PALŌVEPI 5
5
Ko e Fakatokanga ‘i he Faka‘alu‘alu
1TAMA, tokanga ki he poto kuo u a‘u ki ai;
Fokotu‘u telinga mai ki he me‘a kuo u ‘ilo:
2Koe‘uhi ā ke ke tauhi ‘a e ngaahi fakakaukau;
Pea ke lama ‘e ho ngutu ke ‘atu pē ‘a e me‘a ‘oku ke ‘ilo.
3He ko e ngutu ‘o e pa‘umutu ‘oku to‘i mei ai ‘a e honi,
Seuke, ko hono me‘a fakalea ‘oku momole ange ‘i he lolo;
4Ka ko hono fakaiku ‘oku ifo kovi hangē ko e teve,
Māsila hangē ha heletā matafuhifuhi.
5Ko e va‘e ‘o e fefine ko ia ‘oku hifo ai pē kia Mate;
Ko ‘ene taulaka ‘oku fakahangatonu ki Lolofonua.
6Ko e fefine ko ia–koloto ke ne hae atu ke ma‘u ‘a e hala ‘o e mo‘ui:
‘Oku fepikopikoaki ‘ene ‘alu ki he me‘a ‘oku ‘ikai te ne ‘ilo ki ai
7Pea ko eni, kau tama, fanongo mai;
Pea ‘oua ‘e afe mei he lea ‘oku ou pu‘aki.
8Le‘ei ho hala ke mama‘o mei he fefine ko ia,
Pea ‘oua te ke ofi ki hono matafale.
9Na‘a ‘iloange te ke tuku ke mole ho tangata ki ha ni‘ihi kehe,
Mo e fu‘u konga ‘o ho‘o mo‘ui ki he fa‘ahinga fekai.
10Na‘a ‘iloange ‘e mo‘umo‘ua ha kau muli ‘i he koloa ‘a‘au;
Pea hū ‘a e fua ‘o ho‘o ongosia ki he fale ‘o ha kehe;
11Pea ‘e iku pē ki ho‘o nofo to‘e,
Kuo ka‘anga ho kakano mo ho sino kotoa.
12Pea ke pehē,
Ko e hā ai na‘a ku fehi‘a ki he akonaki,
Pea fakasīkaka‘i ‘e hoku loto ‘a e fakapoto;
13Pea na‘e ‘ikai te u tokanga ki he le‘o ‘o e kakai na‘e ako mai,
Pea na‘e ‘ikai te u fokotu‘u telinga ki hoku kau tiuta?
14Na‘e ‘ikai mei ai ha kovi te u ta‘efai#5.14 Na‘e… fai; pe Pea fokifā pē kuo fakamaa‘i au, pe Pea na‘e toe si‘i pea fakamaa‘i au.
‘I he lotolotonga ‘o e kakai mo e fakataha.
15Ma‘u ho vai inu mei ho lepa pē ‘o‘ou,
Mo ho‘o holi vai tufu ke lahi, mei ho‘ou pē vai.
16Ke tangikafa ho fauniteni ki mala‘e,
Kae ‘i ai ‘ani manga‘i vai ‘i he ngaahi hala.
17Ke ‘a‘au pē tāfataha,
‘O ‘oua ‘e kau ai hani muli.
18Ke monū‘ia ho ‘ana vai;
Pea ke ma‘u fiefia mei ho uaifi fakatalavou.
19Ko si‘i tia loto‘aki!
Mo si‘i kaseli hōihoifua!
Ke ke topono ai pē ‘i hono ongo huhu;
Ke ke to‘oa ai pē ‘i he‘ene veveho mai.
20He ko e hā ai, tama, ke ke to‘oa ha fefine muli,
Mo pīkitai ki he fatafata ‘o ha kehe?
21He ‘oku fe‘ao mo Sihova ‘a e ngaahi ‘alunga ‘o e tangata,
Pea ‘oku ne hae atu ki hono ngaahi founga kotoa.
22Ko e angahala ko ia ‘oku pō ia ‘i he ngaahi kovi ‘a‘ana,
Pea te ne mo‘uha‘ia ‘i he ngaahi kafa ‘o ‘ene ngaahi angahala.
23Ko e toko taha ko ia te ne mate ko e masiva kinisi;
‘Io, ‘i he lahi ‘o ‘ene vale te ne mo‘uhēa pē.
Currently Selected:
PALŌVEPI 5: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
