Ma‘aké 5
5
Ko e Tangata na‘e Ma‘u ‘e ha Laumālie Kovi
(Māt 8.28-34; Luk 8.26-39)
1PEA nau a‘u ki he kauvai ‘o e tahi, ki he fonua ‘o e kakai Kekesa. 2Pea ‘i he‘ene hifo mei he vaka, na‘e fakafetaulaki leva kiate ia mei he ‘aaki fonualoto ha tangata kuo ‘iate ia ha fa‘ahikehe. 3Pea ko e siana ko ia na‘a ne nofo‘anga ki he fonualoto; pea kuo te‘eki lava ‘e ha taha hono ha‘i, 4neongo ko e fai‘aki ha seini; he kuo tu‘o lahi ‘a e kii‘i hono va‘e, mo hono ha‘i seini; pea kuo ne motuhi ‘a e ngaahi seini pea laiki ‘a e ngaahi ukamea: pea na‘e ‘ikai mafai ‘e ha taha ke ikuna ia. 5Pea na‘a ne ‘i he ngaahi fonualoto mo e ngaahi mo‘unga ma‘u ai pē, he po‘uli mo e ‘aho, ‘o kaikaila, mo tafatafa‘i ‘aki ia ‘a e ngaahi maka.
6Pea ‘i he‘ene vakai mei he mama‘o kia Sīsū, na‘a ne lele, ‘o tū‘ulutui kiate ia, 7‘o ne kalanga le‘olahi ‘o pehē, Ko ho hā au, ‘e Sīsū ko e ‘Alo ‘o e ‘Otua Taupotu? ‘oku ou hū tōtōaki kiate koe ‘i he ‘Otua, ke ‘oua na‘a ke fakamamahi‘i au. 8He kuo ne kamata pehē ki ai, ‘a e fa‘ahikehe na, Mahu‘i mai mei he tangata.
9Pea fehu‘i kiate ia ‘e Sīsū, Ko hai ho hingoa?
10Pea ne tali, Ko Kongakau au, he ‘oku mau tokolahi. Pea ne kole lahi kiate ia, ke ‘oua te ne fekau ke nau ‘alu mei he fonua.
11Pea na‘e ai ha fu‘u fanga puaka ‘i he potu ko ia na‘e huhua ‘i he tafa‘aki mo‘unga. 12Pea nau kole kiate ia, ‘o pehē, Tuku mai kimautolu ki he fanga puaka ke mau hū ki ai. 13Pea tukuange leva kinautolu ‘e Sīsū, pea ‘alu atu ‘a e ngaahi fa‘ahikehe, ‘o nau hū ki he puaka: pea ‘oho ‘a e fanga manu ‘i he tahifohifo ki tahi, (na‘a nau fe‘unga nai mo e toko ua afe ‘o nau melemo ‘i tahi.
14Pea hola ‘a e kakai na‘e tauhi kinautolu, ‘o nau ongoongoa ‘a e me‘a ki he kolo mo e ngoue‘anga. Pea na‘e ‘alu ‘a e kakai ke vakai ‘a e me‘a kuo fai. 15Pea nau ha‘u kia Sīsū, pea nau ‘ilo ki he ‘āvea, ‘oku ne ta‘utu, kuo kofu pea kuo poto–‘a e tangata na‘e iate ia ‘a e kongakau–pea nau ilifia. 16Pea na‘e fakamatala kiate kinautolu ‘e he kakai na‘e mamata ki ai, ‘a e anga ‘o e hoko ‘a e me‘a ko ia ki he ‘āvea, pea mo e me‘a na‘e kau ki he fanga puaka.
17Pea nau hanga ‘o kole kia Sīsū ke ne ‘alu mei honau feitu‘u.
18Pea ‘i he‘ene heka vaka, na‘e kole kiate ia ‘e he tangata ne ‘āvea ke na ō mo ia.
19Ka na‘e ‘ikai te ne tuku ke pehē, ka ne lea pē ki ai, Mole ki ho ‘api mo ho kakai, pea ongoongoa kiate kinautolu ‘a e ngaahi fu‘u me‘a kuo fai ‘e he ‘Eiki ma‘au, mo ‘ene ‘ofa‘i koe.
20Pea ‘alu ‘a e tangata, ‘o ne kamata ke ongoongoa ‘i Tikapolusi ‘a e ngaahi fu‘u me‘a kuo fai ‘e Sīsū ma‘ana. Pea na‘e ofo ai ‘a e kakai kotoa pē.
Ko e Ki‘i Ta‘ahine Tau‘aki pea mo e Fefine Mahaki
(Māt 9.18-26; Luk 8.40-56)
21Pea ko eni, kuo foki ‘a Sīsū ‘i he vaka ki he kauvai, pea fakataha kiate ia ha fu‘u kakai lahi, pea na‘a ne ‘i he matātahi, 22mo e ha‘u ha toko taha ‘o e kau pule ‘o e falelotu, ko hono hingoa ko Siailosi. Pea ‘i he‘ene vakai kia Sīsū, na‘a ne hinga atu ki hono va‘e, 23‘o ne kole lahi kiate ia, ‘o pehē, Ko si‘eku kihi‘i fefine ‘oku tau‘aki: taumaiā ‘oku ke me‘a ange ‘o ‘ai ho nima kiate ia, koe‘uhi ke ne hao ai ‘o mo‘ui.
24Pea ‘alu ia mo e tangata; pea muimui ki ai ha fu‘u kakai lahi, pea nau feta‘omi mai kiate ia.
25Pea na‘e ai ha fefine ‘e taha, kuo ‘au toto ‘o ta‘u hongofulu mā ua, 26pea lahi ‘a e faito‘o fakamamahi kuo fai kiate ia ‘e he kau faito‘o tokolahi, pea kuo ‘osi atu si‘ene koloa kotoa, kae ‘ikai ‘aupito te ne ‘aonga ki ha me‘a, kaekehe na‘a ne faka‘a‘au ki mui; 27pea kuo ne fanongo ki he talanoa ‘o Sīsū, pea ne ha‘u mo e kakai mei hono tu‘a, ‘o ne ala ki hono kofu. 28He na‘a ne pehē, Kapau te u ala kiate ia, neongo ko hono kofu pē ē, ‘e fakamo‘ui au.
29Pea matu‘u leva ‘ene ‘au, ‘o ne ongo‘i ‘i hono sino kuo ne mo‘ui mei hono mamahi‘anga. 30Ka ka ‘ilo leva ‘e Sīsū ‘i hono finangalo, kuo ‘alu atu meiate ia ha mālohi, pea ne tafoki ki he kakai ‘o ne pehē, Ko hai ne ala ki hoku kofu?
31Pea pehē ‘e he‘ene kau ako kiate ia, Ko ho‘o lau koā, Ko hai kuo ne ala kiate au? Ka ‘oku ke vakai ki he kakai ‘oku nau feta‘omi mai kiate koe.
32Ka ka vakai foli pē ‘e ia ke ‘ilo ‘a e toko taha kuo ne fai ‘a e me‘a ko ia. 33Pea ko e fefine, ‘i he‘ene vakai ‘a e me‘a kuo hoko kiate ia, na‘a ne mo‘u ilifia pē mo tetetete, ‘o ne ha‘u ‘o hinga ‘i hono ‘ao, ‘o ne vete atu hono kotoa. 34Ka ka pehē ‘e ia ki ai, Nga‘ata, kuo fakamo‘ui koe ‘e ho‘o tui; ‘alu ‘o fiemālie pē ā, pea ke mo‘ui mei ho mamahi‘anga.
35Pea lolotonga ‘ene kei lea, mo e ha‘u ha ni‘ihi mei he fale ‘o e pule ‘o e falelotu, ‘o nau pehē, Kuo pekia ho ‘ōfefine, koe‘uma‘ā ke fakaongosia ai pē ‘a e tangata‘eiki.
36Kae ongona ‘e Sīsū ‘a e#5.36 Kae ongona ‘e Sīsū ‘a e; pe Ka na‘e ‘ikai ke tokanga ‘a Sīsū ki he. me‘a na‘e lau, ‘o ne pehē ki he matāpule, ‘oua ‘e lotosi‘i: kehe pē ke ma‘u ho‘o tui. 37Pea na‘e ‘ikai te ne tuku ha taha ke ō mo ia, ko Pita pē, mo Sēmisi, pea mo Sione ko e tehina ‘o Sēmisi. 38Pea nau a‘u ki he ‘api ‘o e matāpule, pea ‘ilo ai ‘e Sīsū ha fu‘u vālau, ko kinautolu na‘e tēngihia, mo kinautolu na‘e fu‘u ‘oiauē. 39Pea ne hū ‘o lea kiate kinautolu, Ko ho‘omou vālau mo tangi koe‘uma‘ā? ‘oku ‘ikai pekia ‘a e ta‘ahine ka ‘oku mohe.
40Pea nau luma kiate ia. Ka ka hanga ‘e ia ‘o kapusi kinautolu kotoa, ‘o ne ‘ave ‘a e tamai ‘a e ta‘ahine, mo ‘ene fa‘ē, mo kinautolu na‘e ha‘u mo ia, ‘o nau hū ki he potu na‘e ‘i ai ‘a e ta‘ahine. 41Pea ne puke hono nima ‘o ne pehē ki ai, Tālita, kumi; ‘a ia ko hono hiki, Si‘i ta‘ahine, ‘oku ou tala atu, ke ke tu‘u.
42Pea tu‘u hake leva ‘a e ta‘ahine, ‘o ‘eve‘eva; he kuo ne hongofulu mā ua ta‘u. Pea ‘oho leva honau loto–ko e ‘oho ka ko ha ‘oho. 43Pea ne na‘ina‘i lahi kiate kinautolu ke ‘oua na‘a ‘ilo ‘e ha taha ‘a e me‘a ko ia; pea ne fekau ke ‘ange ha‘ane me‘a ke kai.
Currently Selected:
Ma‘aké 5: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
