Taitusí 1
1
1TŪ ko au Paula ko e tamaio‘eiki ‘a e ‘Otua, kae‘uma‘ā ko e ‘aposetolo ‘a Sīsū Kalaisi ma‘a e tui ‘a e kau Fili ‘e he ‘Otua, 2pea ma‘anau ‘ilo kānokano ki he mo‘oni, ‘a e mo‘oni ‘oku ne langa‘i ‘a e lotu, ‘i he ‘amanaki ki he mo‘ui ta‘engata, ‘a ia ne tala‘ofa ‘e he ‘Otua ta‘efa‘a loi mei he ngaahi kuonga ‘o ‘ītāniti. 3Ka na‘a ne fakahā ‘i hono ngaahi kuonga totonu ‘a ‘ene folofola, ‘i he malanga ‘a ia na‘e tu‘anaki au ‘o tuku ki ai, ‘i he fekau ‘a hotau ‘Otua Fakamo‘ui–
4ko ‘eku tohi kia Taitusi, ko hoku foha mo‘oni ‘i he lotu ‘oku ta taha ai.#2 Kol 8.23; Kal 2.3; 2 Tīm 4.10
‘Ofa ke ke ma‘u kelesi mo e fiemālie, mei he ‘Otua ko e Tamai, mo Kalaisi Sīsū ko hotau Fakamo‘ui.
Ko e Fai Fatongia ‘a Taitusi ‘i Kēliti
5Ko hono ‘uhinga ‘eni ‘o ‘eku tuku koe ‘i Kēliti, koe‘uhi ke ke fai atu ‘a e fakatonutonu ‘o e ngaahi me‘a na‘e toe, ‘o fakanofo faifekau ‘i he kolo hokohoko ‘o hangē ko ‘eku tu‘utu‘uni atu– 6kapau ko e toko taha ia ‘oku ‘ikai ha lau ki ai, ko e husepāniti ‘o ha fefine pē taha,#1.6 ko e husepāniti… taha; pe ne mali tu‘otaha pē. ‘oku ‘i ai ‘ene fānau ‘oku lotu, pea kuo ‘ikai faka‘ilo kinautolu ‘i ha fakamaveuveu, pe ko e fānau talangata‘a.#1 Tīm 3.2-7 7He ko hono tonu ‘o ia ‘oku pule ‘i he siasi ke ta‘elau‘i, he ko e sētuata ‘a e ‘Otua; ko e toko taha ‘oku ‘ikai tangi ke tu‘u ‘ana, ‘oku ‘ikai ‘itangofua, ‘oku ‘ikai uaine‘ia, ‘oku ‘ikai fa‘a tā, ‘oku ‘ikai havala ki he pa‘anga ‘uli; 8ka ko e taha ‘oku fa‘a fakaafe ‘āunofo, ‘oku ‘ofa ki he me‘a ‘oku lelei, ‘oku anga fakapotopoto, ‘oku faitotonu, ‘oku mā‘oni‘oni, ‘oku anga fakama‘uma‘u. 9‘Oku ne piki pē ki he tokāteline mo‘oni, ‘a ia na‘a ne ako ai; koe‘uhi ke ne mafai fakatou‘osi ke enginaki ‘aki ‘a e tokāteline haohaoa, pea ke ikuna ‘a kinautolu ‘oku faka‘ikai.
10He ‘oku ‘i ai ha kau talangata‘a, (ko honau tokolahi mei ha‘a Kamu), ‘oku lea launoa, mo fakahala‘i ‘a e loto ‘o e kakai; 11‘ē, ko hono totonu ke tau tāpuni ‘a e ngutu ‘o e kakai ko ia, he ko e fa‘ahinga ‘oku nau fakahinga ‘a e ngaahi fāmili honau kotoa, he‘enau ako‘aki ‘a e ngaahi me‘a ta‘etaau ko ‘enau sio koloa ‘uli. 12‘Oku lau ‘e he toko taha ‘o e kakai na, ko e fo‘i palōfita ‘onautolu, ‘o ne pehē, Ko e anga ai pē ‘o e kau Kēliti ke loi: ko e fanga manu fekai kinautolu; ko e koto kete pe fakapikopiko. 13‘Oku mo‘oni ‘a e tala ko ia, ko ia ke ke valoki māsila kinautolu, koe‘uhi ke mo‘ui lelei ‘enau lotu; 14‘o ‘oua te nau nofo ki he ngaahi talatupu‘a faka-Siu, mo e ngaahi tu‘utu‘uni ‘a ha kau tangata ‘oku afe mei he totonu. 15‘Oku ma‘a ‘a e me‘a kotoa pē kiate kinautolu ‘oku ma‘a; ka kiate kinautolu kuo ‘uli mo ta‘etui ‘oku ‘ikai ke ma‘a ha me‘a, ka kuo ‘uli pē honau loto mo e konisēnisi fakatou‘osi. 16‘Oku nau lau ‘oku nau ‘ilo ‘a e ‘Otua, ka ‘i he‘enau ngaahi ngāue ‘oku nau faka‘ikai‘i ia, ‘e he‘enau fakalielia mo talangata‘a, mo e ‘ikai ha‘anau momo‘i sia‘a ‘i ha ngāue ‘oku lelei.
Currently Selected:
Taitusí 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
