Pedro apata. 6Irua pɨmaa Akꞌõre netꞌaa jarateeitꞌee. Awaraa Simón, ne–e pꞌoopari tede bɨ. Mãgɨ́ pꞌusa ide baparida aji.

7Ma ángel ichi ome pedeemaa bada wãkꞌãri, Corneliopa tꞌɨ̃ pëiji ichi mimiapataarã omé mãikꞌaapa Romadepema soldao aba Akꞌõrede ijãa bada. 8Ichia kꞌãimokꞌaraa pɨkꞌa bɨde unuda nepɨrɨpꞌeda, ãchi pëiji Jopedee.

9Aɨ norema imatꞌɨpa ãchi Jope pꞌuuru kꞌaitꞌa wãrutade, Pedro wãji terrazade ɨtꞌaa tꞌɨ̃de. 10Mama bɨde jarrapisia nɨ̃beeji. Nejoomaa pꞌanɨ misa, ichia kꞌãimokꞌaraa pɨkꞌa bɨde 11unuji pajã ewadaru. Madeepa ɨtꞌariipa che wãji lienzokꞌa bɨ. Ma kꞌɨ̃ chaa jɨ̃ beeji. 12Mãgɨ́ pꞌarude ne–animalaarã kꞌĩra tꞌãdoo pꞌanajida: bɨɨrɨpa nĩuteepata, bipa nĩuteepata mãikꞌaapa wãabaipata. 13Pedropa mãga akꞌɨ bɨde pedee ũriji:

—Pedro, pꞌirabáiji. Péeji mãikꞌaapa kꞌopáde aji.

14Pedropa pꞌanauji:

—Tachi Waibɨa, kꞌo–eda aji, mɨchi tꞌoru weda waide kꞌokꞌaa perã jãgee ne–animalaarã, pɨa kꞌoikꞌaraa bɨda ada.

15Waya pedee ũriji:

—Akꞌõrepa kꞌoipia papida kꞌoikꞌaraa bɨda anaapáde aji.

16Jarada õpee mãga jarapꞌeda, mãgɨ́ lienzokꞌa bɨ waya ɨtꞌaa wãji. 17Pedropa kꞌĩsia beeji kꞌãata jara kꞌinia baji ichia unuda mãgɨ́ kꞌãimokꞌaraa pɨkꞌa badade. Mãga nɨde Simón te iidi wãdapa Cornelio mimiapataarã pachejida te tꞌĩupata tꞌaide. 18Arii panadakꞌãri, iidijida:

—¿Nama bɨkꞌã ajida, eperã tꞌɨ̃jarapata Simón Pedro?

19Atꞌãri Pedro kꞌĩsiamaa bɨde ichi kꞌãimokꞌaraa pɨkꞌa badade, Akꞌõre Jaurepa mãgaji irumaa:

—Eperã õpeerãpa pɨ jɨrɨ nidada aji. 20Pꞌirabáiji mãikꞌaapa ɨrabáiji. Wã́ji ãra ome kꞌĩsia–ee, mɨata ãra pëida perã.

21Pedro ɨrabaipꞌeda, mãgaji ma eperãarãmaa:

—Mɨda aji, parãpa jɨrɨ pꞌanɨ. ¿Kꞌãata oo che pꞌanɨma? aji.

22Pꞌanaujida:

—Tai chejida Cornelio, Romadepema soldaorã poropa pëida perã. Iru Tachi Akꞌõrede ijãapari mãikꞌaapa tꞌãri pia bapari. Mapa jõmaweda Cesareadepema judiorãpa iru kꞌinia iru pꞌanapata. Ɨtꞌaripema angelpa jaraji irumaa tai pëimerã pɨ atade, pɨ iru temaa wãmerã jarateede.

23Mãpai Pedropa teeda tꞌĩupipꞌeda, nekꞌopiji mãikꞌaapa pꞌaru teeji kꞌãidamerã. Aɨ norema, Pedro wãji ãchi ome. Jopedepema ijãapataarã ũkꞌuruurãpa iru kꞌõpꞌãyanajida.

24Aɨ norema panajida Cesareade, Corneliopa nɨmaa badamãi, ichi te pidaarã ome mãikꞌaapa ichia tꞌɨ̃ pëida kꞌõpꞌãyoorã kꞌiniarã ome. 25Pedro aɨ temaa panakꞌãri, Cornelio taawaa cheji mãikꞌaapa Pedro kꞌĩrapite bedabaidachi, irumaa ɨtꞌaa tꞌɨ̃itꞌee. 26Mamĩda Pedropa pꞌirabaipiji, mãikꞌaapa mãgaji:

—Mɨ jida pɨkꞌa, eperã jĩpꞌaada aji.

27Maapꞌeda pedee wãdapa teeda tꞌĩujida eperãarã see nɨ̃badamãi. 28Mãpai Pedropa mãgaji:

—Parãpa kꞌawa pꞌanɨda aji, tai judiorã tꞌĩudaikꞌaraa bɨ judio–eerã tede mãikꞌaapa kꞌõpꞌãyo meraadaikꞌaraa bɨ parã ome. Mamĩda Tachi Akꞌõrepa mɨmaa kꞌawapijida aji, jõmaarã ome kꞌõpꞌãyo meraaipia bɨ. 29Maperã jararutata mɨ cheji, kꞌĩsia–ee. Ɨ̃rá kꞌawa kꞌinia bɨda aji, ¿kꞌãare–itꞌeeta mɨ tꞌɨ̃ pëiji?

30Corneliopa pꞌanauji:

—Kꞌãima kꞌĩmari paruda aji, na horakꞌa kꞌewara, mɨ ɨtꞌaa tꞌɨ̃maa bɨ misa, eperã pꞌaru uchiterree jɨ̃ bɨ mɨ kꞌĩrapite bainɨ̃ ba cheji. 31Jaraji ma eperãpa: “Cornelio, Akꞌõrepa ũrijida aji, pɨa ɨtꞌaa iidida mãikꞌaapa unu bɨda aji, pɨa pꞌaratꞌa teepari chupɨria beerãmaa. Pɨa pia oo bɨ iru kꞌĩrapite. 32Eperã pëipáde aji, Jope pꞌuurudee eperã tꞌɨ̃jarapata Simón Pedro atade. Iru baparida aji, awaraa Simón ne–e pꞌoopari tede pꞌusa ide.” 33Maperã mɨa isapai pëiji pɨ jɨrɨde mãikꞌaapa pɨ tꞌãri pia bairã, cheji. Ɨ̃rá nama jõmaweda pꞌanɨ misa Akꞌõre kꞌĩrapite, taipa ũri kꞌinia pꞌanɨda aji, jõma Tachi Akꞌõrepa pɨmaa jarapiru.

Pedropa Cornelio tede jarada

34Mãpai Pedro pedeemaa beeji:

—Ɨ̃rá wãara mɨa kꞌawaaruda aji, Tachi Akꞌõrepa mɨ aukꞌaarã apemaarã kꞌãyaara pipɨara akꞌɨ–e bɨ. 35Awaraa eujãdepemaarã jida kꞌinia iru bapari ichide ijãadakꞌãri mãikꞌaapa ne–inaa pia oodakꞌãri. 36Tachi Akꞌõrepa kꞌawapiji Israeldeepa uchiadapꞌedaarãmaa ichia ãchi kꞌãiwee pꞌanapiitꞌee Jesucristo kꞌaurepa, iru jõmaarã Waibɨa perã. 37Parãpa pia kꞌawa pꞌanɨ Tachi Akꞌõrepa ooda Galilea eujãde mãikꞌaapa Judea eujãde, Juanpa poro chooipia bɨda a nipada tꞌẽepai. 38Ichiaba kꞌawa pꞌanɨ Tachi Akꞌõrepa Jesús Nazaretdepema pëida ichia oopi bɨkꞌa oomerã, ichi Jaurepa kꞌaripapꞌeda. Mãgɨ́ Jesupa ne–inaa eperãarãpa pꞌoyaa oodakꞌaa ãchi juadoopa oo nipaji mãikꞌaapa jɨpapachi eperãarã netuara merãtɨa beerã. Mãga oopachi Tachi Akꞌõre iru ome bada perã. 39Tai iru ome nipapatapꞌedaarãpa unujida jõmaweda irua ooda Judea eujãde mãikꞌaapa Jerusalén pꞌuurude. Ichiaba pꞌanajida iru kurusode peedakꞌãri. 40Mamĩda Tachi Akꞌõrepa iru chokꞌai pꞌirabai ataji kꞌãima õpeemaa, maapꞌeda taimaa unupiji. 41Judiorã jõmaarãmaa unupi–e paji. Jĩpꞌa taimaapaita unupiji, Tachi Akꞌõrepa aɨ naaweda tai jɨrɨtꞌerada perã iru unudamerã. Chokꞌai pꞌirabaida tꞌẽepai iru tai ome nekꞌoji akꞌɨpiitꞌee wãara chokꞌai bɨ. 42Aɨ tꞌẽepai irua tai pëiji judiorãmaa jaranadamerã taipa unudapꞌedaa mãikꞌaapa jarateenadamerã iruta Tachi Akꞌõrepa bɨda jõmaarã Waibɨa. Akꞌõre ewari waibɨa ewate chokꞌai pꞌanɨɨrãpa oopata mãikꞌaapa piudapꞌedaarãpa oopatapꞌedaa akꞌɨitꞌee. 43Jõmaweda Akꞌõre pedee jarapataarãpa irua ooitꞌee bada kꞌawa pꞌanajida mãikꞌaapa jarapachida Tachi Akꞌõrepa iru kꞌaurepa wẽpapipariitꞌee irude ijãarutaarãpa pꞌekꞌau kꞌachia oopata.

Tachi Akꞌõre Jaure judio–eerãmaa cheda

44Atꞌãri Pedro pedeemaa bɨde, Akꞌõre Jaure cheji chi ũrimaa pꞌanadapꞌedaarãmaa. 45Judiorã ijãapataarã Pedro ome chedapꞌedaarã akꞌɨtrua para beeji, Tachi Akꞌõrepa ichi Jaure ba chepida perã judio–eerã kꞌapꞌɨade. 46Ũripachida pedee para bɨ ãchia kꞌawada–e pꞌanɨ pedeede mãikꞌaapa Akꞌõremaa ɨtꞌaa iidi para bɨ. 47Mãpai Pedropa mãgaji:

—Tachi Akꞌõrepa na eperãarãmaa ichi Jaure pëiru taimaa pëidakꞌa. Mãga bɨta, ¿kꞌaipa poro choonaapáde adayama? aji.

48Mãpai Pedropa jaraji Jesucristo tꞌɨ̃de poro choopidamerã. Maapꞌeda Corneliopa chupɨria iidiji Pedromaa ãchi ome taarã beemerã.

Currently Selected:

Hechos 10: sjaB

Highlight

Copy