PALŌVEPI 1
1
Ko e ‘Aonga ‘o e Fokotu‘u Palōvepi
1KO E ngaahi palōvepi ‘a Solomone, Ko e ‘Alo ‘o Tēvita, ko e Tu‘i ‘Isileli,#1 Tu‘i 4.32
2Ko e me‘a ke ‘ilo poto ai mo e akonaki;
Ke sivi ‘a e ngaahi lea ‘uhinga:
3Ko e me‘a ke ma‘u ai ‘a e akonaki fakapoto,
‘A e totonu, mo e fakakonisitūtone, mo e taau:
4Ko e me‘a ke ‘atu fakapotopoto kiate kinautolu ‘oku hehemangofua,
‘A e ‘ilo‘ilo mo e fakakaukau ki he talavou:
5Ke fanongo ‘a e poto, pea fakalahi ‘ene me‘a ‘oku ma‘u;
Pea ke ma‘u ‘uta lelei mei ai ‘e he loto matala:
6Ko e me‘a ke faka‘uhinga ai ‘a e palōvepi mo e fakatātā;
‘A e tala ‘a e kau poto, mo ‘enau ngaahi tupu‘a.
Ko e Fale‘i ki he To‘utupú
7Ko e ‘apasia kia Sihova ko e ‘uluaki me‘a ia ‘i he ‘ilo:#1.7 Ko e… ‘ilo; pe Kuo pau ke te tomu‘a ‘apasia kia Sihova ka te toki ma‘u e ‘iló. pe Ko e tapa mahu‘inga taha ‘o e ‘iló ko e ‘apasia kia Sihova.
Ko e poto mo e ako, ko e vale pē ‘oku ta‘etoka‘i ia.#Siope 28.28; Saame 111.10; Pal 9.10
8Tama, fanongo ki he akonaki ‘a ho‘o tamai,
Pea ‘oua ‘e hiki mei he ngaahi tala ‘a ho‘o fa‘ē.
9He ko e pale faka‘ofo‘ofa ia ki ho ‘ulu,
Mo e ngaahi kahoa ki ho kia.
10Tama, kapau ‘e fakaloto‘i koe ‘e ha kau angahala,
‘Oua te ke loto ki ai.
11Kapau te nau pehē,
Ha‘u ā ke tau kau,
Tau fai ‘etau fononga tā,
Tau toka malumu ki ha taha
‘Oku falala vale ki he‘ene ta‘ekau ‘i ha me‘a;
12Te tau folo mo‘ui kinautolu hangē ko Hētesi,
‘O folo fua, ‘o hangē ha hifo ki tanu‘anga;
13‘Oku mau ma‘u ‘a e koloa mahu‘inga kehekehe,
Kuo mau fakafonu vete homau ngaahi fale;
14Te ke kau ‘i he talotalo, ‘o ‘inasi fakataha mo kimautolu;
Te tau kato taha kotoa pē.
15Tama, ‘oua te ke fou ‘i he hala mo kinautolu;
Ta‘ofi ho va‘e mei honau founga:
16He ‘oku lele honau va‘e ki he kovi,
‘O fakavave ke lilingi toto.
17Seuke, ‘oku ta‘e‘aonga ‘a e fola kupenga
Ki ha manu kapakau ‘oku sio ki ai:
18Ka ko kinautolu ‘oku nau fai ha fononga taa‘i ‘onautolu,
‘Oku nau toka malumu ki ‘anautolu mo‘ui.
19Ko e nānunga#1.19 Ko e nānunga; Ko hono fakalea ia ‘i he hiki fuoloa ‘e taha, ka ‘oku pehē ‘i he faka-Hepeluú: Ko e hala. ia ‘o ia fua pē ‘oku fa‘ao koloa;
‘Oku ‘ave ai ‘a e mo‘ui ‘a e kakai ‘oku ma‘u.
Ko e Kalanga Mai ‘a Poto
20‘Oku kalanga ‘a Poto ‘i hala:
‘Oku ne ha‘aki hono le‘o ‘i he ngaahi mala‘e;#Pal 8.1-3
21‘I he fakama‘ungatu‘u ‘o e ngaahi hala kakai,
‘I he hū‘anga ‘o e ngaahi matanikolo,
‘Io, ‘i kolo ‘oku ne fai atu ‘ene ngaahi lea:
22‘a e kau hehemangofua, ko futu ho‘omou manako ki he anga ko ia?
Pea nofo ‘a e kau manuki ki he fai manuki,
Pea fehi‘a ‘a e kau sesele ke ‘ilo ha me‘a?
23Mou tafoki, ‘o tali ‘eku akonaki atu:
Eni, te u hua‘i kiate kimoutolu hoku laumālie,
Te u faka‘ilo atu ‘eku ngaahi tala.
24Ko e me‘a ‘i he‘eku ui atu, ka mou tekaki.
Kuo u mafao atu hoku nima,
Kae ‘ikai ha taha ‘e tokanga;
25Pea kuo mou tuku ke teka tu‘a ‘a ‘eku fa‘a fale‘i kimoutolu,
Pea ‘ikai te mou tali ‘eku akonaki atu:
26Ko au foki te u kata ‘i ho‘omou tu‘utāmaki,
Fakama‘ito‘a he tō mai ho‘omou manavahē;
27‘I he tō mai ho‘omou manavahē hangē ha ha‘aha‘a‘i matangi,
Mo e hoko mai ho‘omou tu‘utāmaki hangē ha ‘ahiohio;
‘A e tō kiate kimoutolu ‘a e faingata‘a mo e mamahi.
28Te nau toki ui kiate au,
Kae ‘ikai te u tali;
Te nau ‘ā hengihengi hoku kumi,
Kae ‘ikai te nau ma‘u au:
29Ko e tuha ia ‘o ‘enau fehi‘a ke ‘ilo ha me‘a,
Mo e ‘ikai te nau fili ‘a e ‘apasia kia Sihova:
30Na‘e ‘ikai te nau tali ‘eku fa‘a fale‘i kinautolu;
Na‘a nau ta‘etoka‘i ‘eku ngaahi akonaki na‘e fai:
31Ko ia ai, te nau kai ‘a e fua ‘o honau ‘alunga,
Pea te nau mākona ‘i he ngaahi fakakaukau ‘anautolu.
32He ko e foki atu ‘a e hehemangofua te ne fakapoongi kinautolu,
Pea ko e falala noa ‘a e kau vale te nau ‘auha ai.
33Ka ko ia ‘oku fakaongo kiate au
Te ne nofo nonga,
Pea te ne ‘atā mei he manavahē ki he kovi.
Currently Selected:
PALŌVEPI 1: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
