Mātiú 19

Ko e Vete Mali

(Ma‘ake 10.1-12)

1PEA kuo hili ‘a e ngaahi lea ko ia ‘a Sīsū, na‘a ne hiki mei Kāleli, ‘o ne a‘u ki he tafa‘aki fonua ‘o Siutea ‘i Tu‘a Soatani; 2pea na‘e muimui kiate ia ha ngaahi fu‘u kakai lahi, pea na‘a ne fakamo‘ui kinautolu ‘i he potu ko ia.

3Pea ha‘u ki ai ha kau Fālesi ke ‘ahi‘ahi‘i ia, ‘o nau pehē, ‘oku ngofua koā ke tukuange hoto uaifi ‘i ha me‘a pē?

4Pea tali ‘e ia, ‘o ne pehē, Ne ‘ikai te mou lau koā, Ko ia na‘a ne ngaohi ‘a e kakai ‘i he kamata‘anga na‘a ne ngaohi tangata mo fefine kinautolu?#Sēn 1.27; 5.2 5mo ne folofola, Ko e me‘a ko ia ‘e tuku ai ‘e ha tangata ‘ene tamai mo ‘ene fa‘ē, ka ne pīkitai ki hono uaifi; pea ‘e hoko ‘a e toko ua ko e kakano pē taha? 6Tā ‘oku ‘ikai te na kei ua, ka ko e kakano pē taha. ‘Āua; pea ko e me‘a kuo fakahoko ‘e he ‘Otua, ke ‘oua na‘a fakamāvae ‘e ha tangata.

7Pea nau pehē ki ai, Ka ko ia, pea ko e hā na‘e tu‘utu‘uni ai ‘e Mōsese ke ‘ange ha tohi vete, ‘o tukuange?#Teu 24.1-4; Māt 5.31

8Pea pehē ‘e ia kiate kinautolu, Ko e me‘a ‘i he fefeka ‘o ho‘omou anga, ko ia na‘e fakangofua ai ‘e Mōsese ke mou tukuange homou ngaahi uaifi: ka na‘e ‘ikai ke pehe‘i he kamata‘anga. 9Ka ‘oku ou tala atu, ka ai ha taha te ne li‘aki hono uaifi, ‘o ‘ikai ‘i ha‘ane fe‘auaki, pea ne toki mali mo ha fefine kehe, ‘oku ne fe‘auaki: pea ko ia te ne mali mo ia kuo li‘aki ‘oku ne tono fefine.#Māt 5.32; 1 Kol 7.10-11

10Pea lau ‘e he‘ene kau ako kiate ia, Kapau ko hono anga ia ‘o e tangata mo hono uaifi, tā ‘oku lelei ke ‘oua ‘e mali.

11Ka ka pehē ‘e ia kiate kinautolu, ‘E ‘ikai tali ‘a e me‘a ko ia ‘e he kakai kotoa pē, ngata pē ‘iate kinautolu kuo tuku ki ai. 12He ‘oku ‘i ai ‘a e fa‘ahinga ‘iunoke ‘oku tupu pehē mei he manava ‘o ‘enau fa‘ē; pea ‘oku ‘i ai ‘a e fa‘ahinga ‘iunoke kuo feia ‘e ha kakai: pea ‘oku ‘i ai ‘a e fa‘ahinga ‘iunoke kuo nau ngaohi kinautolu ke pehē, koe‘uhi ko e Pule‘anga ‘o Hēvani. Ko ia ‘oku ne mafai ke tali, ke ne tali.

Ko e Tāpuaki‘i ‘e Sīsū ha Fānau Iiki

(Ma‘ake 10.13-16; Luk 18.15-17)

13Na‘e toki ‘omi kiate ia ha kau tamaiki ke ne hilifaki hono nima ki ai, mo lotua: ka na‘e lolomi ‘a e kakai ‘e he kau ako. 14Ka ka pehē ‘e Sīsū, Tuku pē ‘a e tamaiki, pea ‘oua ‘e ta‘ofi ‘enau ha‘u kiate au; he ‘oku ma‘a e fa‘ahinga ko ia ‘a e Pule‘anga ‘o Hēvani.

15Pea ne hilifaki hono nima kiate kinautolu, ‘o ne ‘alu mei he potu ko ia.

Ko e Talavou Koloa‘ia

(Ma‘ake 10.17-31; Luk 18.18-30)

16Pea ‘iloange na‘e ha‘u kiate ia ha toko taha, ‘o ne pehē, Tangata‘eiki, ko e hā ha ngāue lelei ke u fai, ka u ma‘u ai ‘a e mo‘ui ta‘engata?

17Pea tali ‘e ia, ko e hā ‘oku ke ‘eke ai kiate au ‘i he lelei? ‘Oku Toko Taha pē ‘a e lelei: ka ‘o kapau ko ho loto ke ke hū ki he mo‘ui, pea ke ke tauhi ‘a e ngaahi fekau.

18Pea pehē ‘e ia, ‘a e fē fua?.#‘Eki 20.13-16; Teu 5.17-20 Pea pehē ‘e Sīsū, ‘A ‘eni, ‘E ‘ikai te ke fakapō, ‘E ‘ikai te ke fe‘auaki, ‘E ‘ikai te ke kaiha‘a, ‘E ‘ikai te ke tukuaki.

19Faka‘apa‘apa ki ho‘o tamai mo ho‘o fa‘ē: pea, Te ke ‘ofa ki ho kaungā‘api ‘o hangē pē ko ho‘o ‘ofa kiate koe.#‘Eki 20.12; Teu 5.16; Lev 19.18

20Pea lea ‘e he talavou kiate ia, Kuo u tauhi kotoa ‘a e ngaahi lao ko ia: ko e hā ‘aku ‘oku kei toe ke fai?

21Pea lea ‘a Sīsū ki ai, Kapau ko ho loto ke ke haohaoa, mole pē ‘o fakatau atu ho‘o nga‘oto‘ota, pea foaki hono pa‘anga ki he masiva, pea ‘e ai ha koloa ‘e fa‘oaki ma‘au ‘i Hēvani: pea ke ha‘u ‘o kau ‘i hoku lahi.

22Pea ‘i he fanongo ‘a e talavou ki he lea ko ia na‘a ne foki kuo mamahi: he ko e toko taha ia na‘e ma‘u me‘a lahi.

23Pea pehē ‘e Sīsū ki he‘ene kau ako, Ko au ē, ‘oku ou tala atu, ‘E faingata‘a ‘a e hū ‘a ha koloa‘ia ki he Pule‘anga ‘o Hēvani. 24‘Io, ‘oku ou toe lea atu, ‘oku faingofua ke hū ha kāmeli ‘i ha ava‘i hui tuitui, ‘i he hū ‘a ha koloa‘ia ki he Pule‘anga ‘o Hēvani.

25Pea ‘i he fanongo ki ai ‘a e kau ako na‘a nau fu‘u ‘oho, ‘o nau pehē, Ko hai ai tū ‘e ala mo‘ui?

26Pea siofia kinautolu ‘e Sīsū, ‘o ne pehē ange, ‘I he vakai ‘a e tangata ko e me‘a ia ‘e ‘ikai lava; ka ki he ‘Otua ‘oku malava ‘a e me‘a kotoa pē.

27Toki tali ‘e Pita, ‘o ne pehē ki ai; Vakai, ko kimautolu kuo mau li‘aki ‘a e me‘a kotoa pē, ‘o mau muimui kiate koe: ko e hā ai ha me‘a te mau ma‘u?

28Pea pehē ‘e Sīsū kiate kinautolu, Ko au ē, ‘oku ou tala atu, Ka hoko ‘a e Fakatupu fo‘ou, pea nofo ‘a e Fanautama ‘a Tangata ‘i hono taloni lāngilangi‘ia, pea ko kimoutolu kuo mou muimui ‘iate au ‘e fakanofo kimoutolu foki ki ha taloni ‘e hongofulu mā ua, ‘o mou fakamaau ‘a e matakali ‘e hongofulu mā ua ‘o ‘Isileli.#Māt 25.31; Luk 22.30 29‘Io, ‘ilonga ha taha kuo ne li‘aki ha ngaahi tokoua, pe ha ngaahi tuofāfine, pe ha tamai, pe ha fa‘ē, pe ha fānau, pe ha ngaahi tōkanga ngoue, pe ha ngaahi fale, koe‘uhi ā ko hoku hingoa, te ne toe ma‘u ‘o lōlahi, pea ‘e tō mo‘ona foki ‘a e mo‘ui ta‘engata. 30Ka ko e tokolahi ‘oku mu‘omu‘a te nau muimui; pea ko e tokolahi ‘oku muimui te nau mu‘omu‘a.#Māt 20.16; Luk 13.30

Currently Selected:

Mātiú 19: TMB

Highlight

Compare

Copy