PALŌVEPI 4
4
Ko e ngaahi ‘Aonga ‘o e Potó
1KAU tama, fanongo ki he akonaki ‘oku ‘atu fakatamai,
Pea tokanga mai ke mou ma‘u poto:
2He ko e koloa lelei ‘oku ou ‘atu;
‘Oua te mou hiki mei he‘eku fale‘i.
3He ko e taha au na‘e loto‘aki ‘e he‘eku tamai,
Fakakelesi ‘e he‘eku fa‘ē ko ‘ene me‘a pē taha.
Pea ne akonaki au.
4‘O ne pehē mai:
Ke puke ma‘u ‘eku ngaahi lea ‘e he loto;
Tauhi ‘eku ngaahi tu‘utu‘uni ka ke mo‘ui:
5Fakatau ma‘au ‘a e poto,
Fakatau ma‘au ‘a e mafai-ke-‘ilo:
‘Oua ‘e ngalo,
Pea ‘oua ‘e afe mei he lea ‘oku ou pu‘aki.
6‘Oua ‘e li‘aki ‘a e taha ko ia, pea te ne tauhi koe;
Ke ke ‘ofa kiate ia, pea te ne lehilehi‘i koe.
7Ko e kamata ke poto ‘a‘eni:
Fakatau ma‘au ‘a e poto:
‘Io, neongo ‘oku ke totongi ‘aki ‘a e me‘a kotoa kuo ke lava,
Fakatau ‘a e mafai-ke-‘ilo.
8Fakahīkihiki‘i ia, pea te ne hiki koe ki ‘olunga:
Te ne fakapale‘i koe, ‘o kapau te ke fā‘ofua kiate ia.#4.8 fā‘ofua kiate ia; pe mahu‘inga‘i ia lahi ai.
9Te ne ‘ai ki ho ‘ulu ha pale te ke faka‘ofo‘ofa ai:
Te ne hilifaki hao kalauni matamatalelei.
10Fanongo mai, tama, ‘o tali ‘eku ngaahi lea;
Pea fakalahi ai ‘a e ngaahi ta‘u ‘o ho‘o mo‘ui.
11Kuo u ako koe ‘i he hala ki he poto;
Kuo u taki koe ‘i he ngaahi ‘alunga ‘o e totonu.
12‘Oka ke ka laka atu, ‘e ‘ikai te ke fakave‘eve‘etuia;
Pea kapau te ke lele, ‘e ‘ikai te ke humu.
13Pukenima ‘a e akonaki;
‘Oua ‘e tukuange:
Tauhi ke ma‘u;
He ko ho‘o mo‘ui ia.
14‘Oua ‘e hū ki he hala ‘o e kau angahala,
Pea ‘oua ‘e ‘alu ‘i he founga ‘o e kakai kovi.
15Ta‘ofi mei ai,
‘Oua ‘e tu‘u ai;
Afe mei ai,
Pea laka atu ki kō.
16He ko e fa‘ahinga ko ē ‘oku ‘ikai te nau mamohe,
‘Oka kuo te‘eki fai ha kovi;
‘Io, ‘oku mole ‘enau mohe,
‘Oka kuo te‘eki ke nau fakahinga ha ni‘ihi.
17He ko ‘enau me‘akai ‘oku ma‘u ‘i he fai kovi pē,
Pea nau toki inu ‘a e kava ‘oku ma‘u mei he fakamālohi.
18He ko e ‘alunga ‘o ha‘a faitotonu ‘oku hangē ko e maama hengihengi,
‘A e fakautuutu ‘ene maama ‘o a‘u ki he ho‘atā mālie.
19Ko e hala ‘o e kau angahala ko e koto po‘uli lōlō:
‘Oku ‘ikai te nau ‘ilo ‘a e me‘a ‘oku nau humu ai.
20Tama, tokanga ki he‘eku ngaahi lea;
Fokotu‘u telinga mai ki he me‘a ‘oku ou lau.
21‘Oua na‘a puli ia mei ho mata;
Tauhi ia ‘i ho loto‘i loto.
22He ko e mo‘ui‘anga ia ‘o kinautolu kuo nau ma‘u ia,
‘Io, ko e me‘a faito‘o te ne fālute hoto sino kotoa.
23‘I he me‘a kotoa ‘oku ke tauhi, mu‘omu‘a ‘a e lama ‘o ho loto,
He ‘oku founga mei ai ‘a e ngaahi me‘a ‘oku ‘asi ‘i he mo‘ui.
24Ko e ngutu mamio, tuku ia;
Pea fakamama‘o mei he loungutu feāfeaki.
25Ko e me‘a ki ho mata, ke sio fakahangatonu mu‘a,
Pea fakamama‘u ho laumata ki he me‘a ‘oku ke hanga ki ai.
26Fakatokalelei ‘a e hala ‘oku ‘alu ai ho va‘e,
Pea fakatotonu ho ngaahi ‘alunga kotoa pē.#Hep 12.13
27‘Oua ‘e afe ki he to‘omata‘u pe ko e to‘ohema:
Ta‘aki ho va‘e mei he kovi.
Currently Selected:
PALŌVEPI 4: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
