PALŌVEPI 10
10
KONI PALŌVEPI ‘A SOLOMONE
1KO E foha poto ko e fiefia‘anga ‘o ‘ene tamai:
Ka ko e tama vale ko e fakamamahi ‘o ‘ene fa‘ē.
2Ko ha fu‘u koloa angahala kae ‘ikai ‘aonga:
Ka ko e faitotonu ‘oku ne fakahaofi mei he mate.
3‘E ‘ikai tuku ‘e Sihova ke hōngea ‘a e mo‘ui ‘a e faitotonu.
Ka ko e holi ‘a e kau angahala ‘oku ne fakateka atu.
4‘Oku hoko ko e masiva, ‘a ia ‘oku nima fakapikopiko:
Pea ko e nima tutui ‘oku fakatupu koloa.
5Ko ia ‘oku tānaki ‘i he fa‘ahita‘u māfana ko e tama poto ia:
Ko ia ‘oku mohe fakalōle‘a ‘i he ututa‘u ko e tama fakatupu mā.
6Ko e ngaahi tāpuaki ‘a e faitotonu ‘oku tō pē ki ho‘ona tumu‘aki:
Ka ko e ngutu ‘o e angahala ‘oku tāpuni ‘e he‘enau fakamālohi.
7‘Oku langa fakamālō ‘a e manatu ki ha taha faitotonu:
Ka ko e hingoa ‘o e angahala ‘e ‘eho.
8Ko e loto poto ‘oku ne tali enginaki:
Ka ko e ngutu vale te ne tō fo‘ohake.
9Ko ia ‘oku laka totonu ‘oku laka malu:
Ka ko ia ‘oku mamio hono ngaahi ‘alunga, ‘e ‘iloa pē.
10Ko ia ‘oku talanoa kakamo ‘oku ne fakatupu ha ‘ū mamahi:
Ka ko ia ‘oku valoki fakahā, ‘oku ne fakatupu melino.#10.10 Ka… melino; Ko hono fakalea ia ‘i he hiki fuoloa ‘e taha, ka ko hono faka-Hepeluú ‘oku tatau mo konga hono ua ‘o veesi 8.
11Ko e ngutu ‘o e faitotonu ko e matavai mo‘ui:
Ka ko e me‘a ‘oku pu‘aki ‘e he angahala ko e kofu ‘o e fakamālohi.
12Ko e tāufehi‘a ‘oku fakatupu kē:
Ka ko e ‘ofa ‘oku ne fakakofu ‘a e fa‘ahinga angahala kotoa pē.#Sēm 5.20; 1 Pit 4.8
13‘E ma‘u ha poto ‘i he ngutu ‘o e loto matala:
Kae ma‘u ha uipi ki he tu‘a ‘o e masiva poto.
14Ko e kau poto ‘oku nau fa‘oaki ‘ilo:
Ka ko e ngutu ‘o e vale, ko e tu‘utāmaki ‘oku panaki ai pē.
15Ko e koloa ‘a e koloa‘ia ko hono kolo mālohi ia:
Ko e tu‘utāmaki‘anga ‘o e masiva ko ‘ene masiva.
16Ko e totongi ‘a e faitotonu ‘oku ngāue ki he mo‘ui:
Ko e koloa ‘oku hū mai ki he pau‘u ‘oku ngāue ki he angahala.
17‘Oku ne ‘i he hala ki he mo‘ui ‘a ia ‘oku ne tali hapo ‘a e akonaki ‘oku fai:
Ka ko ia ‘oku li‘aki ‘a e fakapoto ‘oku ne hē.
18Ko ia ‘oku ne ‘ufi‘ufi ‘ene fehi‘a ko e ngutu kākā pē:
Pea ko ia te ne lau fola ha fakakovi ko e vale ia.
19Ka lahi ha lea ‘e ‘ikai hala ha angahala:
Ka ko ia ‘oku fakama‘uma‘u hono loungutu ko e poto ia.
20Ko e ‘elelo ‘o e faitotonu ko e siliva fungani:
Ko e loto ‘o e kau angahala ko e ‘ata‘i me‘a.
21Ko e ngutu ‘o e faitotonu ‘oku ‘aonga ki he tokolahi:
Ka ‘oku pekia ‘a e kau vale ko ‘enau masiva poto.
22Ko e tāpuaki ‘a Sihova, ko ia ia ‘oku fakakoloa:
Pea ‘oku ‘ikai te ne ‘atu mo ia ha mamahi.#10.22 Pea… mamahi; pe Pea ko ho‘o fakafitefita‘á, ‘e ‘ikai te ke ‘āsili koloa‘ia ai.
23Ko e me‘a fakafiefia ki he vale ke feia ha angahala:
‘Oku pehē ‘a e poto ki he tangata ma‘u ‘atamai.
24Ko e me‘a ‘oku manavahē ki ai ‘a e angahala, ko ia ‘e hoko mai:
Pea ko e manako ‘a e faitotonu ‘e ‘ange ki ai.
25Ka mole atu ‘a e afā kuo ‘ikai ‘a e angahala:
Ka ko e faitotonu ko e fale tu‘u ma‘u ai pē.
26Hangē ko e vinika ki he nifo,
Pea hangē ko e ‘ahu ki he mata,
‘Oku pehē ‘a e makau kiate kinautolu na‘e fekau ia.
27Ko e ‘apasia kia Sihova ko e me‘a fakalahi ‘aho:
Ka ‘e kosi ‘a e ta‘u ‘o e kau angahala.
28Ko e fakatu‘a ‘a e faitotonu ko e koto fiefia:
Ka ko e ‘amanaki ‘a e angahala ‘e ‘auha.
29Ko e ‘alunga ‘o Sihova ko e kolotau ki he haohaoa,
Ka ko e tu‘utāmaki‘anga ki he kau faikovi.
30‘Oku ta‘emaue‘i ‘a e faitotonu, ‘o ta‘engata:
Ka ko e kau angahala ‘e ‘ikai te nau nofo ‘i he fonua.
31Ko e ngutu ‘o e faitotonu ‘oku talamuka mai ko e poto:
Ka ko e ‘elelo mamio ‘e ta‘aki.
32Ko e ngutu ‘o e faitotonu ‘oku ne ‘ilo ‘a e me‘a ‘e tau lelei:
Ka ko e me‘a ‘oku pu‘aki ‘e he angahala ko e koto mamio.
Currently Selected:
PALŌVEPI 10: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
