Taitusí 2
2
Ko e Fale‘i ma‘á e Kulupu Kehekehe
1KA ko koe, ke ke lea‘aki ‘a e ngaahi me‘a ‘oku taau mo e akonaki haohaoa. 2‘O pehē, ko e me‘a ki he mātu‘a tangata ke nau faka‘ehi‘ehi mei he konā, ke nau anga maopo, ke nau anga fakama‘uma‘u, ke mo‘ui lelei ‘enau tui, ‘enau ‘ofa, ‘enau kātaki. 3Ke pehē foki mo e kau finemātutu‘a; ke ngali mā‘oni‘oni ‘enau anga, ‘o ‘oua ko e kau fakakovi, ‘uma‘ā ko ha ni‘ihi ‘oku pōpula ki he inu kava lahi; 4ka ko e ako‘anga me‘a lelei, koe‘uhi ke nau kiee‘i ‘a e kau fefine ‘oku mālōlō ke nau ‘ofa ki honau ngaahi husepāniti, pea ‘ofa ki he‘enau fānau. 5Ke nau anga fakapotopoto, ke nau angama‘a, ke nau ngāue ‘i ‘api, ke nau angalelei, ke nau anganofo ki honau ngaahi husepāniti na‘a lau‘ikovi ‘a e folofola ‘a e ‘Otua.
6Pehē foki ke ke enginaki ‘a e kau talavou ke nau anga fakama‘uma‘u. 7Pea ‘i he me‘a kotoa pē ke ke hā koe ko e fa‘ifa‘itakinga ngāue lelei: ‘i ho‘o akonaki ke ke hā ‘oku ke ta‘epopo mo anga maopo, pea haohaoa ho‘o lea, ‘o ‘ikai ala lau‘i; 8koe‘uhi ke mā ‘a ia ‘oku ‘i he fa‘ahi ‘e taha, ko e ‘ikai ha‘ane me‘a ke lau kiate kitautolu ‘oku kovi.
9Ke ke enginaki ke anganofo ‘a e kau tamaio‘eiki ki he ngaahi ‘eiki ‘anautolu, ‘o fai ke nau hōhō‘ia ‘i he me‘a kotoa pē, ‘o ‘oua ‘e fakatau‘itala; 10‘o ‘oua ‘e to‘oto‘onoa: ka nau mātu‘aki fai‘aki ‘a e lototō mo‘oni; koe‘uhi ke teunga‘ia ‘iate kinautolu ‘i he me‘a kotoa pē ‘a e tokāteline ‘a hotau ‘Otua Fakamo‘ui.
11He kuo fakahā mai ‘a e kelesi ‘a e ‘Otua, ‘a e kelesi ‘oku ‘omi fakamo‘ui ki he kakai kotoa pē, 12‘oku ne ngaohia kitautolu ke tau fakafisi ki he faka‘otuamate, mo e ngaahi holi fakaemāmani; ka tau mo‘ui anga fakama‘uma‘u mo angatonu mo anga fakalotu ‘i he maama ko eni: 13he‘etau nofo‘aki tali ki he ‘amanaki mohu monū‘ia, ‘io, ko e fakahā mai ‘o e lāngilangi‘ia ‘o Sīsū Kalaisi, ko e ‘Otua Lahi pea ko hotau Fakamo‘ui.#2.13 Sīsū Kalaisi… Fakamo‘ui; pe ko ‘Otua Lahí mo hotau Fakamo‘ui ko Sīsū Kalaisí. 14‘A ia na‘a ne foaki ia ‘e ia koe‘uhi ko kitautolu; koe‘uhi ke ne huhu‘i kitautolu mei he maumau lao kotoa; pea fakama‘a ma‘ana hano kakai tonu ‘o‘ona, ha kakai ‘oku mamahi‘i ‘a e ngaahi ngāue lelei.#Saame 130.8; ‘Eki 19.5; Teu 4.20; 7.6; 14.2; 1 Pit 2.9
15Ko e ngaahi me‘a ni ke ke lea‘aki mo enginaki mo valoki ‘aki, ‘o fai fakapule ai pē. ‘Oua na‘a tuku ke ta‘etoka‘i koe ‘e ha taha.
Currently Selected:
Taitusí 2: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
