Ma‘aké 3
3
Ko e Tangata Nima Mamatea
(Māt 12.9-14; Luk 6.6-11)
1PEA kuo ne toe ‘i falelotu; pea na‘e ‘i ai ha tangata kuo mate hono nima. 2Pea nau lamasi ia, pe te ne faito‘o ia ‘i he ‘aho Sāpate, koe‘uhi ka nau toki faka‘ilo ia. 3Pea pehē ‘e ia ki he tangata kuo nima mate, Tu‘u mai ki loto. 4Pea pehē ‘e ia kiate kinautolu, Ko e fē ‘oku ngofua ‘i he Sāpate? Ke fai ha lelei, pe ke fai ha kovi? Ke fakahaofi mo‘ui, pe ke tāmate‘i? Pea nau fakalongo pē.
5Pea vakai foli ‘e ia kiate kinautolu ‘oku ne tuputāmaki, he‘ene mamahi he tekesio honau loto; pea ne toki pehē ki he tangata, Mafao atu ho nima. Pea ne mafao atu: pea ne toe mo‘ui mai hono nima.
6Pea ‘alu leva kitu‘a ‘a e kau Fālesi, fakataha mo e fa‘ahi ‘a Hēlota; pea nau puleaki‘i ia, pe ‘e fēfē ha‘anau tāmate‘i ia.
Ko e Omi e Tokolahi kia Sīsū
7Pea ko Sīsū mo ‘ene kau ako na‘a nau ‘alu ki tahi, pea muimui mai ha fu‘u kakai mei Kāleli; 8pea ko e tokolahi mei Siutea, mo Selusalema, mo ‘Aitumia, mo Tu‘a-Siotani, mo e feitu‘u ‘o Taia mo Saitoni, ko e fu‘u kakai, na‘a nau omi kiate ia, he‘enau fanongo ki he ngaahi me‘a ‘oku ne fai. 9Pea ne lea ki he‘ene kau ako ke talitali mai ha ki‘i vaka kiate ia, telia ‘a e kakai mo ‘enau feta‘omi kiate ia.#Ma‘ake 4.1; Luk 5.1-3 10He na‘e tokolahi ‘a e kakai na‘a ne fakamo‘ui; ko ia ‘ilonga kinautolu na‘e ai hanau mamahi‘anga, na‘a nau hinga atu kiate ia ke nau ala ki ai. 11Pea ko e ngaahi fa‘ahikehe, ka nau ka sio kiate ia, te nau tōmape‘e ‘i hono ‘ao, ‘o kalanga, ‘o pehē, Ko koe ko e ‘Alo ‘o e ‘Otua.
12Pea lahi ‘ene lolomi kinautolu ke ‘oua te nau fakae‘a ia.
Ko e Fili ‘e Sīsū ‘a e Toko Hongofulu-mā-ua
(Māt 10.1-4; Luk 6.12-16)
13Pea ‘alu hake ia ki he mo‘unga, ‘o ui ange ‘a kinautolu na‘a ne loto ki ai, pea nau omi kiate ia. 14Pea ne fakanofo ha toko hongofulu mā toko ua, ke nau ‘iate ia, pea ke ne fekau atu kinautolu ke malanga, 15Pea ke ‘anautolu ke kapusi tēvolo.
16Ko Saimone, ‘a ia na‘a ne ‘ai ki ai ‘a e hingoa ko Pita; 17mo Sēmisi ko e foha ‘o Sēpeti, mo Sione ko e tehina ‘o Sēmisi; pea ne ‘ai kiate kinaua ‘a e hingoa ko e ongo Poanesi, ‘a ia ko hono ‘uhinga ko e ongo foha ‘o Fatulisi; 18Ko ‘Anitelū foki mo Filipe, mo Pātolomiu, mo Mātiu, mo Tōmasi, mo Sēmisi ko e foha ‘o ‘Alefiusi, mo Tatiusi, mo Saimone ‘o e kautaha Mamahi‘i fonua, 19Mo Siutasi ‘Isikāliote, ‘a ia foki na‘a ne lavaki‘i ‘a Sīsū.
Ko Sīsū mo e Taki ‘o e Kau Tēvoló
(Māt 12.22-32; Luk 11.14-23; 12.10)
20Pea nau ‘alu ki ha fale. Pea toe fakataha mai ‘a e kakai, ko ia na‘e ‘ikai te nau lava ke mama ha konga mā. 21Pea ‘i he fanongo ki ai ‘a hono kāinga, na‘a nau ‘alu atu ke puke ia; he na‘a nau pehē, ‘Oku ne sesele.
22Pea ko e fa‘a lau ‘a e kau sikalaipe na‘e ‘alu hifo mei Selusalema na‘e pehē, ‘Oku ‘iate ia ‘a Pelisipupe; mo ‘eni, Ko e pule ‘o e kau tēvolo ‘oku ne fai ai ‘ene kapusi tēvolo.#Māt 9.34; 10.25
23Pea ne ui ange kinautolu, ‘o ne lea ki ai ‘i he ngaahi fakatātā, ‘o pehē, He ‘e lava fēfē ke kapusi ‘e Sētane ‘a Sētane? 24Ka ko ha pule‘anga, kapau ‘e mavahevahe mo fetu‘usi, ‘e ‘ikai fa‘a tu‘u ‘a e pule‘anga ko ia. 25Pea ka ko ha ‘api, kapau ‘e mavahevahe mo fetu‘usi, ‘e ‘ikai lava ‘e he ‘api ko ia ke tu‘u. 26Pea kapau ‘e tu‘u ‘e Sētane kiate ia, ‘o mavahevahe, ‘e ‘ikai te ne lava ke tu‘u, ka kuo pau ke ngata.
27Pea tala‘ehai ‘e lava ‘e ha taha ke hū ki he fale ‘o ha to‘a, ‘o vete ‘ene koloa; kae‘oua mu‘a ke ne ha‘i ‘a e to‘a, pea ne toki lava ke vete hono fale.
28Ko au ē, ‘oku ou tala atu, ‘e fakamolemole ki he hako ‘o e tangata ‘a e angahala kotoa pē, pea mo e ngaahi lau kovi te nau ‘ai ki he ‘Otua:#3.28 pea mo e… ‘Otuá; pe pea mo e… lau‘ikovi. 29ka ko eni pē, ‘ilonga ‘a ia te ne lau kovi ki he Laumālie Mā‘oni‘oni, ‘oku ‘ikai hano fakamolemole ‘o lauikuonga, ka te ne mo‘ua ‘i ha angahala ta‘engata.#Luk 12.10 30Ko hono ‘uhinga, ko ‘enau fa‘a lau, ‘oku ‘iate ia ha fa‘ahikehe.
Ko e Fa‘ē mo e Fanga Tokoua ‘o Sīsuú
(Māt 12.46-50; Luk 8.19-21)
31Pea ha‘u ‘ene fa‘ē mo hono ngaahi tokoua, pea nau tutu‘u ‘i tu‘a, ‘o nau fekau ange ke ui ia. 32Pea na‘e nofo ha fu‘u kakai, ‘o kāpui ia, pea nau pehē kiate ia, ‘Ē, ko ho‘o fa‘ē mo ho ngaahi tokoua ‘oku tutu‘u mei tu‘a, ‘oku nau fiema‘u koe.
33Ka ka tali ‘e ia kiate kinautolu, ‘o pehē, Ko hai ia ‘eku fa‘ē, pe ko hoku ngaahi tokoua? 34Pea sio takai ia kiate kinautolu na‘e nofo ‘o kāpui ia, ‘o ne pehē, Ko eni ia ‘a ‘eku fa‘ē mo hoku ngaahi tokoua! 35Ko ia te ne fai ‘a e ngaahi tu‘utu‘uni ‘a e ‘Otua, ko ia ia ‘a hoku tokoua mo hoku tuofefine mo ‘eku fa‘ē.
Currently Selected:
Ma‘aké 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
