Hechos 12

Santiago peedapꞌedaa mãikꞌaapa Pedro carcelde tꞌɨ nɨ̃bɨdapꞌedaa

1Bernabé Saulo ome Antioquía pꞌuurude atꞌãri pꞌanɨ misa, Rey Herodepa#12.1 Na Herodes tꞌɨ̃jarapachida Agripa I. Cristode ijãapataarã ũkꞌuru jɨrɨmaa beeji miapiitꞌee. 2Jaraji Juan ɨ̃pema, Santiago espadapa peetꞌaadamerã. 3Herodepa kꞌawaakꞌãri judiorã o–ĩa pꞌanɨ ichia oo bɨ unudapꞌeda, ichiaba Pedro jita atapiji. Mãga ooji judiorãpa fiesta pan levadura wẽe kꞌopata oo pꞌanɨde. 4Pedro jita atadapꞌeda, Herodepa carcelde tꞌɨ nɨ̃bɨpiji. Mama Romadepema soldaorã dieciséis pꞌepachida kꞌĩmarikꞌĩmarii carcel jɨ̃adamerã. Herodepa kꞌĩsia iru baji Pedro ɨmɨateeitꞌee eperãarã taide Pascua fiesta tꞌẽepai. 5Mãgá Pedro baji carcelde jɨ̃apari paraa. Mamĩda awaraa Cristode ijãapataarãpa ewari chaa ɨtꞌaa tꞌɨ̃pachida iru pari.

Tachi Akꞌõrepa Pedro uchiapida carceldeepa

6Herodepa Pedro ɨmɨateeitꞌee pada ewate aɨ noreweda pꞌãrikꞌua, Pedro jua cadenapa soldao jua kꞌĩraichaa jɨ̃pꞌeda, kꞌãi baji ãchi esajĩakꞌa. Mãɨmisa apemaarã soldaorã taawa jɨ̃amaa pꞌanapachida chi tꞌĩupatamãi. 7Mãga nɨde Pedromãi ɨ̃daadachi mãikꞌaapa ɨtꞌaripema ángel bainɨ̃ ba cheji. Mãgɨpa Pedro orromãi tꞌõbaiji mãikꞌaapa mãgaji:

—¡Isapai pꞌirabáiji!

Mãga jararuta, cadena baaikꞌoodachida Pedro juadeepa. 8Mãpai ma angelpa mãgaji:

—Pꞌaru jɨ̃ beepꞌeda, pɨchi chancla jɨ̃ béeji.

Mãga ooji Pedropa. Maapꞌeda mãgaji angelpa:

—Pɨchi ɨ̃rɨpema pꞌaru jɨ̃ beepꞌeda, mɨ ome chéji.

9Pedro uchiaji iru tꞌẽe, kꞌawa–ee wãara wa seewa angelpa oo bɨ. Ichi kꞌĩsia–itꞌee kꞌãimokꞌaraa pɨkꞌa baji. 10Mamĩda wãyaajida chi jɨ̃apari naapema, maapꞌeda araarepema ichiaba. Carcel puerta hierrodee ooda badamãi pachedakꞌãri calle jãdee uchiadaitꞌee, ma puerta ichi itu ewadachi. Uchiadapꞌeda, calle jãde wãjida mãikꞌaapa ma angelpa ituaba atabëiji.

11Mãpai Pedropa kꞌawaaji kꞌãimokꞌaraa–e bɨ. Mapa mãgaji:

—Ɨ̃rá mɨa kꞌawa bɨda aji, wãara Tachi Akꞌõrepa ichi ángel pëiji mɨ kꞌaripaitꞌee Herodes juadeepa mãikꞌaapa judiorã poroorã kꞌachia oodaitꞌee padadeepa.

12Mãga kꞌawaakꞌãri, Pedro wãji María temaa. Mãgɨ́ Juan nawe paji. Ma Juan ichiaba tꞌɨ̃jarapachida Marcos. Arii ijãapataarã chokꞌara ɨtꞌaa tꞌɨ̃maa pꞌanajida Pedro pari. 13Ma te tꞌĩupata taawaikꞌa eereepa Pedropa tꞌɨ̃ji. Mãpai te akꞌɨpari awẽra Rode apatapꞌedaapa akꞌɨ cheji kꞌawaaitꞌee kꞌaita mãga ni. 14Pedro otau kꞌawaakꞌãri, o–ĩadachi. O–ĩapa puerta ewa–ee, edaa pꞌiradachi jarade Pedro taawa bɨ. 15Mãga ũridakꞌãri, mãgajida:

—¿Kꞌĩra kꞌawa–ee nɨ̃bɨkꞌã? ajida.

Mamĩda ichia wãarada akꞌãri, ãchia mãgapachida:

—Iru–epɨ, Tachi Akꞌõre angelpɨ; iru ome nipaparida ajida.

16Mãɨmisa Pedropa taawaikꞌa eereepa tꞌɨ̃maa bapachi. Mãpai puerta ewadapꞌeda, unudakꞌãri, pꞌeradachida. 17Mamĩda ichi juapa jaraji kꞌĩupꞌee pꞌaneedamerã mãikꞌaapa nepɨrɨji sãga Tachi Akꞌõrepa ichi carceldeepa uchia atada. Maapꞌeda mãgaji:

—Nepɨrɨde wã́tɨ Santiagomaa mãikꞌaapa apemaarã Cristode ijãapataarãmaa.

Tꞌẽepai Pedro wãji awara ãyaa.

18Ewarikꞌãri, carcelde kꞌĩraupikꞌa para beeji, kꞌawada–e pada perã sãmaa wãji Pedro. 19Herodepa kꞌawaa atakꞌãri, jaraji jɨrɨnadamerã. Mamĩda pꞌoyaa unuda–e pada perã, chi soldaorã jɨ̃a pꞌanadapꞌedaarãmaa iidipꞌeda, jita pꞌe atapiji mãikꞌaapa peepikꞌooji. Ma tꞌẽepai Herodes uchiaji Judeadeepa mãikꞌaapa Cesarea pꞌuurude banaji.

Herodes piuda

20Maapai Herodes kꞌĩrau baji Tiro pꞌuurudepemaarã ome mãikꞌaapa Sidón pꞌuurudepemaarã ome. Mapa ãchi wãjida iru ome pedeede. Mamĩda panadakꞌãri, pꞌaajida Herodes mimiapataarã poro aba, Blastomaa, irua naapɨara chupɨria iidinamerã ãchi pari, chõoda–e paitꞌee. Mãga oojida ãchia ne–inaa kꞌodaitꞌee netonapachida perã Herodes jua ekꞌari pꞌanadapꞌedaarã eujãde. 21Ma eperãpa iidinakꞌãri, Herodepa jaraji ichia jararu ewate chedamerã. Ma ewate pakꞌãri, ichi pꞌaru pia jɨ̃ beepꞌeda, rey su–akꞌɨ beeparide su–akꞌɨ banaji mãikꞌaapa pedeemaa beeji. 22Ichi pedeemaa ũridakꞌãri, eperãarã biukꞌa nɨ̃beeji mãikꞌaapa mãgapachida:

—Nãgɨ́ eperã nama pedeemaa bɨ eperã–eda ajida. Akꞌõre waibɨ́akꞌata bɨda apachida.

23Aramata, angelpa Herodes kꞌayaapitꞌaaji, irua ɨtrɨa–e pada perã mãga jaradakꞌãri. Mapa mokꞌitꞌa kꞌida pꞌuapa piuji.

24Maapai ijãapataarã chokꞌaraara ĩwa wãpachida. Tꞌɨmɨpɨara jaratee wãpachida Tachi Akꞌõrepa ooda Cristo piuda kꞌaurepa.

25Bernabé Saulo ome Jerusalendepema ijãapataarãmaa tee chejida ma pꞌaratꞌa ijãapataarãpa teedapꞌedaa Antioquiade. Maapꞌeda waya wãjida Antioquiadee. Ãchi ome ateejida Juan. Mãgɨ́ ichiaba tꞌɨ̃jarapachida Marcos.

Currently Selected:

Hechos 12: sjaB

Highlight

Copy