Mātiú 20
20
Ko e Kau Ngāue he Ngoue Kālepi
1HE ko e Pule‘anga ‘o Hēvani ‘oku tatau mo ha tangata‘eiki, ‘a ia na‘a ne ‘alu atu hengihengi pē ke unga ha ni‘ihi ke ngāue ‘i he‘ene ngoue vaine. 2Pea ne alea mo ha kau ngāue, ko e fo‘i tēnali ki he ‘aho, ‘o ne fekau atu kinautolu ki he‘ene ngoue vaine. 3Pea ne ‘alu atu ‘i hono tolu ‘o e houa, ‘o ne ‘ilo ha ni‘ihi ‘oku nau tutu‘u noa pē ‘i he mala‘e fakatau, 4pea ne pehē kiate kinautolu, ‘Alu mo kimoutolu ki he ngoue vaine, pea te u ‘atu kiate kimoutolu hono taau, pea nau ‘alu. 5Pea toe ‘alu atu ia, ‘o fe‘unga mo hono ono mo hono hiva ‘o e houa, ‘o ne fai pehē foki. 6Pea fe‘unga mo hono hongofulu mā taha ‘o e houa na‘a ne ‘alu, pea tā na‘e ‘i ai mo ha ni‘ihi ‘oku tutu‘u pē; pea ne pehē kiate kinautolu, Ko ho‘omou ‘aho kātoa ē mo e tutu‘u noa ai pē, koe‘uma‘ā? 7Pea nau pehē kiate ia, Koe‘uhi ko e ‘ikai ha taha te ne fie unga kimautolu,
Pea pehē ange ‘e ia, Mole pē mo kimoutolu ki he ngoue vaine.
8Pea ‘i he‘ene efiafi leva, na‘e pehē ‘e he ‘eiki ‘o e ngoue vaine ki he‘ene mu‘a, Ui ‘a e kau ngāue, ‘o tufa ‘enau totongi, ‘o kamata mei he muimui mai ‘o fai atu ki he mu‘omu‘a mai.#Lev 19.13; Teu 24.15 9Pea ha‘u ‘a kinautolu na‘e unga fe‘unga mo e hongofulu mā taha ‘o e houa, ‘o nau takitaha ma‘u ha fo‘i tēnali. 10Pea ‘i he ha‘u ‘a kinautolu na‘e tomu‘a unga, na‘a nau ‘amanaki ‘e lahi ange ha‘anautolu: ka ko kinautolu foki na‘a nau ma‘u takitaha ha fo‘i tēnali. 11Pea ‘i he‘enau to‘o ia, na‘a nau lāunga ki he tangata‘eiki he‘enau pehē, 12‘Ā, ko e kau siana na‘e muimui mai ko e fo‘i houa pē taha ‘enau ngāue, pea ko eni kuo ke fakatatau kinautolu kiate kimautolu, ‘a ia kuo mau fua ‘a e mamafa ‘o e ngāue, pea fetakai mo e pupuha ‘o e ‘aho. 13Ka ka tali pē ‘e ia, ‘o ne pehē ki ha taha ‘o e kau ngāue ko ia, Siana, he ‘oku ou kākaa‘i koe? ‘ikai na‘a ta alea ke fo‘i tēnali pē? 14To‘o pē ho‘o me‘a na ‘o ‘alu: ko e ‘ange ki he muimui mai ni ‘o tatau mo koe ko ‘eku fa‘iteliha pē. 15Na‘a ‘oku ‘ikai ngofua koā ‘eku fa‘iteliha ki he‘eku me‘a ‘a‘aku, ‘ō? Pe na‘a ‘oku ke mata meheka koe‘uhi ko ‘eku ‘ofa.
16Pehē foki, ‘e ai ha ni‘ihi muimui te nau mu‘omu‘a, mo ha ni‘ihi mu‘omu‘a te nau muimui.#Māt 19.30; Ma‘ake 10.31; Luk 13.30
Ko e Toe Lea ‘a Sīsū ki He‘ene Pekiá
(Ma‘ake 10.32-34; Luk 18.31-34)
17Pea ‘i he ‘alu hake ‘a Sīsū ki Selusalema, na‘a ne ‘ave ‘a e kau Hongofulumāua fakaekinautolu; pea ‘i he‘enau ‘i he hala na‘a ne pehē ange, 18Ko eni ‘oku tau ‘alu ki Selusalema; pea ‘e tuku atu ‘a e Fanautama ‘a Tangata ki he hou‘eiki taula‘eiki mo e kau sikalaipe; pea te nau fakamāumatea ia; 19pea te nau tuku atu ia ki he kau Senitaile ke nau taukaea ia, mo haha, mo kalusefai; pea ‘i hono tolu ‘o e ‘aho ‘e fokotu‘u ia.
Ko e Kole ‘a ha Fa‘ē
(Ma‘ake 10.35-45)
20Pea na‘e toki ‘unu‘unu kiate ia ‘a e fa‘ē ‘a e ongo foha ‘o Sēpeti, pea ha‘u mo ia ‘ene ongo tama, ‘o ne tū‘ulutui, ‘o kole ha me‘a meiate ia.
21Pea pehē ‘e ia ki he fefine, Ko e hā ‘a e me‘a ‘oku ke holi ki ai? Pea ne lea atu, Ke ke folofola mai ke nofo ‘a e ongo siana ni, ko ‘eku ongo tama, ko e taha ‘i ho to‘omata‘u, mo e taha ‘i ho to‘ohema, ‘i ha‘o ‘afio ho pule‘anga.
22Ka ka tali ‘e Sīsū, ‘o ne pehē, ‘oku ‘ikai te mo ‘ilo ‘a e me‘a ‘oku mo kole ki ai. He te mo lava koā ke inu ‘i he ipu ‘oku ou teu inu ai?
Pea na pehē ki ai, Te ma lava pē.
23Pea pehē ‘e ia kiate kinaua, Ko e me‘a ki he‘eku ipu, te mo inu ai: ka ko e me‘a ki he nofo ki hoku to‘omata‘u mo hoku to‘ohema, ‘oku ‘ikai ‘a‘aku ke ‘atu ia, ka kiate kinautolu pē kuo teuteu ia ki ai ‘e he‘eku Tamai.
24Ka ‘i he fanongo ki ai ‘a e toko hongofulu na‘a nau ‘ita ‘i he tautehina. 25Ka ka ui ange kinautolu ‘e Sīsū, ‘o ne pehē, ‘Oku mou ‘ilo pē, ko kinautolu ‘oku pule ki he Senitaile ‘oku nau fakafie‘eiki ki he kakai, pea ko honau kau mā‘olunga ‘oku nau fakamo‘ulaloa‘i ‘a e kakai.#Luk 22.25-26 26Ka ‘e ‘ikai pehē ‘iate kimoutolu: ka ko ia ‘oku ne holi ke hoko ko e lahi ‘iate kimoutolu te ne nofo ko homou sevāniti;#Māt 23.11; Ma‘ake 9.35; Luk 22.26 27pea ko ia ‘oku ne holi ke tu‘ukimu‘a ‘iate kimoutolu te ne nofo ko ho‘omou tamaio‘eiki: 28‘o hangē foki ko e Fanautama ‘a Tangata na‘e ‘ikai te ne ha‘u ke ma‘u sevāniti, ka ke sevāniti pē ‘e ia, pea ke tuku ‘ene mo‘ui ke huhu‘i ‘aki ha tokolahi, he‘ene fetongi kinautolu.
Ko e Fakamo‘ui ‘e Sīsū ha Ongo Tangata Kui
(Ma‘ake 10.46-52; Luk 18.35-43)
29Pea ‘i he‘enau ‘alu atu mei Selikō, na‘e muimui kiate ia ha fu‘u kakai tokolahi. 30Pea tā ko e ongo kui ‘oku na nofo ‘i he ve‘ehala; pea ‘i he‘ena fanongo ‘oku me‘a ange ‘a Sīsū, na‘a na kalanga ‘o pehē, ‘Alo‘ofa mai, Hako ‘o Tēvita ē!
31Ka ka lolomi kinaua ‘e he kakai ke na fakalongo pē: ka ka ‘āsili ai ‘ena kalanga, ‘Eiki, ‘alo‘ofa mai! Hako ‘o Tēvita ē!
32Pea tu‘u ‘a Sīsū, ‘o lea ange kiate kinaua, ‘o pehē, Ko e hā ‘a e me‘a ‘oku mo holi ke u fai ma‘amoua?
33Pea na pehē ki ai, ‘Eiki, ke faka‘ā homa poko‘i mata ni.
34Pea langa ‘a e fatu ‘o Sīsū ‘i he ‘ofa, ‘o ne alasi hona ngaahi fo‘i mata: pea na ‘ā leva, ‘o na muimui kiate ia.
Currently Selected:
Mātiú 20: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
