Mātiú 18
18
Ko Hai ‘Oku Lahí
(Ma‘ake 9.33-37; Luk 9.46-48)
1KO E feitu‘ula‘ā ko ia na‘e ‘unu‘unu atu ‘a e kau ako kia Sīsū, mo nau pehē, pea ko hai nai ‘e lahi ‘i he Pule‘anga ‘o Hēvani?#Luk 22.24
2Pea ne ui ange ha tamasi‘i, ‘o ne tuku ia ‘i honau lotolotonga, 3‘O ne pehē, Ko au ē, ‘oku ou tala atu, Kapau ‘e ‘ikai te mou liliu, ‘o hoko ‘o hangē ko e tamaiki, ‘e ‘ikai ‘aupito te mou hū ki he Pule‘anga ‘o Hēvani.#Ma‘ake 10.15; Luk 18.17 4Ko ia, ‘ilonga ‘a ia te ne fakavaivai‘i ia ‘o hangē ko e tamasi‘i ko eni, ko ia ia ‘oku lahi ‘i he Pule‘anga ‘o Hēvani. 5Pea ka ai ha taha ‘oku ne tali ha tamasi‘i peheni ‘e toko taha, koe‘uhi ko hoku hingoa, ‘oku ne tali au.
Ko e Tupu‘anga ‘o e Angahalá
(Ma‘ake 9.42-48; Luk 17.1-2)
6Pea ka ai ha tangata te ne fakatūkia ha taha ‘i si‘i tamaiki ni ‘oku tui kiate au, ‘e oli ange ki he tangata ko ia ‘oka ne tautau ha fu‘u maka fale ‘i hono kia, ‘o lōmaki‘i ‘i he moana hauhau. 7‘Oiauē ‘a māmani koe‘uhi ko e ngaahi tūkia‘anga! he kuo pau ke hoko ‘a e ngaahi tūkia‘anga; ka ‘oiauē ‘a e tangata ko ia ‘a ia ‘oku hoko ai ‘a e tūkia‘anga!
8Pea ka ‘oku fakatūkia koe ‘e ho nima, pe ko ho va‘e, tu‘usi, pea li‘aki atu: ‘oku ngutuhua ange ke ke a‘u ki he mo‘ui nima taha pe ve‘e taha, ‘i he lī koe nima ua pe ve‘e ua ki he afi ta‘engata.#Māt 5.30 9Pea ka ‘oku fakatūkia koe ‘e ho mata, kape‘i ia, ‘o li‘aki atu: ‘oku ngutuhua ange ha‘o a‘u mata taha ki he mo‘ui, ‘I ho lī mata ua ki he afi ‘o Heli.#Māt 5.29
Ko e Sipi na‘e Hē
(Luk 15.3-7)
10Vakai ke ‘oua te mou fakasīkaka‘i ha taha ‘i he fa‘ahinga iiki ni; he ‘oku ou tala atu, ko honau kau ‘āngelo ‘i he langi ‘oku nau fakafe‘ao ma‘u pē ki he‘eku Tamai ‘oku ‘i Hēvani. 11He kuo ha‘u ‘a e Fanautama ‘a Tangata ke fakamo‘ui ‘a ia na‘e mole.#18.11 ‘Oku ‘ikai ke ‘asi ‘a e vēsí ni ‘i he ngaahi hiki fuoloa ‘e ni‘ihi. (vakai kia Luk 19.10). 12Ko e hā ho‘omou poa? Ka ne ma‘u ‘e ha tangata ha sipi ‘e teau, pea hē hanau taha, ‘ikai te ne tuku ‘a e toko hivangofulu mā hiva ‘i he mo‘unga, ka ka ‘alu ke kumi ‘a ia kuo hē?
13Pea kapau ‘e faifai pea ne ‘ilo ia, ko au ē, ‘oku ou tala atu, ‘oku ‘ange‘ange ‘ene fiefia ‘i he hivangofulu mā hiva na‘e ‘ikai hē ‘i he fo‘i sipi ko ia. 14Pehē, ‘oku ‘ikai ko e tu‘utu‘uni ‘a ho‘omou#18.14 ho‘omou; ‘Oku pehē ‘i hono ngaahi hiki fuoloa ‘e ni‘ihi: ‘eku. Tamai ‘oku ‘i Hēvani ke mole ha toko taha ‘i he fanga ki‘i sipi ni.
Ka Faihala Atu ho Kāinga
(Luk 17.3)
15Pea kapau ‘e fai hala#18.15 fai hala: ‘Oku pehē ‘i hono ngaahi hiki fuoloa ‘e ni‘ihi: fai hala kiate koe. ‘e ho tokoua, mole pē koe ‘o fakamahino kiate ia, fakaekimoua pē: kapau te ne tokanga kiate koe, kuo ke ma‘u mai ho tokoua.#Luk 17.3 16Ka ‘oka ‘ikai te ne tokanga, ke ke toe ‘alu mo koe ha toko taha, pe ha toko ua, koe‘uhi ke fakapapau ‘a e ngaahi me‘a mei he fakamo‘oni ‘a ha toko ua, pe toko tolu.#Teu 19.15 17Pea kapau te ne ta‘etoka‘i kinautolu, tala ki he Fakataha: pea kapau te ne ta‘etoka‘i mo e Fakataha foki, pea ke ne tatau kiate koe mo ha Senitaile, pe ko ha pōpilikane.
Ko e Me‘a ‘Oku Ngofua mo e Me‘a ‘oku Tapu
18Ko au ē, ‘oku ou tala atu, ‘Ilonga ha me‘a te mou tapui ‘i māmani kuo tapui ‘i langi: pea ‘ilonga ha me‘a te mou fakangofua ‘i māmani kuo fakangofua ‘i langi.#Māt 16.19; Sioné 20.23
19Mo ‘eni foki ‘oku ou tala atu, Ka ai ha toko ua ‘iate kimoutolu ‘i māmani te na loto taha ‘i ha me‘a pē te na kole ki ai, ‘e fai pē ma‘anaua ‘e he‘eku Tamai ‘oku ‘i Hēvani. 20He ko e potu kuo fakataha ai ha toko ua pe ha toko tolu ki hoku hingoa, ‘oku ou ‘i he potu ko ia au ‘i honau lotolotonga.
Ko e Tamaio‘eiki Loto Fefeka
21Na‘e toki ‘unu‘unu atu ‘a Pita, ‘o ne pehē kiate ia, ‘Eiki, ‘e tu‘o fiha ‘a e fai hala ‘a hoto tokoua kia kita, ka te fakamolemole pē? ‘O tu‘o fitu ‘apē?#Luk 17.3-4
22Tali pē ‘e Sīsū, ‘oku ‘ikai te u pehē kiate koe, ‘o tu‘o fitu: ka, ‘o tu‘o fitu liunga ‘aki ‘a e fitungofulu.#18.22 fitu… fitungofulu; pe fitungofulu mā fitu.#Sēn 4.24 23Ko ia, kuo hoko ‘o tatau ‘a e Pule‘anga ‘o Hēvani pea mo ha tangata, ko ha tu‘i, ‘a ia na‘a ne finangalo ke sivi ‘ene kau tamaio‘eiki. 24Pea ‘i he‘ene kamata ‘a e sivi, na‘e ‘omi kiate ia ha toko taha na‘e mo‘ua ki he taleniti ‘e mano. 25Pea ‘i he ‘ikai ha‘ane me‘a ke totongi ‘aki, na‘e fekau ‘e he‘ene ‘eiki ke fakatau tuki, ‘a ia, mo hono uaifi, mo e fānau, mo ‘ene me‘a kotoa, ke totongi ‘aki. 26Ka ka tōmape‘e ‘a e tamaio‘eiki ‘o hū kiate ia, ‘o ne pehē, Ke ke fakatotoka mai, pea te u totongi kotoa. 27Pea manava‘ofa ai ‘a e ‘eiki ‘a e tamaio‘eiki ko ia, ‘o ne tukuange ia, mo ne fakamolemole hono mo‘ua.
28Ka ‘i he ‘alu atu ‘a e tamaio‘eiki ko ia, na‘a ne ‘ilo ha taha na‘e ‘i he kau ngāue mo ia; pea ko e toko taha ia na‘e mo‘ua kiate ia ko e tēnali ‘e teau: pea ne puke ia ‘o sisina hono kia, ‘o ne pehē, Kapau kuo ke mo‘ua, totongi. 29Ka ka tōmape‘e ‘a e toko taha ko ia na‘a na kaungā ngāue, ‘o ne kole kiate ia ‘o pehē, Ke ke fakatotoka mai, pea te u totongi kiate koe. 30Ka na‘e ‘ikai te ne tali ‘ene kole: ka ka ‘alu mei ai, ‘o ne lī ki he pilīsone ‘a e tangata kae‘oua ke ne totongi ‘a e me‘a ‘oku ne mo‘ua ki ai. 31Ka ko kinautolu na‘a nau kaungā ngāue, ‘i he‘enau vakai ‘a e me‘a kuo fai, na‘a nau mamahi ‘aupito, ‘o nau ‘alu ‘o fakamatala ki he‘enau ‘eiki ‘a e me‘a kotoa kuo fai. 32Toki ui ange ‘a e tangata ‘e he‘ene ‘eiki, ‘o ne pehē ki ai, ‘a e tamaio‘eiki angakovi, na‘a ku fakamolemole koe ‘a e fu‘u mo‘ua ko ia kotoa ‘i ho‘o kole mai: 33‘ikai na‘e mei totonu ha‘o ‘ofa mo koe kiate ia ‘oku mo kaungā ngāue, ‘o hangē ko ‘eku ‘ofa ‘aku kiate koe? 34Pea tuputāmaki ‘a ‘ene ‘eiki, ‘o ne tukuange ia ki he kau fakamamahi, kae‘oua ke ne totongi ‘a e me‘a kotoa na‘a ne mo‘ua ki ai.
35‘E pehē foki mo e fai ‘a ‘eku Tamai fakalangi kiate kimoutolu, ‘o kapau ‘e ‘ikai te mou fakamolemole takitaha hono tokoua, ‘o fai‘aki homou loto.
Currently Selected:
Mātiú 18: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
