KO E ME‘A FAKAHĀ 13
13
Ko e Ongo Manu Fekai
1PEA u vakai ‘oku ‘alu hake mei he tahi ha manu fekai, na‘e nifo hongofulu pea ‘ulu fitu pea na‘e ‘ai ‘i hono ngaahi nifo ha ngaahi kalauni ‘e hongofulu, pea tohi ‘i hono ngaahi ‘ulu ha ngaahi hingoa fie ‘otua.#Tān 7.3; Fkhā 17.3,7-12 2Pea ko e manu na‘a ku vakai na‘e hangē ko e lēpati, pea ko hono va‘e na‘e hangē ko e va‘e ‘o ha pea, pea ko hono ngutu na‘e hangē ko e ngutu ‘o ha laione: pea na‘e tuku kiate ia ‘e he Talākoni ‘a ‘ene mālohi ‘a‘ana mo hono taloni, mo ‘ene fu‘u pule.#Tān 7.4-6 3Pea ko e taha ‘o hono ngaahi ‘ulu na‘e hangē kuo te‘ia ‘o mate: ka na‘e faito‘o hono te‘ia ko ia: pea tulimui ‘a māmani ki he manu fekai ‘oku nau ofongi ia. 4Pea nau hū ki he Talākoni, koe‘uhi kuo ne tuku ‘ene pule ki he manu fekai: pea nau hū ki he manu, ‘o nau pehē, Ko hai ‘oku tatau mo e manu fekai? pea ko hai ‘oku kākunga ke fai tau mo ia?
5Pea na‘e ‘ange ki ai ha ngutu lau me‘a lalahi, mo fie ‘otua; pea na‘e fakangofua ke ne ngāue ‘i he māhina ‘e fāngofulu mā ua.#Tān 7.8,25; 11.36 6Pea ne tāngaki hono ngutu ke tālalakulaku ki he ‘Otua, ke laukovi ki hono huafa, mo hono Tāpanekale, ‘a kinautolu ‘oku nofo Tāpanekale ‘i he langi. 7Pea na‘e ‘ange ki ai ke ne fai tau mo e fa‘ahinga tapu, pea ke ne ikuna kinautolu: pea na‘e tuku kiate ia ‘a e pule ki he matakali kotoa pē, mo e fa‘ahinga, mo e lea, mo e pule‘anga.#Tān 7.21 8Pea ‘e hū kiate ia ‘a kinautolu kotoa pē ‘oku nofo ‘i he funga fonua, ‘a ia takitaha kuo ‘ikai tohi hono hingoa ‘i he tohi ‘o e mo‘ui ‘a e Lami, ‘a ia na‘e tāmate‘i talu mei he tanupou ‘o māmani.#Saame 69.28
9‘Ilonga ha taha ‘oku telinga, ke ne ongo‘i. 10‘Ilonga ha taha kuo tonu pā ki he pōpula, te ne mole pe ki he pōpula: ‘ilonga ‘a ia kuo tonupā ki he mate heletā kuo pau ke mate heletā. ‘Oku ‘i he me‘a ni ‘a e kātaki mo e tui ‘a e kakai lotu.#Sel 15.2; 43.11
11Pea u vakai ha manu fekai ‘e taha na‘e ‘alu hake mei he fonua, pea na‘a ne nifo ua hangē ko ha lami, pea na‘a ne lea hangē ko ha talākoni. 12Pea na‘a ne fai ‘a e pule kotoa ‘o e ‘uluaki manu fekai, ‘i he ‘ao ‘o e manu ko ia, pea na‘a ne ngaohi ‘a e fonua mo kinautolu ‘oku nofo ai, ke hū ki he ‘uluaki manu, ‘a e manu na‘e faito‘o hono te‘ia ke mate. 13Pea ‘oku ne fai ‘a e ngaahi me‘a fakaofo lahi, ‘io, ‘oku ne tuputupulefanua ke ‘alu hifo ‘a e afi mei he langi ki he fonua ‘i he ‘ao ‘o e kakai. 14Pea ‘oku ne kākaa‘i ‘a e kakai ‘oku nofo ‘i he fonua, koe‘uhi ko e ngaahi me‘a fakaofo na‘e tuku ke ne fai ‘i he ‘ao ‘o e manu fekai; he‘ene tala ki he kakai ‘oku nofo ‘i he fonua ke nau ngaohi ha ‘īmisi ‘o e manu, ‘a e manu na‘e taa‘i ‘aki ‘a e heletā kae toe mo‘ui. 15Pea na‘e tuku kiate ia ke ‘ange ha laumālie ki he ‘īmisi ‘o e manu fekai, koe‘uhi ke lea foki ‘a e ‘īmisi ‘o e manu, pea ke pule ke tāmate‘i ‘a kinautolu kotoa pē ‘e ‘ikai te nau hū ki he ‘īmisi ‘o e manu. 16Pea ‘oku ne kouna ‘a e kakai kotoa pē, ‘a e iiki mo e lalahi, ‘a e koloa‘ia mo e masiva, ‘a e tau‘atāina mo e pōpula, ke nau ‘ai kiate kinautolu ha faka‘ilonga ‘i honau nima to‘omata‘u, pe ‘i honau la‘e: 17pea ke ‘oua na‘a lava ha taha ke fakatau mai pe fakatau atu, ‘o kapau ‘oku ‘ikai ‘iate ia ‘a e faka‘ilonga ko ia, ‘a ia ko e hingoa ‘o e manu fekai, pe ko e fika ‘o hono hingoa.
18‘Oku ‘i he me‘a ni ‘a e poto. Ko ia ‘oku ‘atamai, ke ne fatu ‘a e fika ‘o e manu fekai; he ko e fika fakaetangata ia: pea ko hono fika ko e onongeau mā onongofulu mā ono.
Currently Selected:
KO E ME‘A FAKAHĀ 13: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
