Mātiú 14
14
Ko e Pekia ‘a Sione Papitaiso
(Ma‘ake 6.14-29; Luk 9.7-9)
1‘I he kuonga ko ia na‘e fanongo ‘e he tu‘i ko Hēlota ki he ongoongo ‘o Sīsū: 2pea ne pehē ki he‘ene kau tamaio‘eiki, Ko Sione Papitaiso ‘eni: kuo tu‘u hake ia mei he mate, pea ko hono ‘uhinga ia ‘o e ngaahi fu‘u mafai ‘oku ngāue ‘iate ia.
3He ne puke ‘e Hēlota ‘a Sione, ‘o ha‘i ia, ‘o ne ‘ave ‘o lī ki he pilīsone, koe‘uhi ko Helotiasi ko e uaifi ‘o hono tokoua.#Luk 3.19-20 4He na‘e fa‘a lau ‘e Sione ki ai, ‘o pehē, ‘oku ‘ikai ngofua kiate koe ke ma‘u ia.#Lev 18.16; 20.21 5Pea neongo na‘a ne loto ke tāmate‘i ia, ka na‘a ne manavahē ki he kakai: he na‘a nau lau ko e palōfita ia.
6Pea ‘i he hoko ‘a e ‘aho fakamanatu ‘o Hēlota, na‘e me‘e ‘a e ta‘ahine ‘a Helotiasi ‘i he ha‘oha‘onga, ‘o mālie‘ia ai ‘a Hēlota. 7Ko ia, na‘a ne fuakava ai mo lea tuki, te ne ‘ange kiate ia ‘a e me‘a te ne kole ki ai, neongo pe ko e hā.
8Pea ‘i hono fakaloto‘i ‘e he‘ene fa‘ē, na‘a ne pehē, ‘Omi kiate au heni ‘i ha peleti ‘a e ‘ulu ‘o Sione Papitaiso.
9Pea neongo na‘e mamahi ‘a e Tu‘i, ka na‘a ne tu‘utu‘uni pē ke ‘ange, telia ‘ene ngaahi lea tuki, mo e kakai na‘e keinanga mo ia. 10Pea ne fekau atu ke tu‘usi ‘a e ‘ulu ‘o Sione ‘i he pilīsone. 11Pea na‘e ‘omi hono ‘ulu ‘i ha peleti, ‘o ‘ange ki he ki‘i fefine: pea ne ‘ave ia ki he‘ene fa‘ē. 12Pea ‘alu atu ‘ene kau ako, ‘o ‘ave ‘a e ‘anga‘anga ‘o tanu: pea nau toki ‘alu ‘o tala kia Sīsū.
Ko e Fafanga ‘o e Toko Nima Afe
(Ma‘ake 6.30-44; Luk 9.10-17; Sioné 6.1-14)
13Pea ‘i he fanongo ki ai ‘a Sīsū na‘a ne ‘alu mei ai ‘i ha vaka ki ha potu lala, ke fakaekinautolu: ka ka fanongo pē ki ai ‘e he ngaahi kakai, ‘o nau hala ‘uta pē mo tulimui ki ai mei he ngaahi kolo. 14Pea ‘i he‘ene hifo ki ‘uta, na‘a ne ‘ilo ai ha fu‘u kakai lahi; pea na‘e langa hono fatu ‘i he ‘ofa kiate kinautolu, pea ne fakamo‘ui ‘enau kau mahaki.
15Pea ‘i he‘ene efiafi hifo, na‘e ‘unu‘unu kiate ia ‘e he‘ene kau ako, ‘o nau pehē, Ko e potu lala ‘eni, pea kuo tei ‘osi ‘a e ‘aho: ko ia ke ke tukuange ‘a e kakai ke nau ‘alu ki he ngaahi vilisi, ‘o fakatau ha‘anau me‘a tokoni.
16Ka ka pehē ‘e Sīsū kiate kinautolu, Koe‘uma‘ā ‘enau ‘alu; ‘ange ‘e kimoutolu ha‘anau me‘akai.
17Pea nau tali ki ai, ‘oku ‘ikai ha‘atau me‘a ‘i heni, ko e fo‘i mā ‘e nima pē mo e mata‘i ika ‘e ua.
18Pea ne pehē, ‘omi ia ki heni kiate au. 19Pea ne tu‘utu‘uni ke tākoto ‘a e kakai ‘i he musie; ‘o ne to‘o ‘a e fo‘i mā ‘e nima mo e ongo ika, ‘o ne tāngaki hake ki he langi, ‘o ne fai ha tāpuaki; pea ne toki pakipaki ‘a e ngaahi fo‘i mā, ‘o ‘ange ki he‘ene kau ako, pea ‘ange ‘e he kau ako ki he kakai. 20Pea nau kai kotoa pē ‘o mākona: pea nau tānaki ‘a e ngaahi mapakipaki‘i mā na‘e toe, pea pito ai ‘a e kato fakahunga ‘e Hongofulumāua. 21Pea ko kinautolu na‘e tokoni, na‘e toko nima afe nai ‘a e tangata, ‘o ta‘elau ai ‘a e fefine mo e tamaiki iiki.
Ko e Hā‘ele ‘a Sīsū ‘i he Fukahi Vai
(Ma‘ake 6.45-52; Sioné 6.15-21)
22Pea ne hanga leva ‘e Sīsū, ‘o fekau fakamālohi ki he kau ako ke fei mo heka ki he vaka, ‘o mu‘omu‘a ‘iate ia ki he kauvai, lolotonga ‘ene tukuange ‘e ia ‘a e kakai. 23Pea hili ‘ene tukuange ‘a e kakai, na‘a ne ‘alu hake ki he mo‘unga fakaeia pē ke lotu: pea ‘i he‘ene efiafi po‘uli na‘a ne ‘i ai toko taha. 24Pea ko e vaka kuo a‘u ki he vaha‘amālie, pea faingata‘a‘ia ‘i he peau, he na‘e tokai ‘a e matangi.
25Pea ‘i hono fā ‘o e uasi ‘i he pō ko ia, na‘e ‘alu atu ‘a Sīsū kiate kinautolu ‘oku ne hā‘ele ‘i he tahi. 26Pea ‘i he sio kiate ia ‘e he kau ako, ‘oku ne hā‘ele ‘i he fukahi tahi, na‘a nau puputu‘u, ‘o nau pehē, Ko e fa‘ahikehe! Pea nau fekekee‘i ko ‘enau manavahē.
27Pea lea leva ‘e Sīsū kiate kinautolu, ‘o pehē, Fiemālie pē: ko au pē: ‘oua ‘e manavahē.
28Pea tali ki ai ‘e Pita ‘o ne pehē, ‘Eiki, kapau ko koe, fekau ke u ‘alu atu ‘i he fukahi vai.
29Pea ne pehē, Ha‘u pē. Pea hifo ‘a Pita mei he vaka, ‘o ne hā‘ele ‘i he fukahi vai ke ‘alu kia Sīsū. 30Ka ‘i he‘ene tokanga ki he mālohi ‘o e matangi na‘a ne ilifia ai; pea ‘i he‘ene kamata fakatoutoumoloto hifo na‘a ne kalanga, ‘Eiki, fakamo‘ui au.
31Pea mafao atu leva ‘e Sīsū hono nima, ‘o puke ia ‘o ne pehē ki ai, ‘a e tui vaivai, ko e hā na‘a ke tāla‘a ai?
32Pea ‘i he‘ena heka ki he vaka na‘e tālolo ‘a e matangi. 33Pea ko kinautolu na‘e ‘i he vaka na‘a nau tū‘ulutui kiate ia, ‘o nau pehē, Tā ko e ‘Alo ‘o e ‘Otua koe.
Ko e Fakamo‘ui Mahaki ‘a Sīsū ‘i Kenesaleti
(Ma‘ake 6.53-56)
34Pea kuo nau ‘i kauvai, na‘a nau a‘u ki he fonua ko Kenesaleti. 35Pea ‘i he vakai ‘e he kau tangata ‘o e potu ko Sīsū ia, na‘a nau fekau atu ki he feitu‘u kotoa ko ia: pea na‘a nau ‘omi kiate ia ‘a kinautolu na‘e puke, 36‘o nau kole kiate ia ke tuku ke nau ki‘i ala pē ki he pao ‘o hono kofu: pea ko kinautolu na‘e ala ki ai na‘a nau mo‘ui ‘aupito.
Currently Selected:
Mātiú 14: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
