Joel 2
2
Nan Omaliyan Di Kadodododon
2:1-2
1Mentanggoyob kayo id Sion, ay napateg ay bilig Apo Dios
ta ipagtekyo nan kaeegyat ay awnit ommat.
Pomayegpeg kayo ay iJuda
tay nganngani nan men-okoman nan apo.
2Awnit menbolinget ya kasasadot nan deey ay agew
tay pilmi ay menliliboo et bomobolinget.
Omal-ali nan adoado ay dodon
et pabolingetena nan bilbilig.
Maid kankanegna id kasin ya awnit maid kankanegna kasin.
Masapol Ay Menbabawi Nan Ipogaw Apo Dios
2:12-17
12Kankanan nan apo en, “Ngem olay id wani et somagong kayo ken sak-en
ay menbababawi, menteptepe ya men-ag-aga.
13Ipailayo nan seg-angyo isnan ik-ikkanyo
tay adi omanay nan mangsingsingatanyo isnan badbadoyo is mangipaila.
Somagong kayo isnan apo ay Diosyo
tay naanos ya managseg-ang siya.
Maan-anosana dakayo danapay tongpalen nan inkalina.
Kanayon ay nakasagana ay mangpakawan ken dakayo ay adi mendosa.
14Sinoy mangtek? Baka sokatan nan apo ay Diosyo nan nemnemna
danat seg-angan dakayo
danapay agtan dakayo is adoado ay maapit
et makaidaton kayo kasin ken siya is pagey ya basi.
15Mentanggoyob kayo isnan bilig nan Sion
ta ibilinyo ay mentepeda dakayopay ibaga en madagopda.
16Dagopenyo am-in nan ipogaw ta isaganayo daida ay men-gimong.
Ayaganyo nan naeteng
dayopay dagopen nan oongong-a ya olay gedan nan engnga.
Olay nan kaas-asawa et masapol ay taynanda nan baeyda ta makigimongda.
17Nan papadi ay mensilbi isnan apo
isnan ninbaetan di altar ya nan segpan di templo
et masapol ay men-agada ay menlowalo en,
‘apo, seg-angam kad nan ipogawmo.
Adim koma ipalobos ay iiyawen ya selselaten nan tap-in di il-ili dakami
ay mangmangwani en, “Into pay od nan Diosyo?” ’ ”
Nan Kasin Mangpagawisan Apo Dios Isnan Ipogawna
2:21-32
21“Dakayo ay paypayew, adi kayo omegyat
nodi men-gasing kayo ya menlagsak kayo
gapo isnan am-in ay inikkan nan apo ken dakayo.
22Dakayo ay talaken, adi kayo gedan omegyat
tay nan pagpastolan et ado nan logam.
Nan kak-aiw et bomgasda ya adoado nan begas nan kaiw ay makwani en higos ya olay nan obas.
23Men-gasing kayo ay iJerusalem.
Menlagsak kayo gapo isnan inikkan nan apo ay Diosyo ken dakayo.
Inidyana nan ostoosto ay damo ay odan
Tay pinaodana isnan pinag-odan
ya isnan tiagew ay kaneg id kasin.
24Nan kiskisan et mamapnoda is pagey
ya nan mataytayaan di malebek isnan paglebkan
et menlosoyda is lana ay magapo isnan olibo ya is basi.
25Isagongko din namaid ken dakayo
isdin timpo ay kinan am-in di dodon nan apityo
tay sak-en din nang-ipaey isnan naayda
ay nangdadael isnan molayo.
26Ngem awnit wada nan adoado ay kanenyo ta mapnek kayo
dayot dayawen nan apo ay Diosyo
ay nangikkan isnan naayda ay kaskasdaaw pala ken dakayo.
Et dakayo ay ipogawko et adi kayo kasin maiiyaw.
27Awnit getkenyo ay Israelita ay wadaak ken dakayo
ya sak-en nan apo ay Diosyo
et maid teken is dios.
Awnit adi kasin maiiyaw nan ipogawko.
28Makwas pay di daket ibokbok nan ispilitok ken dakayo am-in.
Et awnit ipagtek nan an-akyo ay lalalaki ya bababai nan kalik.
Nan aamam-ayo et awnitda iitawen nan gawis ay ommat
ya nan bababalloyo et wada nan ipailak ken daida.
29Isnan deey ay timpo et awnitko ibokbok nan ispilitok isnan am-in
ay olay isnan baa ay lalalaki ya bababai.
30Isnan deey ay agew et awnitak omipaila
isnan daya ya isnan batawa is kaskasdaaw ay sinyal
dat men-ayos nan basa ya wada nan poo ya bomolinget is asok.
31Awnit bomolinget nan agew
et awnit gomadangdang nan bowan ay kaneg basa
esapay omali nan napateg ya kaeegyat ay agew nan apo.
32Ngem am-in ay menpabadang isnan apo
et awnit maisalakan ay kaneg nan kinwanina en,
‘Nan tap-in di iJerusalem et awnitda mailisi isnan kaeegyat ya nan pinilik et awnitda matago.’ ”
Currently Selected:
Joel 2: xnn
Highlight
Copy
Compare
Share
Want to have your highlights saved across all your devices? Sign up or sign in
© 1984 (NT), Wycliffe Bible Translators, Inc. All rights reserved.
© 2005 (OT), Wycliffe Bible Translators, Inc. All rights reserved.
