KO ‘AISEA 6
6
Ko Hono Ui ‘e he ‘Otuá ‘a ‘Aisea ke ne Hoko ko e Palōfita
1‘I HE ta‘u na‘e pekia ai ‘a Kingi ‘Ūsaia, ne u māta‘i ‘a ‘Ātonai, ‘oku ne ‘afio ‘i ha taloni ‘oku fotu mo mahiki hake, pea ko hono kofu fakapatohotoho na‘e faliki ‘aki ‘a e Temipale.#2 Tu‘i 15.7; 2 Kal 26.23 2Ko ha‘a Selāfimi ē ‘oku taka ‘olunga ‘i ai: ‘oku taki ono honau kapakau; ko e ua na‘a nau fufū ‘aki honau mata, mo e ua na‘a nau fufū ‘aki honau va‘e, pea ko e ua na‘e fai‘aki ‘enau fepunakaki.
3Pea na‘e fetāliaki ‘a ē mo ē ‘o pehē,#Fkhā 4.8
‘A e Tāpuhā! ‘a e Tāpuhā! ‘a e Tāpuhā! ‘a Sihova Sāpaoti!
Ko hono lāngilangi ē ‘a e fonu ‘a māmani kātoa.#6.3 Ko… kātoa; pe Ko hono lāngilangí ē ‘oku opeope ‘i māmani kātoa.
4Pea na‘e fengatāliaki ‘a e ngaahi pou tu‘unga matapā ‘i he longoa‘a ‘a e kau hiva, pea ko e fale na‘e fonu ‘i he kohu.#Fkhā 15.8
5Pea u pehē,
‘Oiauē kita kuo te ‘auha!
He ko e tangata loungutu ta‘ema‘a kita,
Pea ko e kakai loungutu ta‘ema‘a ‘oku te nofo ai:
He ko e Tu‘i ia kuo māta‘i hoku mata ni, ‘a Sihova Sāpaoti!
6Pea na‘e puna mai kiate au ha taha mei he kau Selāfimi, ‘oku ‘i hono nima ha malala‘i afi kuo ne to‘o ‘aki ‘a e hikofi mei he ‘ōlita. 7Pea ne fakapā ki hoku ngutu, ‘o ne pehē; Vakai, kuo pā eni ki ho loungutu; pea kuo ‘ave ho‘o kovi, pea fakalelei ho‘o hia.
8Pea u ongo‘i ‘a e le‘o ‘o ‘Ātonai ‘oku pehē mai, Ko hai te u fekau, ‘io, ko hai ‘e ‘alu ma‘atautolu?
9Pea u tali, Ko au eni; fekau au. Pea ne folofola mai, ‘Alu, ‘o lea ki he kakai na, ‘o pehē, Mou fanongo ai ā, kae ‘ikai ‘atā; pea mou mamata ai ā, kae ‘ikai ‘ilo.#Māt 13.14-15; Ma‘ake 4.12; Luk 8.10; Sioné 12.40; Ngā 28.26-27 10Ngaohi ‘a e loto ‘o e kakai ni ke nge‘enge‘e, pea ngaohi honau telinga ke tutuli, pea ko honau mata ke ke pulusi; na‘a ‘iloange te nau sio ‘aki honau mata, mo ongo‘aki honau telinga, mo ‘ilo ‘aki honau loto, ‘o tafoki, ‘o ai ha faito‘o ‘e fai ki ai.
11Pea u tali, ‘O fēfē hono fuoloa, ‘Ātonai ē? Pea folofola mai ia, Kae‘oua ke lala ‘a e ngaahi kolo, ‘o ‘ikai ha nofo ai; mo e ngaahi fale, kae ‘ikai ha tangata; 12pea ko e kelekele ko e koto maumau hono have‘i; pea kuo ‘ave ‘e he ‘Eiki ‘a e kakai ke mama‘o, pea lahi ‘a e potu li‘aki ‘i loto fonua. 13Pea kapau ‘e toe hano vahehongofulu, ka ‘e toe hoko mo ia ko e koto ‘auha: ‘o hangē ko e ‘oke mo e ‘oke‘oke, ‘a ia ‘oka tā ‘oku ai hono tefito–ko e huli tāpuhā ‘a e tefito ko ia.
Currently Selected:
KO ‘AISEA 6: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
