PALŌVEPI 12
12
1KO ia ‘oku manako ki he poto ‘oku ne manako ki he ako fakapoto:
Ka ko ia ‘oku fehi‘a ki he valoki ko e fakamanu ia.
2Ko e tangata lelei ‘oku ne touia he ‘ofa mamana ‘a Sihova:
Ka ko e tangata puleaki, ‘e fakahalaia ‘e He‘ene ‘Afio.
3‘E ‘ikai kau ‘a e angahala ‘a ha tangata ke ne matu‘u ai:
Ka ko e aka ‘o e faitotonu ‘e ta‘emaue‘i.
4Ko e uaifi fita ko e kalauni ki hono husepāniti:
Ka ko e uaifi fakafofongavale‘i ko e popo ‘oku totolo ‘i hoto ngaahi hui.
5Ko e ngaahi fakakaukau ‘a e faitotonu ‘oku hoa mo e lao:
Ka ko e ngaahi fifili ‘a e angahala ko e koto fiemu‘a pē.
6Ko e ngaahi lea ‘a e angahala ‘oku toka tata‘o ke fai ha fakapō:
Ka ko e me‘a ‘oku pu‘aki ‘e he angatonu, ‘e kau ke fakahaofi.
7‘Oku mafuli ‘a e angahala, pea talu ai pē.
Ka ko e fale ‘o e faitotonu ‘e tu‘u.
8‘E fakamāloo‘i ha tangata ‘o fakatatau ki he maama ‘o hono ‘atamai:
Ka ko e loto piko ko hono ō ē ko e manukia.
9‘Oku lelei ha taha mā‘ulalo, ka ‘oku ai ‘ene taha ngāue,
‘Ia Me‘a ‘oku ne taku ko e ‘eiki, ka ‘oku masiva me‘atokoni.
10‘Oku ongo‘i ‘e he faitotonu ‘a e loto ‘o ‘ene manu:
Kae ngaue ‘a e fatu ‘o e angahala ko e fie sio mamahi.
11Ko ia ‘oku ngoue‘i hono kelekele ‘e mohu me‘akai:
Ka ko ia ‘oku tuli ai pē ki he muna, ko e taha masiva loto.
12‘Oku mānumanu ‘a e angahala ki he ‘a‘alu ‘a e kakai kovi:
Ka ko e aka ‘o e faitotonu ‘oku laku atu pē.#12.12 ‘Oku ‘ikai ke mahino ‘a e faka-Hepelū ‘o e vēsí ni.
13‘I he faihala ‘a e ngutu ‘oku ai ha hele kovi:
Kae hao ‘a e faitotonu mei he ‘efihia.
14Ko e fua ‘o e lea ‘a ha matāpule ‘a ia ‘oku ne topono ai ‘i he lelei:
Pea ko e fita‘a ‘o e nima ‘o ha tangata, ‘oku fakafoki kiate ia.
15Ko e ‘alunga ‘o Vale ‘oku totonu ‘i he‘ene vakai ‘a‘ana:
Ka ‘oku tali fale‘i ‘a e tama poto.
16Ka ‘itengia ha vale, te ne tuku ke hā leva ‘ene mamahi.
Ka ko e tama ula te ne fufū hono ngaohikovia.
17Ko ia ‘oku ne hō‘aki ‘a e mo‘oni te ne ‘a‘au ‘a e totonu:
Ka ko ia ‘oku fakamo‘oni loi, ‘oku ne ‘a‘au ‘a e kākā.
18‘Oku ai ha taha ko ‘ene fa‘a lau ‘oku hangē ko e hokohoka‘i ha heletā:
Ka ko e ‘elelo ‘o e poto ko e me‘a faito‘o.
19Ko e tu‘u ‘a e ngutu lea mo‘oni ‘e ta‘engata:
Ka ko e ‘elelo loi ‘e ‘oua pē ke u kemo
20Ko e kākā: ‘oku ‘i he loto ‘o ia ‘oku fili ha kovi ke fai ki ha taha,
Ka ko e fiefia ‘oku ‘iate ia ‘oku tu‘utu‘uni ke fai ha ‘ofa.
21‘Oku ‘ikai tō ki he faitotonu ha momo‘i tu‘utāmaki:
Ka ko e kau angahala ‘oku fonu ‘i he kovi.
22Ko e ngutu loi ‘oku fakalili‘a ki ai ‘a Sihova:
Ka ‘ilonga ha fai mo‘oni ko hono mamana ia.
23Ko e tama ula ‘oku ne kofukofu ‘ene poto:
Ka ko e loto sesele ‘oku vale ‘a‘au.
24Ko e nima tutui ‘e pule:
Ka ko e nima fakapikopiko ‘e tali fatongia.
25Ka hū ‘a e hoha‘a ki he loto ‘o ha tangata, ‘oku ne peluki‘i ia:
Ka ‘oku fakafiefia‘i ‘e ha lea lelei.
26‘Oku hoko ‘a e faitotonu ko e takimu‘a ki he kakai ‘oku nau feangai:
Ka ko e ‘alunga ‘o e angahala ko e me‘a fakahē.
27Ko e fakapikopiko ‘e ‘ikai te ne tunu ‘ene a‘alu:
Ka ko e koloa mahu‘inga ki ha tangata ‘a e anga vivili.#12.27 ‘Oku ‘ikai ke mahino ‘a e faka-Hepelū ‘o e vēsí ni.
28‘Oku nofo ‘i he hala ‘o e faitotonu ‘a e mo‘ui:
Pea ko e fou atu ‘i he ‘alunga ko ia ‘oku ‘ikai ha mate.#12.28 Pea… mate; ‘Oku pehē ‘i he hiki fuoloa ‘e taha: Pea ko e faikoví, ko e hala ia ‘oku tau ki he mate. ‘Oku fihi hono faka-Hepeluú.
Currently Selected:
PALŌVEPI 12: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
