PALŌVEPI 3
3
Ko e Fale‘i ki he To‘utupú
1TAMA, ‘oua ‘e ngalo ‘eku akonaki;
Kae tauhi ‘e ho loto ‘eku ngaahi tu‘utu‘uni;
2He ‘e fakalahi ai ki he me‘a ‘oku ke ma‘u
‘Aki ‘a e nofo fuoloa, mo e ngaahi ta‘u mo‘ui, mo e tu‘umālie.
3Ke ‘oua ‘e mahu‘i meiate koe ‘a e anga‘ofa mo e fai mo‘oni:
Ha‘i kinaua ki ho kia;
Tohi kinaua ki he tohi‘anga ‘o ho loto:
4Ko ia te ke ma‘u ai ‘a e ‘ofa mo e ongoongolelei
‘I he ‘ao ‘o e ‘Otua mo e tangata.#Luk 2.52
5Falala ki he ‘Eiki ‘aki ‘a e kotoa ‘o ho loto,
‘O ‘oua ‘e faaki ki ho poto ‘o‘ou:
6Ke ke fakaongo kiate ia ‘i ho hala kotoa pē,
Pea ‘e fakatonutonu ‘e ia ho ngaahi ‘alunga.
7‘Oua te ke lau ‘e koe ‘oku ke poto:
Ke ke ‘apasia kia Sihova, pea afe mei he kovi;#Lom 12.16
8Ko e faito‘o leva ia ki ho pito,
Mo e ngako ki ho ngaahi hui.
9Fai ha faka‘apa‘apa ki he ‘Eiki ‘aki ho‘o koloa,
Mo e me‘a mei he polopolo ‘o ho fua kotoa pē:
10Ko ia ‘e fonu ai ho ngaahi feleoko ‘i he mahu,
Pea ‘e puna ‘a e uaine fo‘ou mei ho tata‘o‘anga.
11Tama, ‘oua te ke va‘inga‘aki ho ako ‘oku fai ‘e he ‘Eiki;
Pea ‘oua te ke kina ‘i ho tautea ‘e ia:#Siope 5.17 #Hep 12.5-6
12He ko ia ‘oku ‘ofa ki ai ‘a e ‘Eiki ‘a ia ‘oku ne kinisi;
‘Io, hangē ko e fai ‘e ha tamai ki hono foha pele.#Fkhā 3.19
13Monū‘ia ā ka ko e tangata kuo ne ‘ilo ‘a poto,
Mo e tangata kuo ne ma‘u mai ‘a e mafai-ke-‘ilo;
14He ‘oku lelei ange ‘a e ‘alu holo hono fakatau ‘i he siliva,
Pea ko e fua ‘oku te ma‘u ai, ‘i he koula mo‘onia.
15‘Oku ne mahu‘inga ange ‘i he makakula koloa;
Pea neongo pe ko e hā ho manako ‘e ‘ikai ala fakatatau ki ai.
16‘Oku ne to‘o ‘i hono to‘omata‘u ‘a e mo‘ui fuoloa;
Pea ‘i hono to‘ohema ‘a e koloa mo e ongoongo.
17Ko hono ngaahi hala ko e koto mālie,
Pea ko e koto melino hono ngaahi afenga kotoa pē.
18Ko e ‘akau-‘o-e-mo‘ui ia kiate kinautolu ‘oku puke ia:
Pea ‘oku monū‘ia ‘a kinautolu ‘oku kuku ki ai.
19Ko poto na‘e langa ai ‘e Sihova ‘a e fonua;
Na‘a ne fokotu‘u ‘a e langi ‘aki ‘a e mafai-ke-sivi.
20Ko ‘ene ‘ilo na‘e fakapā ai ‘a e ngaahi matavai ‘o e moana,
Pea ‘oku tulutā hifo ai ‘a e hahau mei he ngaahi ‘ao.
21Tama, ‘oua na‘a puli kinaua mei ho mata;
Tauhi ‘a Tokoni mo Fakakaukau;
22Ko e mo‘ui leva ia ki ho laumālie,
Mo e teunga ki ho kia.
23Te ke toki ‘alu nonga pē ‘i ho hala,
Pea ‘e ‘ikai tūkia ho va‘e.
24‘Oka ke ka tokoto, ‘e ‘ikai te ke manavahē:
‘Io, te ke tokoto, pea holo ho‘o mohe.
25‘Oua te ke manavahē ki ha hoko fokifā ha fakailifia,
Pe ‘i he tō mai ha ha‘aha‘a‘i matangi ‘a ha kau angahala:
26He ko Sihova leva ho falala‘anga,
Pea te ne tauhi ho va‘e ke ‘oua na‘a mo‘ua.
27‘Oua te ke ta‘ofi ha lelei meiate kinautolu ‘oku ‘onautolu ia,
‘Osi, ‘oku mafai ‘e ho nima ke fai.
28‘Oua te ke pehē kiate ia ‘oku mo alea,
“‘Alu, ka ke toki ha‘u,
Pea ‘a pongipongi te u ‘atu;”
‘Osi, ‘oku ke lolotonga ma‘u.
29‘Oua te ke fakakaukau‘i ha kovi ke fai ki ho kaungā‘api,
‘Osi, ‘oku ne nofo‘aki koe.
30‘Oua te ke fakakikihi tu‘unga‘a pē mo ha tangata,
‘O kapau kuo ‘ikai te ne fai ha kovi kiate koe.
31‘Oua te ke faka‘amua ha tangata fai fakamālohi,
Pea ‘oua te ke fili ha taha ‘o hono ngaahi founga.
32He ko e tangata anga piko ‘oku fakalili‘a ki ai ‘a Sihova:
Ka ko e kau anga tonu ‘oku nau talanoa fafale mo ia.
33Ko e mala ‘a Sihova ‘oku ‘i he fale ‘o e kau angahala
Ka ‘oku ne tāpuaki‘i ‘a e nofo‘anga ‘o e faitotonu.
34Ka fai mai ‘ani kata kakae, ‘e kata kakae atu mo ia:
Ka ko si‘i anga vaivai ‘oku ne tali ‘ofa ki ai.#Sēm 4.6; 1 Pit 5.5
35‘E tō ki he kau poto honau tofi‘a ko e ongoongo:
Ka ko e kau vale ko honau ‘inasi mu‘a ko e mā.
Currently Selected:
PALŌVEPI 3: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
