Ma‘aké 4
4
Ko e Talanoa ki he Tangata Ngoue
(Māt 13.1-9; Luk 8.4-8)
1PEA hanga ia ‘o toe faiako ‘i he matātahi: pea fakataha kiate ia ha fu‘u kakai tokolahi ‘aupito, ko ia na‘a ne heka ki ha vaka ‘o nofo mei tahi; ka ko e fu‘u fakataha na‘a nau tutu‘u ‘i ‘uta, ‘o hanga ki tahi.#Luk 5.1-3 2Pea na‘e lahi ‘ene ako‘i kinautolu ‘i he ngaahi fakatātā, pea ne pehē kiate kinautolu ‘i he‘ene ako:
3Fanongo mai: Ko eni, na‘e ‘alu atu ha tangata tūtuu‘i ke tūtuu‘i; 4pea ‘i he‘ene fai ‘ene tūtuu‘i, na‘e tō ha me‘a ‘i he ve‘ehala, pea puna mai ‘a e fanga manupuna, ‘o nau kai ‘o ‘osi ia. 5Pea tō mo ha me‘a ki he potu maka, mo e potu na‘e ‘ikai loko lahi ai ‘a e kelekele: pea tuaiekemo ‘ene ‘oho hake, koe‘uhi ko e ‘ikai matolu ‘a e kelekele: 6pea ‘i he ‘alu hake ‘a e la‘ā ne velehia, pea ko e me‘a ‘i he ‘ikai fai aka ne mate ia. 7Pea tō mo ha me‘a ki he potu ‘akau talatala, pea tupu hake ‘a e ngaahi ‘akau talatala ‘o kāsia ia, pea na‘e ‘ikai te ne a‘u ki he fua. 8Pea ngangana ha ni‘ihi ki he kelekele kuo lelei; pea fakafeitama ia, ‘a ia na‘e fai hake mo ngengesi; pea na‘e fua, ‘o fua tolungofulu ha taha, pea onongofulu ha taha, pea teau ha taha.
9Pea pehē ‘e ia, ko ia ‘oku ma‘u telinga ke ongo ‘aki, ke ne ongo‘i.
Ko e ‘Uhinga ‘o e Fai Talanoa Fakatātā ‘a Sīsuú
(Māt 13.10-17; Luk 8.9-10)
10Pea ‘i he‘enau fakaekinautolu leva, pea ko kinautolu na‘e ‘iate ia, kae‘uma‘ā ‘a e kau Hongofulumāua, na‘a nau ‘eke kiate ia ‘a e ngaahi fakatātā. 11Pea ne pehē kiate kinautolu, Kuo tuku kiate kimoutolu ‘a e misiteli ‘o e Pule‘anga ‘o e ‘Otua: ka ‘oku fai fakatātā kotoa pē kiate kinautolu ‘oku ‘i tua‘ā: 12koe‘uhi ke nau sio mo‘oni, kae ‘ikai ‘ilo; pea fanongo mo‘oni, kae ‘ikai ongo‘i; na‘a ‘iloange te nau tafoki, pea fakamolemole kinautolu.#‘Ais 6.9-10 (LXX)
Ko e Fakamatala‘i ‘e Sīsū ‘a e Talanoa Fakatātā ki he Tangata Ngoué
(Māt 13.18-23; Luk 8.11-15)
13Na‘a ne pehē foki kiate kinautolu, ‘oku ‘ikai koā te mou ‘ilo ‘a e fakatātā ko eni? pea mou ‘ilo fēfē ki he ngaahi fakatātā kehekehe? 14Ko e tangata tūtuu‘i ‘oku ne tūtuu‘i ‘a e folofola. 15Pea ko eni ia ‘a kinautolu ‘i he ve‘ehala; ko kinautolu na‘e tūtuu‘i ai ‘a e folofola, ka ‘i he‘enau fanongo ki ai, pea ha‘u leva ‘a Sētane, ‘o ne ‘ave ‘a e folofola kuo tō ‘iate kinautolu. 16Pehē foki, ko eni ‘a kinautolu na‘e tūtuu‘i ‘i he ngaahi potu maka; ko kinautolu ‘oku fanongo ki he folofola, pea puke fiefia leva ki ai: 17ka ‘oku ‘ikai hanau aka ‘iate kinautolu, ka ‘oku nau fakataimi pē. Faifai, pea hoko ha faingata‘a, pe ha fakatanga, koe‘uhi ko e folofola, pea nau tūkia leva. 18Pea ‘oku ai mo ha ni‘ihi ‘oku tūtuu‘i ‘i he potu ‘akau talatala: ko kinautolu ia ‘oku fanongo ki he folofola; 19ka ko e fa‘a loto mo‘ua ki māmani, mo e fakahekeheke ‘a koloa, pea mo e holi ki he ngaahi me‘a kehekehe, ‘oku nau hūhū mai, ‘o kāsia ‘a e folofola, pea ne ta‘efua. 20Pea ‘oku ai mo kinautolu na‘e tūtuu‘i ki he kelekele kuo lelei; ko e fa‘ahinga ia ‘oku fanongo ki he folofola, pea tali lelei ia, pea nau fua, ‘o fuo tolungofulu ‘a e taha, pea onongofulu ‘a e taha, pea teau ‘a e taha.
Ko e Maama
(Luk 8.16-18)
21Na‘a ne pehē foki kiate kinautolu, He ‘oku ‘omi ha maama ke ‘ai ki he loto puha fua, pe ki he lalo mohenga? ‘ikai koe‘uhi ke ‘ai ki he tu‘unga maama?#Māt 5.15; Luk 11.33 22He ‘oku ‘ikai ke lilo ha me‘a, ka koe‘uhi ke toki fakahā, ‘uma‘ā hano fakafufū, ka koe‘uhi ke hoko ‘o fu‘u e‘a.#Māt 10.26; Luk 12.2 23Ka ai ha taha ‘oku ma‘u telinga ke ongo ‘aki, ke ne ongo‘i.
24Na‘a ne pehē foki kiate kinautolu, Tokanga pe ko e hā ‘a e me‘a ‘oku mou fanongoa. Ko e fua ‘oku mou fua ‘aki, ko ia pē ‘e fua ‘aki kiate kimoutolu, pea ‘e fakalahi atu.#Māt 7.2; Luk 6.38 25He ko ia ‘oku ne ma‘u ha me‘a, ‘e ‘ange ki ai mo ha me‘a: pea ko ia ‘oku ‘ikai ke ma‘u, na‘a mo e me‘a ‘oku ne ma‘u, ‘e to‘o meiate ia.#Māt 13.12; 25.29; Luk 19.26
Ko e Talanoa Pulopula ‘e Taha
26Pea lea atu ia ‘o pehē, Ko e anga ‘eni ‘o e Pule‘anga ‘o e ‘Otua: ‘Oku hangē ko e laku tenga ‘e ha tangata ki he kelekele; 27‘o ne mohe pē mo ‘ā, ‘i he pō mo e ‘aho, pea tupu pē ‘a e tenga ‘o ‘alu hake, kae molekemama‘o ha‘ane ‘ilo pe ‘oku fakafēfē. 28‘Oku fakatupu ia ‘e he kelekele ‘iate ia pē; ‘o fuofua fakatupu ‘a e sino, hoko mo e moto, hoko mo ‘ene fo‘i koane. 29Pea ‘i he‘ene motu‘u ‘a e fua, pea toki hanga ‘e he tangata ‘o ‘ai ‘a e hele tu‘usi, he kuo hoko ‘a e ututa‘u.#Sioelí 3.13
Ko e Pulopula‘i Mūsita
(Māt 13.31-32,34; Luk 13.18-19)
30Pea fai atu ia ‘o pehē, Te u fakatatau ki he hā ‘a e Pule‘anga ‘o e ‘Otua? ‘io, ko e hā nai ha fakatātā te u fai‘aki ki ai? 31‘Oku hangē ko ha fo‘i tenga‘i mūsita; ‘a ia ‘i hono tūtuu‘i ki he kelekele ‘oku si‘i ange ‘i he tenga kotoa pē ‘oku tō: 32kae hili hono tō, ‘oku ne ‘alu hake ‘o hoko ko e lahi ‘i he fa‘ahinga mohuku kai, pea ‘oku ne va‘ava‘a lalahi; ko ia ‘oku lava ai ‘a e fanga manupuna ‘o e ‘atā ke nofo ‘i hono malu.
33Pea lahi ‘a e ngaahi fakatātā pehē na‘a ne lea‘aki ai ‘a e folofola kiate kinautolu, ‘o fakatatau ki he‘enau mafai ke fanongo ki ai. 34Ka na‘e ‘ikai te ne lea kiate kinautolu ‘o ta‘eha fakatātā: pea ‘i he‘enau fakaekinautolu, na‘a ne faka‘uhinga kotoa pē ki he‘ene kau ako ‘a‘ana.
Ko e Matangi Mālohi
(Māt 8.23-27; Luk 8.22-25)
35Pea ‘i he‘ene efiafi ‘i he ‘aho ko ia, na‘a ne pehē kiate kinautolu, 36Tau ō ki he kauvai. Pea kuo nau tukuange ‘a e kakai, na‘a nau ‘ave ai pē ia ‘i he vaka na‘a ne ‘i ai: pea na‘e ‘i ai mo e ngaahi vaka kehe na‘e folau mo ia. 37Pea tō mai hā fu‘u ‘ahiohio, pea kamata heka ‘a e ngaahi peau ki he vaka, pea kamata ngoto ‘a e vaka. 38Ka na‘e ‘i he taumuli ‘a Sīsū, ‘o ne mohe ki he me‘a fakamolū: pea fafangu ia, ‘o nau pehē ki ai, Tangata‘eiki, ‘oku ‘ikai te ke toka‘i ‘etau tu‘utāmaki?
39Pea ne ‘ā, ‘o ne lolomi ‘a e matangi, ‘o ne pehē ki he tahi, Longo ā, ‘oua ‘e momo‘i ngū, pea tālolo ‘a e matangi, pea hoko ha tofu lahi. 40Pea ne pehē kiate kinautolu, Ko e hā ‘oku pehē ai fau ai ho‘omou lotosi‘i? Ko e hā ‘oku ‘ikai ai ha‘amou tui?
41Pea nau manavahē–ko e manavahē ka ko ha manavahē–pea nau fealēlea‘aki, ‘o pehē, Ko hai tū ‘eni? he na‘a mo e matangi mo e tahi ‘oku fakaongo kiate ia.
Currently Selected:
Ma‘aké 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
