KO E ME‘A FAKAHĀ 14
14
Ko e Toko 144,000 na‘e Kau moe Lamí
1PEA u vakai, pea tā na‘e tu‘u ‘a e Lami ‘i he funga mo‘unga ko Saione, pea na‘e ‘iate ia ha to ko taha kilu mā to ko fā mano mā to ko fā afe, ‘a ia kuo tohi ki honau la‘e ‘a hono huafa, mo e huafa ‘o ‘ene tamai.#‘Isi 9.4; Fkhā 7.3 2Pea na‘e ongo mai ha le‘o mei he langi, hangē ko e le‘o ‘o ha ngaahi vai lahi, pea hangē ko e le‘o ‘o ha fu‘u mana: pea ko e le‘o na‘a ku fanongo ki ai, na‘e hangē ko e tā ha‘ape ‘e ha kau faiva. 3Pea na‘e matamata ko e hiva fo‘ou ‘a e hiva na‘a nau fai ‘i he ‘ao ‘o e taloni, mo e ‘ao ‘o e me‘a mo‘ui ‘e fā, mo e mātu‘a: pea na‘e ‘ikai ha taha te ne lava ke a ko ‘o ma‘u ‘a e hiva ko ia, ngata pē ‘i he to ko taha kilu mā to ko fā mano mā to ko fā afe, ‘a ia ne fakatau mei māmani. 4Ko eni ia ‘a kinautolu ne ‘ikai ‘uli‘i he fai mo e fefine; he ‘oku nau tāupo‘ou. Ko kinautolu ‘eni ‘oku nau muimui ki he Lami, neongo pe ko e fē ha potu ‘oku ne ‘alu ki ai. Ko kinautolu ia na‘e fakatau mei he kakai, ko e fuatapu ma‘a e ‘Otua mo e Lami. 5Pea ‘i honau ngutu na‘e ‘ikai ‘ilo ai ha loi: ‘oku nau ta‘emele.#Sef 3.13
Ko e Ngaahi Fekau ‘a e Kau ‘Āngelo ‘e Toko Tolú
6Pea u vakai ha ‘āngelo ‘e taha, ‘oku ne puna ‘i he loto langi, pea ‘oku ne ‘alu mo ia ‘a e Kōsipeli ta‘engata ke malanga‘aki kiate kinautolu ‘oku nofo ‘i he fonua, pea ki he pule‘anga kotoa pē, mo e matakali, mo e lea, mo e fa‘ahinga; 7‘o ne lea le‘o lahi ‘o pehē, Mou manavahē ki he ‘Otua, pea tuku kolōlia kiate ia; he kuo hokosia ‘a e taimi ‘o ‘ene fakamaau: pea mou hū kiate ia na‘a ne ngaohi ‘a e langi mo e fonua mo e tahi mo e ngaahi matavai ‘o e ngaahi vaitafe.
8Pea na‘e muimui mai ha ‘āngelo ‘e taha, ko hono ua ia, ‘o ne pehē, Kuo tōkilalo, kuo tōkilalo ‘a fu‘u Pāpilone, ‘a ia na‘a ne fakainu ‘a e ngaahi kakai ‘aki ‘a e uaine ko e tautea ‘o ‘ene fe‘auaki.#‘Ais 21.9; Sel 51.8; Fkhā 18.2
9Pea muimui kiate kinaua ha ‘āngelo ‘e taha, ko hono tolu ia, ‘o ne lea le‘o lahi ‘o pehē, ‘Ilonga ‘a ia ‘oku lotu ki he manu fekai mo hono ‘īmisi, pea ‘oku ne ma‘u ‘a e faka‘ilonga ‘i hono la‘e, pe ‘i hono nima, 10te ne inu mo ia foki ‘i he uaine ko e tautea mei he ‘Otua, ‘a ia ‘oku fakatau ta‘ehu‘i ki he ipu ‘o ‘ene houhau; pea ‘e fakamamahi‘i ‘aki ‘a e afi mo e sūlifa ‘i he ‘ao ‘o e kau ‘āngelo, pea ‘i he ‘ao ‘o e Lami.#‘Ais 51.17; Sēn 19.24; ‘Isi 38.22 11Pea ‘e ‘alu hake ‘a e kohu ‘o ‘enau mamahi ‘o lauikuonga pea ta‘engata: pea ‘oku ‘ikai ha‘anau mālōlō ‘i he ‘aho mo e pō, ‘a kinautolu ‘oku lotu ki he manu fekai mo hono ‘īmisi, mo ia fua pē ‘oku ne ma‘u ‘a e faka‘ilonga ko hono hingoa.#‘Ais 34.10
12‘Oku ‘i he me‘a ni ‘a e kātaki ‘a e kakai lotu, ‘a kinautolu ‘oku tauhi ‘a e ngaahi tu‘utu‘uni ‘a e ‘Otua, mo e tui kia Sīsū.
13Pea ne u ongo‘i ha le‘o mei langi na‘e pehē mai, Tohi, Hili ‘eni ‘oku monū‘ia ‘a e pekia ‘oku pekia ‘i he ‘Eiki.
Pea ‘oku folofola ‘a e Laumālie, ‘Io, koe‘uhi te nau mālōlō mei he‘enau fakaongosia, he ko ‘enau ngaahi ngāue te nau muimui atu mo kinautolu.
Ko e Utu Ta‘u ‘o Māmani.
14Pea u vakai, ‘iloange ko e ‘ao hinehina, pea na‘e heka ki he ‘ao ha To ko Taha na‘e hangē ko e Fanautama ‘a Tangata, ‘oku ‘i hono fofonga ha kalauni koula, pea ‘i hono nima ha hele tu‘usi koane na‘e māsila.#Tān 7.13 15Pea na‘e ‘alu atu mei he Temipale ha ‘āngelo ‘e taha, ‘o ne kalanga le‘o lahi kiate ia na‘e heka ki he ‘ao, ‘Ai atu ho‘o hele tu‘usi, ‘o tu‘usi ‘a e ta‘u; he kuo hokosia ‘a e utu ta‘u, ‘io, kuo hulu ‘a e ta‘u ‘o māmani.#Sioelí 3.13 16Pea ko ia na‘e heka ki he ‘ao, na‘a ne velo ‘ene hele tu‘usi ki māmani, pea na‘e utu ‘a e ta‘u ‘o māmani.
17Pea na‘e ‘alu atu ha ‘āngelo ‘e taha mei he Temipale ‘oku ‘i he langi, ‘oku ne to‘o ‘e ia foki ha hele tu‘usi koane na‘e māsila.
18Pea ha‘u ki tu‘a mei he ‘ōlita ha ‘āngelo ‘e taha, ‘a ia ‘oku ‘a‘ana ‘a e pule ki he afi, pea na‘a ne lea le‘o lahi kiate ia na‘a ne to‘o ‘a e hele ko ia na‘e māsila, ‘o ne pehē, ‘Ai atu ho‘o hele māsila na, ‘o toli ‘a e ngaahi fuhi ‘o e vaine ‘o māmani; he kuo momoho hono kālepi. 19Pea velo ‘e he ‘āngelo ‘ene hele ki māmani ‘o ne utu ‘a e vaine ‘o māmani, ‘o ne laku ki he fu‘u tata‘onga kālepi ‘o e houhau ‘o e ‘Otua. 20Pea na‘e fai ‘a e malaki ‘o e tata‘onga kālepi ‘i he tu‘a kolo; pea na‘e tafe atu ‘a e toto mei he tata‘onga, ‘o ne a‘u hake ki he piti ‘o e fanga hoosi, ‘o ne mole atu ko e ngaahi vahe valu ‘e taha afe mā onongeau ‘o e maile.#‘Ais 63.3; Tangi 1.15; Fkhā 19.15
Currently Selected:
KO E ME‘A FAKAHĀ 14: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
