PALŌVEPI 9
9
Ko e Potó mo e Valé
1KO Poto kuo ne langa hono fale,
Kuo ne tā hono ngaahi pou ke fitu:
2Kuo ne fai ‘ene tāmate manu;
Kuo hu‘i ‘ene kava;
Seuke, kuo ne teuteu ‘ene tēpile.
3Kuo ne fekau atu ‘ene kau ta‘ahine;
‘Oku ne tala kātoanga ‘e ia, ‘ene tu‘u ‘i he ngaahi mātanga ‘o e kolo:
4“Ilonga ha ta‘efievale
Ke afe mai ki heni.”
Ko e me‘a ki he masiva ‘atamai ko ‘ene lea ki ai ‘oku pehē.
5“Mou omi, ‘o kai ‘eku me‘akai,
‘O inu ‘a e kava kuo u hu‘i.
6Tuku ho‘omou pehē, ‘A e kau hehemangofua, ka mou mo‘ui,
Pea mou fai atu ‘i he hala ‘o e ‘ilo.”
7Ko ia ‘oku ne akonaki‘i ha taha ‘oku manuki,
Ko ‘ene kole pē ha taukae ma‘ana,
Pea ko ia ‘oku ne valoki‘i ha pau‘u,
Talu ai ‘ene mele.
8‘Oua ‘e valoki‘i ha taha manuki,
Na‘a ne fehi‘a kiate koe:
Valoki‘i ha taha poto,
Pea te ne ‘ofa kiate koe.
9‘Atu ha poto ki ha taha ‘oku poto,
Pea ‘e fakautuutu ‘ene poto.
Fakahinohino ha me‘a ki ha taha faitotonu,
Pea ‘e fakalahi ai ki he me‘a ‘oku ne ma‘u.
10Ko e kamata‘anga ‘o e poto ko e ‘apasia kia Sihova:
Pea ko e ‘ilo‘i ‘o e Tāpuhā ko e ma‘u ‘atamai ia.#Siope 28.28; Saame 111.10; Pal 1.7
11He ko e me‘a ‘iate au ‘e fakalahi ho ngaahi ‘aho,
Pea fungani ‘a e ngaahi ta‘u ‘o ho‘o mo‘ui.
12Kapau ‘oku ke poto, ko e poto ma‘a u;
Pea kapau ‘oku ke va‘inga‘aki, ko koe pē ‘e tō ki ai.
13Ko e fefine ko Vale ‘oku anga maveu;
Ko e koto hehemangofua ia,
‘O ta‘e‘ilo ha me‘a.#9.13 ‘Oku ‘ikai ke mahino ‘a e faka-Hepelū ‘o e vēsí ni.
14Nofo pē ia ‘i hono matafale,
‘I ha nofo‘a ‘i he ngaahi potu mā‘olunga ‘o e kolo,
15Ke ui kiate kinautolu ‘oku laka ange,
‘A kinautolu na‘e mei fou totonu pē ‘i honau hala:
16“Ilonga ha ta‘efie vale,
Ke afe mai ki heni.”
Pea ko e me‘a ki he masiva ‘atamai ko ‘ene lea ki ai ‘oku pehē,
17“‘Oku melie ‘a e vai kaiha‘a,
Pea ‘oku vovo ‘a e me‘a ‘oku kai lami‘i.”
18Ka koloto ke ne ‘ilo koni ‘anga‘anga hena;
Pea ko ‘ene kau fakaafe ‘oku ‘i he takele ‘o Hētesi.
Currently Selected:
PALŌVEPI 9: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
