Mātiú 17
17
Ko e Hā Fakakehe
(Ma‘ake 9.2-13; Luk 9.28-36)
1PEA hili ‘a e ‘aho ‘e ono, na‘e ‘ave ‘e Sīsū ‘a Pita, mo Sēmisi, pea mo Sione ko e tehina ‘o Sēmisi, pea ne ‘ohake kinautolu ki ha mo‘unga mā‘olunga fakaekinautolu.#2 Pit 1.17-18 2Pea na‘e fakakehe hono anga ‘i honau ‘ao, pea na‘e malama hono fōtunga ‘o hangē ko e la‘ā, pea ko hono ngaahi kofu na‘e hinaekiaki mai ‘o hangē ko e maama. 3Pea tā na‘e hā kiate kinautolu ‘a Mōsese mo ‘Ilaisiā ‘oku nau talanoa mo ia. 4Pea tali ‘e Pita ‘o ne pehē kia Sīsū, ‘Eiki, ‘oku sai ‘etau ‘i heni: kapau ‘oku ke loto ki ai, pea u ngaohi ‘i heni ha fakahekeheke ‘e tolu; ‘o taha mo‘ou, pea taha mo‘o Mōsese, pea taha mo‘o ‘Ilaisiā.
5Pea lolotonga ‘ene kei lea, fakafokifā na‘e fakapūlou kinaua ‘e ha ‘ao maama: pea ‘iloange ko e le‘o mei he ‘ao na‘e folofola mai, ko hoku ‘Alo Pele ‘ena, ‘a ia kuo u hōifua ai; mou fakaongo kiate ia.#Sēn 22.2; Teu 18.15; Saame 2.7; ‘Ais 42.1; Māt 3.17; 12.18; Ma‘ake 1.11; Luk 3.22
6Pea ‘i he fanongo ki ai ‘a e kau ako, na‘a nau mape‘e ki honau mata, ‘o nau manavahē ‘aupito. 7Pea ‘unu‘unu mai ‘a Sīsū ‘o ne ala kiate kinautolu, mo ne pehē, Tu‘u, pea ‘oua ‘e manavahē. 8Pea ‘i he‘enau hanga hake ke vakai, na‘e ‘ikai te nau sio ki ha taha, Ka ko Sīsū pē.
9Pea ‘i he‘enau ō hifo mei he mo‘unga, na‘e fonosi kinautolu ‘e Sīsū, ‘o pehē, ‘oua na‘a mou tala ki ha taha ‘a e me‘a kuo hā, kae‘oua ke tu‘u mei he mate ‘a e Fanautama ‘a Tangata.
10Pea fehu‘i kiate ia ‘e he‘ene kau ako, ‘o pehē, Pea ko e hā ai ‘oku lau ‘e he kau sikalaipe, kuo pau ke motu‘a ha‘u ‘a ‘Ilaisiā?#Mal 4.5
11Pea ne tali ‘o pehē, Mo‘oni pē ‘a e pehē, ‘Oku ha‘u ‘a ‘Ilaisiā, pea te ne toe fokotu‘u ‘a e ngaahi me‘a. 12Ka ‘oku ou tala atu, kuo ha‘u ‘a ‘Ilaisiā, pea na‘e ‘ikai te nau ‘ilo ko ia, ka na‘a nau fai ho‘onautolu loto kiate ia. Pehē foki ‘a e Fanautama ‘a Tangata, ‘oku nānāfaki hono fakamamahi‘i ‘iate kinautolu.#Māt 11.14
13Toki e‘a ki he kau ako, tā ko Sione Papitaiso ‘oku kau ki ai ‘ene lea.
Ko e Fakamo‘ui ‘e Sīsū ha Tamasi‘i na‘e Mahaki Moa
(Ma‘ake 9.14-29; Luk 9.37-43a)
14Pea ‘i he‘enau ha‘u ki he kakai, na‘e ‘unu‘unu kiate ia ha tangata, ‘o ne tō hifo ‘o puke hono tui, 15‘o ne pehē, ‘Eiki, ‘alo‘ofa ki hoku ‘uhiki: he ‘oku puke fakataimi, pea kovi ‘ene puke; he kuo tu‘o lahi ‘ene tō ki he afi, pea tu‘o lahi ‘ene tō ki he vai. 16Pea na‘a ku ‘omi ia ki ho‘o kau ako, ka na‘e ‘ikai te nau lava ke fakamo‘ui ia.
17Ka ka tali ‘e Sīsū ‘o ne pehē, ‘A e fa‘ahinga ta‘etui mo angakehe, ‘e ngata ‘afē ‘eku ‘iate kimoutolu? ‘E ngata ‘afē ‘eku kātaki‘i kimoutolu? ‘omi ia ki heni kiate au. 18Pea na‘e lolomi ‘e Sīsū ‘a e tēvolo, pea na‘a ne mahu‘i mei he tama, ‘o ne mo‘ui mei he feitu‘ula‘ā ko ia.
19Pea toki ha‘u ‘a e kau ako kia Sīsū ‘i he‘enau fakaekinautolu, ‘o nau pehē, Koe‘uhi ko e hā nai, ne ‘ikai lava ai ‘e kimautolu ke kapusi ia?
20Pea ne pehē kiate kinautolu, Koe‘uhi pē ko ho‘omou tui vaivai: he ko au ē, ‘oku ou tala atu ka, ne ai ha‘amou tui, ‘o tatau mo ha fo‘i tenga‘i mūsita hono lahi, te mou pehē ki he mo‘unga ni, Hiki mei heni ki hena; pea ‘e hiki; pea ‘oku ‘ikai ha me‘a ‘e faingata‘a kiate kimoutolu.#Māt 21.21; Ma‘ake 11.23; 1 Kol 13.2 21Neongo ia, ko e fa‘ahinga ni ‘oku ‘ikai lava ke mahu‘i, ka ‘i he lotu pē mo e ‘aukai.#17.21 ‘Oku ‘ikai ke ‘asi ‘a e vēsí ni ‘i he ngaahi hiki fuoloa ‘e ni‘ihi. (vakai kia Ma‘ake 9.29).
Ko e Lau ‘a Sīsū ki He‘ene Pekiá
(Ma‘ake 9.30-32; Luk 9.43-45)
22Pea lolotonga ‘enau fakataha ‘i Kāleli, na‘e lea ‘a Sīsū kiate kinautolu, ‘o pehē, ‘oku nānāfaki ke tukuange ‘a e Fanautama ‘a Tangata ki he nima ‘o e kakai: 23pea te nau tāmate‘i ia, pea ‘i hono ‘aho tolu ‘e toe fokotu‘u ia.
Ko e Totongi Tukuhau Temipale
Pea na‘a nau mamahi ‘aupito.
24Pea ‘i he‘enau a‘u ki Kāpaneume, pea ko kinautolu na‘e tānaki ‘a e tukuhau fakasiasi na‘a nau ‘alu atu kia Pita, ‘o nau pehē, ‘oku fai ‘apē ‘e ho‘omou tangata‘eiki ‘a e tukuhau fakasiasi? Pea pehē ‘e ia, Ko ē.#‘Eki 30.13; 38.26
25Ka ‘i he‘ene hū ki fale na‘e lea leva ki ai ‘e Sīsū, ‘o pehē, Saimone, ko e hā ho‘o poa? Ko e ngaahi tu‘i ‘o māmani ‘oku nau tānaki tute mo e tukuhau meia hai? mei he fale‘alo, pe mei he kakai kehe?
26Pea tali ‘e ia, Mei he kakai kehe pē.
Pea lea ‘a Sīsū ki ai, ‘Āua, pea tā ‘oku ‘ata‘atā ‘a e fale‘alo.
27Ka koe‘uhi ke ‘oua na‘a tau fakatūkia kinautolu, ‘alu koe ki tahi, ‘o lafo ha māta‘u; pea koe ‘uluaki ika ‘e kai, ke ke to‘o ‘o fa‘ai hono ngutu, pea te ke ‘ilo ai ha fo‘i sikeli: to‘o ia ‘o ‘ange kiate kinautolu ma‘aku mo koe.
Currently Selected:
Mātiú 17: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
