Mātiú 13
13
Ko e Faa‘i Kelekele
(Ma‘ake 4.1-9; Luk 8.4-8)
1‘I he ‘aho ko ia na‘e ‘alu atu ‘a Sīsū mei he fale, ‘o ne nofo ‘i matātahi. 2Pea fakataha kiate ia ha ngaahi kakai tokolahi, ko ia na‘a ne heka ia ki ha vaka ‘o nofo ai, kae tu‘u ‘a e fu‘u fakataha ‘i he matā‘one‘one.#Luk 5.1-3 3Pea na‘e lahi ‘ene lea kiate kinautolu ‘i he ngaahi fakatātā, ‘o pehē,
Ko eni, na‘e ‘alu atu ha tangata tūtuu‘i ke tūtuu‘i: 4pea ‘i he‘ene tūtuu‘i, na‘e ngangana ha tenga ni‘ihi ‘i he ve‘ehala, pea puna mai ‘a e fanga manupuna, ‘o nau kai ‘o ‘osi ia. 5Pea ngangana ha tenga ni‘ihi ki he ngaahi potu maka, ‘a ia na‘e ‘ikai ke loko lahi ai ‘a e kelekele: pea tuaiekemo ‘ene ‘oho hake, koe‘uhi na‘e ‘ikai ke matolu ‘a e kelekele: 6ka ‘i he ‘alu hake ‘a e la‘ā ne velehia; pea ko e me‘a ‘i he ‘ikai fai aka ne mate ia. 7Pea ngangana ha tenga ni‘ihi ki he potu ‘akau talatala; pea tupu hake ‘a e ngaahi ‘akau talatala, ‘o kāsia ia. 8Pea ngangana ha tenga ni‘ihi ki he kelekele kuo lelei, pea fua, ‘o taki fuo teau ‘a e ni‘ihi, fuo onongofulu ‘a e ni‘ihi, fuo tolungofulu ‘a e ni‘ihi.
9Ko ia ‘oku telinga, ke ne ongo‘i.
Ko e ‘Uhinga Hono Ngāue‘aki e Ngaahi Talanoa Fakatātaá
(Ma‘ake 4.10-12; Luk 8.9-10)
10Pea ‘unu‘unu atu ‘ene kau ako ‘o nau pehē kiate ia, Ko e hā ‘oku ke lea fakatātā ai kiate kinautolu?
11Pea tali ‘e ia, ‘o ne pehē kiate kinautolu, Koe‘uhi kuo tuku kiate kimoutolu ke ‘ilo ‘a e ngaahi misiteli ‘o e Pule‘anga ‘o Hēvani, ka ko kinautolu ‘oku ‘ikai tuku ki ai. 12He ‘ilonga ‘a ia ‘oku ma‘u ha me‘a, ‘e ‘ange ki ai mo ha me‘a, pea te ne hulu atu: ka ka ‘ilonga ‘a ia ‘oku ‘ikai ke ma‘u, na‘a mo e me‘a ‘oku ne ma‘u ‘e to‘o meiate ia.#Māt 25.29; Ma‘ake 4.25; Luk 8.18; 19.26 13Ko hono ‘uhinga ‘eni ‘o ‘eku lea fakatātā kiate kinautolu, koe‘uhi ‘oku nau mata, ka ‘oku ‘ikai te nau mamata, pea ‘oku nau telinga ka ‘oku ‘ikai te nau fanongo, ‘uma‘ā ha ongo‘i. 14Pea ‘oku fakamo‘oni ‘iate kinautolu ‘a e palofisai ‘a ‘Aisea, ‘a ia ‘oku pehē,#‘Ais 6.9-10 (LXX)
Te mou mātu‘aki fanongo,
Kae ‘ikai ongo‘i;
Pea te mou mātu‘aki sio,
Kae ‘ikai ‘ilo‘i.
15He kuo fangapesi ‘a e loto ‘o e kakai ni,
Pea ongongata‘a honau telinga,
Pea ko honau mata kuo nau tāpuni;
Na‘a ‘iloange te nau sio ‘aki honau mata,
Pea fanongo ‘aki honau telinga,
Pea ‘ilo ‘aki honau loto, ‘o nau tafoki,
Ka u fakamo‘ui ‘a kinautolu.
16Ka ko ho‘omoutolu mata ‘oku monū‘ia, he ‘oku nau mamata, mo homou telinga, he ‘oku nau fanongo.#Luk 10.23-24 17He ko au ē, ‘oku ou tala atu, ‘oku tokolahi ‘a e kau palōfita mo e kakai lotu, na‘a nau faka‘amu ke mamata ki he ngaahi me‘a ‘oku mou sio ki ai, ka na‘e ‘ikai te nau mātā; pea ke fanongo ki he ngaahi me‘a ‘oku mou fanongo ki ai, ka na‘e ‘ikai te nau fanongoa.
Ko e Faka‘uhinga ‘e Sīsū ‘a e Talanoá
(Ma‘ake 4.13-20; Luk 8.11-15)
18Pea mou fanongo mai kimoutolu ki ha fakatātā ‘o e tangata tūtuu‘i. 19‘Ilonga ha taha ‘oku fanongo ki he folofola ‘o e Pule‘anga, kae ‘ikai tau, ‘oku ha‘u ‘a e Fili, ‘o fa‘ao ‘a e me‘a na‘e tō ki hono loto. Ko eni ia na‘e tūtuu‘i ‘i he ve‘ehala. 20Pea ko ia na‘e tūtuu‘i ki he potu maka, ko e toko taha ia ‘oku fanongo ki he folofola, ‘o ne puke fiefia leva ki ai; 21ka ‘oku ‘ikai hano aka ‘iate ia, ka ‘oku fakataimi pē: pea ‘oka hoko ha faingata‘a pe ha fakatanga koe‘uhi ko e folofola, pea tūkia leva. 22Pea ko ia na‘e tūtuu‘i ‘i he potu ‘akau talatala, ko e toko taha ia ‘oku fanongo ki he folofola; pea ko e lotomo‘ua ki māmani, mo e fakahekeheke ‘a koloa, ‘oku kāsia ai ‘a e folofola, pea ne ta‘efua. 23Pea ko ia na‘e tūtuu‘i ki he kelekele kuo lelei, ko e toko taha ia ‘oku fanongo ki he folofola, pea tau: pea ko eni ia ‘oku fua, ‘o fuo teau ‘a e taha, fuo onongofulu ‘a e taha, fuo tolungofulu ‘a e taha.
Ko e Vao mo e Uite
24Ko e fakatātā ‘e taha na‘a ne ‘ai atu kiate kinautolu, ‘o pehē, Kuo hoko ‘o tatau ‘a e Pule‘anga ‘o Hēvani pea mo ha tangata na‘e tūtuu‘i tenga lelei ‘i he‘ene ngoue: 25pea lolotonga na‘e mohe ‘a e kau tangata, na‘e ha‘u hono fili, ‘o ne toe tūtuu‘i ha tea ‘i he ngaahi vahavaha‘i uite, ‘o ne ‘alu. 26Pea kuo tupu hono sino, pea a‘u ki he fua, pea toki hā ai mo e tea. 27Pea ‘unu‘unu atu ‘a e kau pōpula ‘a e tangata‘eiki, ‘o nau pehē kiate ia, ‘Eiki, ‘ikai ko ha tenga lelei ia na‘a ke tūtuu‘i ‘i ho‘o ngoue? Pea mei fē ai ‘a e tea ni? 28Pea tali ‘e ia kiate kinautolu, Ko ha fili pē kuo ne fai ‘eni. Pea nau pehē ki ai, pea ko ho loto ke mau ‘alu ‘o tufi ia? 29Pea tali ‘e ia, ‘oua; na‘a ‘iloange ‘i ho‘omou tufi ‘a e tea, pea mou ta‘aki fakataha mo ia ‘a e uite foki. 30Tuku pē ke na tupu fakataha ‘o a‘u ki he ututa‘u: pea ka hoko ‘a e ututa‘u te u lea ki he kau tu‘usi, ‘Ē, mou tānaki mu‘a ‘a e tea, pea no‘o ‘ū ke tutu: kae fetuku ‘a e uite ki he feleoko ‘o‘oku.
Ko e Fua‘i Mūsita
(Ma‘ake 4.30-32; Luk 13.18-19)
31Ko e fakatātā ‘e taha na‘a ne ‘ai atu kiate kinautolu, ‘o pehē, ‘oku tatau ‘a e Pule‘anga ‘o Hēvani pea mo ha tenga‘i mūsita, ‘a ia na‘e to‘o ‘e ha tangata, ‘o tō ‘i he‘ene ngoue: 32‘a ia ‘oku si‘i ange ‘i he tenga kotoa pē, kae hili ‘ene tupu, ko e lahi ia ‘i he fa‘ahinga mohuku kai, pea ‘oku hoko ko e ‘akau; ko ia ‘oku ha‘u ‘a e fanga manupuna ‘o e ‘atā, ‘o nofo ‘i hono ngaahi va‘a.
Ko e Lēvani
(Luk 13.18-21)
33Ko e fakatātā ‘e taha na‘a ne lea‘aki kiate kinautolu, ‘o pehē, ‘oku tatau ‘a e Pule‘anga ‘o Hēvani mo ha lēvani ‘a ia na‘e to‘o ‘e ha fefine, ‘o tuku fufū ‘i ha tatanga mahoa‘a ‘e tolu, kae‘oua ke fai lēvani hono kotoa.
Ko e ‘Uhinga Hono Ngāue‘aki ‘e Sīsū e Ngaahi Talanoa Fakatātā
(Ma‘ake 4.33-34)
34Ko e ngaahi me‘a ni kotoa na‘e lea‘aki ‘e Sīsū ki he kakai ‘i he fakatātā; pea na‘e ‘ikai te ne lea‘aki ha me‘a kiate kinautolu, 35‘o ta‘eha fakatātā: koe‘uhi ke fakamo‘oni ai ‘a e me‘a na‘e folofola‘aki ‘i he palōfita, ‘o pehē,#Saame 78.2
Te u tangaki hoku ngutu ‘i he ngaahi fakatātā,
Te u ‘a‘au ‘a e ngaahi me‘a ne fufū mei he kamata‘anga.
Ko e Faka‘uhinga‘i ‘e Sīsū ‘a e Talanoa ki he Vao Koví
36Na‘a ne toki tukuange ‘a e kakai, ‘o ne hū ki fale; pea ‘unu‘unu kiate ia ‘e he‘ene kau ako, ‘o nau pehē, Fakamatala mai ‘a e fakatātā ‘o e ngaahi tea ‘i he ngoue.
37Pea ne tali ‘o pehē, Ko ia ‘oku ne tō ‘a e tenga lelei ko e Fanautama ‘a Tangata ia; 38ko e ngoue ko māmani; ko e tenga lelei ko e fānau ‘o e Pule‘anga; ko e ngaahi tea ko e fānau ‘a e Toko Taha Kovi; 39ko e fili na‘a ne tō ia ko e Tēvolo; ko e ututa‘u ko e faka‘osi ‘o ha kuonga; ko e kau tu‘usi ko e kau ‘āngelo. 40Pea hangē ‘oku tānaki ‘a e tea ‘o tutu ‘aki ‘a e afi; ‘e pehē foki ‘i he faka‘osi ‘o e kuonga. 41‘E fekau atu ‘e he Fanautama ‘a Tangata ‘ene kau ‘āngelo, pea te nau tānaki mei hono pule‘anga ‘a e tūkia‘anga kotoa pē, mo kinautolu ‘oku maumau lao; 42pea te nau laku kinautolu ki he fōnise afi. Ko e potu ia ‘e toki hoko ai ‘a e tangi mo e fengai‘itaki ‘o e nifo. 43Kae toki ho‘ata mai ‘a e kau failelei ‘o hangē ko e la‘ā ‘i he pule‘anga ‘o ‘enau Tamai, Ko ia ‘oku telinga, ke ne ongo‘i.
Ko e Tanunga Koloa Fufū
44‘Oku tatau ‘a e Pule‘anga ‘o Hēvani pea mo ha koloa na‘e tanu ‘i ha ngoue: ‘a ia na‘e ‘ilo ki ai ha tangata, ‘o ne fufū, pea ‘i he‘ene fiefia ai ‘oku ne ‘alu ‘o fakatau atu ‘ene me‘a kotoa, kae fakatau ‘aki ‘a e ngoue ko ia.
Ko e Mata‘itofe Mahu‘inga
45‘Oku tatau foki ‘a e Pule‘anga ‘o Hēvani pea mo ha fai fakatau; ‘a ia na‘a ne ‘alu ko e kumi mata‘i tofe lelei: 46pea ‘i he‘ene ‘ilo ki ha taha, ko e mata‘itofe mahu‘inga lahi, na‘a ne ‘alu ‘o fakatau atu ‘a e me‘a kotoa pē na‘a ne ma‘u, ka ne fakatau ‘aki ‘a e mata‘itofe ko ia.
Ko e Kupenga
47‘Oku tatau foki ‘a e Pule‘anga ‘o Hēvani mo ha ūloa ne tō ‘i tahi, ‘o ne ha‘o ‘a e ngaahi fa‘ahinga ika kotoa. 48Pea ‘i he‘ene fonu na‘a nau toho hake ki he matā‘one‘one, ‘o nau nofo hifo ‘o fa‘o kato ‘a e ‘aonga, kae li‘aki ‘a e kovi. 49‘E pehē ‘i he faka‘osi ‘o māmani: ‘e ‘alu atu ‘a e kau ‘āngelo, pea te nau vahe‘i mai ‘a e kakai kovi mei he lotolotonga ‘o e failelei, 50pea te nau laku kinautolu ki he fōnise afi. Ko e potu ia ‘e toki hoko ai ‘a e tangi mo e fengai‘itaki ‘o e nifo.
Ko e Koloa Fo‘oú mo e Koloa Motu‘a
51Kuo mahino kiate kimoutolu ‘a e ngaahi me‘a ni kotoa?
Pea nau tali, Ko ē.
52Pea pehē ‘e ia kiate kinautolu, Ka ko ia; pea ‘ilonga ha akonaki kuo ako ‘i he Pule‘anga ‘o Hēvani, ‘oku hangē ia ko ha tangata matāpule, ‘a ia ‘oku ne laku atu mei hono ‘ai‘anga koloa ‘a e me‘a fo‘ofo‘ou mo e me‘a mu‘a.
Ko e Fakafisinga‘i ‘e he Kakai Nāsaletí ‘a Sīsū
(Ma‘ake 6.1-6; Luk 4.16-30)
53Pea ‘i he faka‘osi ‘e Sīsū ‘a e ngaahi fakatātā ni, na‘a ne hiki mei he potu ko ia; 54pea ‘i he‘ene ha‘u ki hono fonua ‘o‘ona na‘a ne fai ‘ene ako kiate kinautolu ‘i honau falelotu. Pea nau to‘oa ai, ‘o nau pehē, ‘oku mei fē ki he siana ni ‘a ‘ene poto ni, mo ‘ene ngaahi ngāue fakaofo? 55‘Ikai ko e foha ‘eni ‘o e motu‘a tufunga? ‘Ikai ‘oku hingoa ‘ene fa‘ē ko Mele? mo hono ngaahi tokoua, ‘ikai ko Sēmisi mo Siosifa mo Saimone mo Siutasi? 56pea ko hono ngaahi tuofāfine, ‘ikai ‘oku nau felemofafo kotoa pē ‘iate kitautolu? Pea mei fē ai ki he siana ni ‘a e ngaahi fu‘u me‘a pehē? 57Pea nau tūkia ‘iate ia.#Sioné 4.44 Ka ka tali ‘e Sīsū kiate kinautolu, ‘oku ‘ikai masiva faka‘apa‘apa ‘e ha palōfita, ka ‘i hono fonua totonu mo hono fāmili ‘o‘ona.
58Pea na‘e ‘ikai te ne loko fai ai ha ngāue fakaofo, ko e me‘a ‘i he‘enau ta‘etui.
Currently Selected:
Mātiú 13: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
