Aro 3
3
1Kansi Ayuda opula tyani ŵanthu ŵa mitundu iyakine? Keno msilimuko uli na phindu yanji? 2Uli na phindu ngako mu njila zonse. Cotatika, Mulungu ecipa Ayuda Malizu ŵake wonse. 3Lomba keno ayakine aliye cicetekelo, kansi kusoŵa kwawo cicetekelo kungafumye cicetekelo ca Mulungu? 4 Yayi, na patontho kumo! Mulungu aŵe wa cendi, na munthu aliyense aŵe wa wenye. Pala Malembo olaŵila kuti,
“Kuti muziŵike kuti nimwe wolungama mukatatikolaŵila
nopula pamupasiwa mlandu.”
5Koma keno kusalungama kwasu kuwonesha kuti Mulungu ni wolungama, tingalaŵile cinji? Tingalaŵile kuti Mulungu aliye cilungamo poleta ukali wake pali sewo? (Nalaŵila ngani mwakulaŵilila ŵanthu ayakine.) 6Na patontho kumo! Keno kuti Mulungu enzeve cilungamo, kansi angapingule tyani calo? 7Muyakine angasushe kuti, “Keno wenye wangu uleta patuŵa cilungamo ca Mulungu noyikililapo ulemelelo wake, ni cikomo canji nikalupinguliwa kuti nine wocimwa?” 8Ni tyani osalaŵila kuti, “Tiyeni tikocita viyipa kuti viweme viwoneke?” Ŵanthu ayakine oninena noyikililapo kuti nulaŵila vamene ivi. Akalangiwe, ngani mwakupangwikila.
Paliye munthu wolungama
9Timangilizye tyani lomba? Kansi sewo tupula tyani mitundu iyakine? Na patontho kumo! Tawonesha kale kuti Ayuda na mitundu iyakine ni ŵamo wonse ali pansi pa ucimo. 10 Pala Malembo olaŵila kuti,
“Paliye munthu wolungama,
paliye na yumo kumo.
11Paliye munthu womvwishisha,
paliye opangwishisha Mulungu.
12Wonse atayika;
wonse pamo aŵa aliye nchito.
Paliye ocita viweme
paliye na yumo kumo.”
13 “Pa mukosi pawo ni manda wovulika
malilimi ŵawo olaŵila wenye.”
“Pa milomo pawo pofuma malizu oŵaŵa kuŵaŵa kwake ngani kwa njoka.
14 Pa kamwa pawo nipozula na mashamu pofuma malizu oŵaŵa.”
15“Mendo ŵawo ali na kapamphu popaya ayawo,
16 kwakuyenda kulikonse nikuceneka notamanisha ayawo.
17Oziŵalini njila ya mtendele.”
18 “Oyopalini Mulungu na patontho kumo.”
19Lomba tuziŵa kuti ciliconse cakulaŵila Matetulo, olaŵila kwa ŵala ali pansi pa Matetulo, kuti pa kamwa paliponse paŵe celele na kuti calo conse cizecisoŵe polewela kwa Mulungu. 20Pakuti na nchito za Matetulo, paliye munthu watiakaŵe wolungama pa menso pa Mulungu, na kuti ni kupitila mu Matetulo patuziŵa va kucimwa kwasu.
Kuŵa wolungama mu cicetekelo
21Koma lomba cilungamo cufumila kwa Mulungu caziŵika. Cuwelalini pokonkha Matetulo cukanga Matetulo ŵa Mose na aneneli ocitila umboni. 22Cilungamo mwa Mulungu cuwela pocetekela mwa Yesu Kristu. Paliye kusiyana pakati pa ŵanthu, 23pakuti tonse tecimwa nipo tekangiwa kufwika ku ulemelelo wa Mulungu, 24nipo tafwaniwa kuŵa wolungama mu cawanzi na cisomo cake kupitila mu cinunulo cewela na Kristu Yesu. 25Mulungu emutwala kuti na mlopa wake aŵe nsembe yolekelela macimo ŵa ŵanthu omucetekela yeve. Mulungu ecita ici kuti awoneshe kuti ni wolungama, cikomo cakuti kale enze wolezya nipo elekelela macimo ŵa ŵanthu osaŵalanga. 26Ecita ici kuwonesha cilungamo cake pa nsita ino, kuti aŵe na cilungamo na wolungamisha ŵala ali na cicetekelo mwa Yesu. 27Nga lomba munthu angalimvwe? Yayi, angalimvwelini. Cikomo ni cinji? Cikomo ni cakuti pa menso pa Mulungu nchito ya munthu ni ikululini cikulu ni cicetekelo. 28Pakuti tuwona kuti munthu ofwanika kuŵa wolungama pa menso pa Mulungu pocetekela, osati pokonkha Matetulo. 29Kansi Mulungu ni Mulungu wa Ayuda tyala? Ni Mulungulini soti wa asali Ayuda? Eee, ni Mulungu wawo. 30Pakuti Mulungu ni yumo, mwakuti akalungamike Ayuda kupitila mu cicetekelo na asali Ayuda kupitila mu cicetekelo mwamene umo. 31Kansi lomba, tutaya Matetulo patulaŵila kuti popangwika cicetekelo? Na patontho kumo. Ngako–ngako tuŵafwikisha pake peni–peni.
Currently Selected:
Aro 3: GMN
Highlight
Copy
Compare
Share
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
