KO E ME‘A FAKAHĀ 15
15
Ko e Faingata‘a Fakalilifu Faka‘osí
1PEA u vakai ha faka‘ilonga ‘e taha ‘i he langi, ko e fu‘u me‘a fakaofo, ko e ‘āngelo ‘e to ko fitu ‘oku ‘iate kinautolu ‘a e ngaahi tautea ‘e fitu; ko e ngaahi tautea fakamui ia, he ‘oku fakakakato ai ‘a e houhau ‘o e ‘Otua.
2Pea u vakai ha me‘a ‘oku hangē ha tahi sio‘ata ‘oku fiofio afi: pea ko e kau ikuna ‘o e manu fekai mo hono ‘īmisi mo e fika ‘o hono hingoa na‘a nau tu‘u ‘i he tahi sio‘ata, ‘o nau to‘o ‘a e ngaahi ha‘ape ‘a e ‘Otua. 3Pea na‘a nau hiva ‘i he hiva ‘a Mōsese ko e tamaio‘eiki ‘a e ‘Otua, pea mo e hiva ‘a e Lami, mo nau pehē,#‘Eki 15.1
‘Oku lahi mo fakaofo ho‘o ngāue,
‘a e ‘Afiona ko e ‘Otua Aoniu;
‘Oku totonu mo mo‘oni ho‘o ngaahi ‘alunga,
‘A koe ko e Tu‘i ‘o e ngaahi Kuonga.#15.3 Kuonga; ‘Oku pehē ‘i hono ngaahi hiki fuoloa ‘e ni‘ihi: pule‘angá.
4Ko hai ‘e ‘ikai ‘apasia ki he ‘Afiona,#Sel 10.7; Saame 86.9
Mo fakahīkihiki‘i ho huafa?
He ko koe toko taha ‘oku ma‘oni‘oni:
Pea ‘e ha‘u kotoa pē ‘a e ngaahi kakai,
‘O punou ‘i ho ‘ao;
Koe‘uhi kuo fakae‘a ho‘o mā‘oni‘oni.
5Pea hili ia pea u vakai, pea na‘e fakaava ‘a e Potu Tapu ‘o e Tāpanekale Tukunga-fakamo‘oni ‘i he langi. #‘Eki 38.21
6Pea na‘e ‘alu atu mei he Potu Tapu ‘a e ‘āngelo ‘e to ko fitu, ‘oku ‘iate kinautolu ‘a e tautea ‘e fitu, ‘oku nau kofu ‘aki ‘a e līneni ma‘a mo ngingila, pea nau no‘o koula ‘i honau fatafata. 7Pea ko e to ko taha ‘o e me‘a mo‘ui ‘e fā na‘a ne ‘ange ki he ‘āngelo ‘e to ko fitu ‘a e ipu koula ‘e fitu, na‘e fonu ‘i he houhau ‘o e ‘Otua, ‘a ia ‘oku ne mo‘ui ‘o lauikuonga pea ta‘engata. 8Pea na‘e pito ‘a e Potu Tapu ‘i he kohu ‘a ia na‘e tupu mei he lāngilangi ‘o e ‘Otua, mo ‘ene māfimafi; pea na‘e ‘ikai lava ‘e ha taha ke hū ki he temipale, kae‘oua ke ‘osi ‘a e tautea ‘e fitu ‘a e ‘āngelo ko ia ‘e to ko fitu.#‘Eki 40.34; 1 Tu‘i 8.10-11; 2 Kal 5.13-14; ‘Ais 6.4
Currently Selected:
KO E ME‘A FAKAHĀ 15: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
