PALŌVEPI 2
2
Ko e ngaahi Fua ‘o e Potó
1TAMA, kapau te ke tali ‘eku ngaahi lea,
‘O tuku tauhi mo koe ‘eku ngaahi tu‘utu‘uni;
2‘O ke tuku ai ho telinga ke fanongo ki he poto,
Mo ofe‘i ho loto kia Fakahinohino;
3Kae‘uma‘ā, kapau te ke ui ‘a ‘Ilome‘a,
Pea ha‘aki ho le‘o kia Fakahinohino;
4Kapau te ke ha‘ao ia hangē ha ha‘ao siliva,
Pea hakule ki ai hangē ko ho‘o fai ki ha koloa fufū:
5Te ke toki lave‘i ‘a e ‘apasia kia Sihova,
Pea ma‘u ‘a e ‘ilo‘i ‘o e ‘Otua.
6He ‘oku foaki poto ‘e Sihova;
‘Oku mei hono fofonga ‘a e ‘ilo mo e fakahinohino.
7‘Oku ne tuku tauhi ma‘a e angatonu ha tokoni,
Ha fakaū kiate kinautolu ‘oku fou totonu;
8Ke ne le‘ohi ‘a e ngaahi ‘alunga fakakonisitūtone,
Mo tauhi ‘a e hala ‘o ‘ene kau lotu.
9‘E toki mahino kiate koe ‘a e totonu mo e fakakonisitūtone;
‘A e taau, ‘a e founga kotoa pē ‘oku lelei.
10He ‘e hū ‘a e poto ki ho loto,
Pea felātani ‘a e ‘ilo mo ho laumālie;
11‘E fai ho fakalekesi ‘e Fakakaukau, ‘e le‘ohi koe ‘e Fakahinohino:
12Kae fakahaofi koe mei he hala kovi
Mei he kakai ‘oku mio‘i lau;
13‘a e kakai ‘oku li‘aki ‘a e ngaahi ‘alunga totonu,
Pea foua ‘a e ngaahi hala ‘oku po‘uli;
14‘a e fa‘ahinga ‘oku fiefia ke fai kovi,
Mo tome‘e ‘i he mamio ‘a e tangata kovi.
15‘A ia ‘oku piko honau ngaahi ‘alunga,
Pea hanga kehe honau ngaahi laka‘anga:
16Ke fakahaofi koe mei he fefine faka‘ulia,
Mei he fefine muli ‘oku lea fakaoleole;
17‘A ia ‘oku ne li‘aki hono ‘ofa‘anga mu‘a,
Pea ngalo ai ‘a e kovinānite ‘o hono ‘Otua.
18He ‘oku hifo hono fale ki he mate,
Mo hono ngaahi hala ki he kau tanu.
19‘Ilonga ha hū ki ai ‘oku ‘ikai te nau foki,
Pea ‘oku ‘ikai te nau a‘usia ‘a e ngaahi hala ‘o e mo‘ui.
20Koe‘uhi ā ke ke hā‘elea ‘a e hala ‘o e kakai lelei,
‘O ta‘ofi ki he ngaahi ‘alunga ‘o e kau mā‘oni‘oni.
21He ko e kau angatonu te nau nofo‘ia ‘a e fonua,
Pea ko e haohaoa te ne ‘i ai ai pē.
22Ka ko e kakai kovi ‘e tu‘usi mei he fonua,
‘Io, ko kinautolu ‘oku fai kākā ‘e ta‘aki mei ai.
Currently Selected:
PALŌVEPI 2: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
