Aro 4

Abulahamu olungamikiwa na cicetekelo

1Tilaŵile vinji lomba va Abulahamu kolo yasu sewo Ayuda? 2Angati Abulahamu efwaniwa kuŵa wolungama pa menso pa Mulungu na nchito zake, sembe ali na colimvwilapo koma osati pa menso pa Mulungu. 3 Koma Malembo olaŵila kuti, “Abulahamu ecetekela Mulungu, nipo efwaniwa kuti ni wolungama.”

4Lomba munthu akakata nchito, malipilo opasiwalini ngani cawanzi, koma ngani mwakuwamila pa nchito yawa kata. 5Koma munthu akayingocetekela mu malo momekela nchito zake, Mulungu owona ŵanthu asasamala va yeve kuti ni wosayifya amuwone kuti ni wolungama pa menso pake. 6Davide olaŵila cinthu colingana akalaŵila va kushukishiwa kwa munthu wamene Mulungu omupa cilungamo kupula kufuma mu nchito:

7 “Ni woshukishiwa ŵanthu

ŵamene kusakonkha Matetulo kwawo kulekelelewa,

ŵamene macimo ŵawo ofafaniziwa.

8Ni woshukishiwa munthu

wamene Asikulu amuŵelengelelini macimo ŵake.”

9Kansi mashukisho aŵa ni ŵa ŵala ŵeka osilimukiwa, keno ŵala osasilimukiwa? Onkhalila na ŵala osasilimukiwa kumo, pakuti pala Malembo ŵatalaŵila olaŵila kuti, “Abulahamu ecetekela Mulungu, tetyo pocetekela efwaniwa kuti ni wolungama pa menso pa Mulungu.” 10Kansi cepewalini kwa yeve? Epewa pecisilimukiwa, keno akaliyosilimukiwa? Aliyopewe pecisilimukiwa, koma akaliyosilimukiwa. 11Ecita msilimuko pa vuli pake, kuti ciŵe ciziŵikilo cosimikizya kuti akaliyosilimukiwa emufwanilatu kuti ni wolungama pa menso pa Mulungu pocetekela. Tetyo, Abulahamu ni kolo ya wonse wocetekela Mulungu, nipo Mulungu oŵawona kuti ni wolungama cukanga akaliyosilimukiwa. 12Nipo soti ni kolo ya ŵala osilimukiwa koma osati ŵala ŵeka osilimukiwa mu muŵili mweka, koma soti ŵala okonkha cisanzo ca cicetekelo ca kolo yasu Abulahamu akaliyosilimukiwa.

Mulungu olayizya Abulahamu

13Mulungu pecilayizya Abulahamu na azukulu ŵake kuti calo cizeciŵe cake, ecita tetyo, osati cikomo cakuti Abulahamu emvwila Matetulo ŵa Mose, koma cikomo ca cilungamo ca cicetekelo. 14Pakuti keno vakulayizya Mulungu vikapewe kwa ŵala wocetekela Matetulo, niye kuti cicetekelo ciliye nchito na kuti layizyo ya Mulungu iliye phindu. 15Matetulo ŵa Mose oyingoleta ukali, pakuti keno kuliye Matetulo niye kuti paliye angaŵafwaye.

16Tetyo, layizyo yupokelewa na cicetekelo. Yupewa ngani cawanzi. Na kuti tonse tusimikizya kuyipokela, cukanga tunkhala mwakupangwila Matetulo ŵa Mose keno yayi, keno tili na cicetekelo ngani ca Abulahamu, pakuti Abulahamu na awisi wa ŵala wonse wocetekela. 17 Pala Malembo olaŵila kuti, “Nakuyika kuŵa wisi wa mitundu inyinji.” Ni usuwasu mu menso mwa Mulungu, mwakucetekela – Mulungu akupa moyo ku akufwa noyika vinthu vosalengewa kuti viŵepo.

18 Pepenzeve cilolelo, Abulahamu mu cilolelo ecetekela tetyo eciŵa awisi ŵa mitundu inyinji, ngani mwekwilaŵililiwa kwa yeve kuti, “Na mu banja yako akaŵe anyinji ngani nyenyezi.” 19Aliyofokeshe cicetekelo cake, eziŵa kuti muŵili wake wenze ngani wakufwa kale, pakuti enze pafupi–fupi kufwika vyaka makumi kumi, nipo Sala enze mkulukazi nipo enze cumba. 20Koma aliyokayikile nosula layizyo yecimupa Mulungu, eyingokoseleshewa mu cicetekelo cake nokupa Mulungu mcinzi. 21Ecetekela ngako kuti Mulungu atweshe kucita vecimulayizya. 22Ni cikomo cake emufwana kuŵa wolungama.

23Malizu olaŵila kuti, “Emufwana kuŵa wolungama,” aliyolembewe pa yeve yeka yayi, 24koma soti kwa sewo nase, ŵatiakafwane kuŵa wolungama pa menso pake, sewo tucetekela mwa yeve ewusha Yesu Asikulu ŵasu kwa akufwa. 25Etwaliwa ku imfwa cikomo ca macimo ŵasu nowukishiwa kuŵa na moyo kuti tifwaniwe wolungama pa menso pa Mulungu.

Currently Selected:

Aro 4: GMN

Highlight

Copy

Compare