Aro 2
2
Mulungu opingula ŵanthu wonse
1Pamupingula ayanu, mulipingula mweka, pakuti mucita vakucita ŵala ŵamupingula. Tetyo, muliye polewela. 2Tuziŵa kuti Mulungu oyifyalini popingula ŵanthu ocita voteti. 3Tetyo, wewo, munthu tyala, ukaŵapingula nocita soti ivo, kansi ulingilila kuti ungayezyeŵe cipingulo ca Mulungu? 4Keno upepusha lusungu ya Mulungu, kulezya mtima kwake, na kupilila kwake? Kansi uziŵalini kuti lusungu ya Mulungu yukutwala ku kuyaluka mtima?
5Koma cikomo cakuti nimwe anthota na mtima wanu wosayaluka, mulikulishila cilango canu pa nsiku pakuti ukali wa Mulungu na cipingulo ca colungama cikawululike. 6 Pakuti Mulungu “akawezyele kwa aliyense kulingana na nchito zake zecicita.” 7Ŵanthu ayakine pocita nchito ziweme osakila ulemelelo, na mcinzi na moyo, Mulungu akaŵape moyo wosasila. 8Koma kwa ŵala olisakilila pa ŵeve ŵeka na kuti omvwilalini vyendi, nipo omvwila cisali cilungamo, Mulungu akaŵawoneshe ukali na mkwiyo. 9Kukaŵe matamano na voŵaŵa kwa ŵala wonse ocita viyipa kutatikila Ayuda, nokonkhapo asali Ayuda; 10koma kukaŵe mcinzi na ulemelelo na mtendele kwa aliyense ocita viweme kutatikila Ayuda nokonkhapo asali Ayuda. 11Pakuti Mulungu aliye msalulo.
12Asali Ayuda akacimwa, akacenekewe, cukanga kuti enzeve Matetulo ŵa Mulungu olembewa. Nipo Ayuda, ali na Matetulo ŵa Mulungu, akapinguliwe na Matetulo ŵakakangiwa kuŵamvwila. 13Pakuti kumvwa Matetulo tyala kutipangalini kuŵa wolungama pa menso pa Mulungu. Nikumvwila Matetulo kutifwanisha kuŵa wolungama pa menso pake. 14Cukanga asali Ayuda, ŵamene aliye Matetulo ŵa Mulungu olembewa, owonesha kuti oŵaziŵa poŵamvwila, cukanga cosamvwapo, 15owonesha kuti Matetulo ŵa Mulungu ni wolembewa mu mitima yawo, pakuti, malingililo keno mitima yawo yuŵatalizyalini wenye keno kuŵawuzya kuti ocita ciweme. 16Nipo aŵa ni Malizu Aweme ŵanuŵilizya kuti, nsiku yala ikuza yamene Mulungu kupitila mwa Kristu akapingule visinsi va moyo wa aliyense.
Ayuda na Matetulo
17Lomba mwewo, muliyita kuti nimwe Ayuda, mumekela pa Matetulo, nipo mumekela Mulungu wanu. 18Muziŵa vakupangwa Mulungu kuti mucite, nipo cikomo cakuti mwesambila Matetulo aŵa, muziŵa soti kusiyanisha pakati pa viweme na viyipa. 19Mucetekela kuti nimwe acitangulila ŵa ŵanthu aliye menso, nyale ya ŵala ali mu mfinzi, 20alangizi ŵa ŵanthu opusa, asambizyi ŵa aliye nzelu. Musimikizya kuti mu Matetulo mufwanamo nzelu zonse na vyendi vonse. 21Mwewo musambizya ayanu, kansi mulisambizyalini mweka? Mwewo muŵilizya va kuyiŵa, kansi muyiŵa? 22Mwewo mulaŵila kuti ŵanthu opangwikalini kucita ucende, kansi mwewo mucita ucende? Mwewo mutinkha mafano, kansi muyiŵila mafano? 23Mwewo mumekela Matetulo, ni cinji mumumvwisha nsoni Mulungu pofwaya Matetulo? 24 Pala Malembo olaŵila kuti, “Zina ya Mulungu yutafuliliwa pakati pa asali Ayuda cikomo ca mwewo.”
25Msilimuko uli na phindu keno ukonkha Matetulo, koma keno mufwaya Matetulo, mwaŵa ngani muliyesilimukiwe. 26Keno ŵala aliyosilimukiwe osunga cakupangwa Matetulo, kansi Mulungu angaŵawonelini ngani wosilimukiwa? 27Tetyo, mwewo Ayuda mukapinguliwe na asali Ayuda cikomo mufwaya Matetulo, cukanga kuti ni colembewa nipo nimwe wosilimukiwa; koma ŵeve omvwila Matetulo, cukanga ni wosasilimukiwa ku muŵili. 28Mwanalume ni Muyudalini keno ni kunja tyala, keno kusilimukiwa tyala kunja na ku muŵili. 29Yayi, mwanalume ni muyuda ngaye–ngaye mwalili mkati, na kuti msilimuko ni msilimuko wa mtima, na Mzimu Mtuŵa, osati pakulembewa. Mwanalume wotetyo kutembezyewa kwake kufumalini ku ŵanthu koma kwa Mulungu.
Currently Selected:
Aro 2: GMN
Highlight
Copy
Compare
Share
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
