KO ‘AISEA 5
5
Ko e Hiva ki he Ngoue Vaine
1KA U fai ha hiva ‘oku kau ki hoku ‘ofa‘anga, ‘inē?#Māt 21.33; Ma‘ake 12.1; Luk 20.9
ko e hiva ‘a hoku mamana ‘oku kau ki he‘ene ngoue vaine,
Tokua na‘e ma‘u ‘e hoku ‘ofa‘anga ha ngoue vaine
‘I ha fo‘i tumutumu na‘e kelekele mahu:
2Pea ne huo fakamolū ia,
‘O ne tufi ‘a e maka, ‘o fetuku,
‘O ne tō ai ‘a e vaine fungani,
‘O ne langa ‘i loto ha fale le‘o;
‘Io, na‘a ne tā ‘i he maka foki ha tata‘o‘anga uaine:
‘O ne ‘amanaki ko hono fua ko e kālepi huofaki–
Ka tā ko hono fua ko e kālepi vao.
3Pea ko eni, ‘a e nofo Selusalema mo e tangata Siuta, mou fakamaau mu‘a ‘iate kimaua mo ‘eku ngoue vaine. 4Ko e hā na‘e toe ke fai ki he‘eku ngoue vaine ‘a ia na‘e ‘ikai te u fai? Ko e hā na‘e pehē ai? ‘Amanaki au ki he fua kālepi huofaki, kae fua ‘e ia ko e kālepi vao.
5Pea ko eni, ka u tala mu‘a kiate kimoutolu ‘a e me‘a ‘oku ou teu fai ki he‘eku ngoue vaine: ‘ave hono ‘ā, ‘o tuku ke kaikai ai ‘a e fanga manu: holoki hono ‘ā maka, ‘o tuku ke malakekina.#‘Eki 13.21; 24.16 6Pea te u tuku ke lala: ‘e ‘ikai ‘auhani, pea ‘e ‘ikai ke keli; pea ‘e ‘alu hake ‘a e ‘akau talatala mo e ‘akau veli! pea te u fekau ki he ngaahi ‘ao ke ‘oua te nau toe tuku hifo ha ‘uha ki ai.
7He ko e ngoue vaine ‘a Sihova Sāpaoti ko e fale ‘o ‘Isileli ia, pea ko e tangata Siuta ko ‘ene ma‘ala mamana: pea ‘i he‘ene ‘amanaki ki he fakalao, uoi! ko e faluku pē; na‘a ne ‘amanaki ki he faitotonu, kae uoke! Ko e tangi kaila ē.
8‘Oiauē ‘a kinautolu
‘Oku fakahoko fale atu,
Mo fakahoko konga vao mai;
‘Oku nau nga‘unu atu kae‘oua ke ‘ikai toe ha potu,
Pea ‘Oku mou nofo fakaekimoutolu he loto fonua!
9Ongo ki hoku telinga meia Sihova Sāpaoti, ‘Ilo ‘e au ‘o kapau ‘e ‘ikai hoko ‘ani fale lahi ko e koto ‘āngoa; ko e ngaahi fale lahi mo lelei kae ta‘eha taha ‘oku nofo ai.
10He ko e fua ‘o e ngoue vaine ‘oku hongofulu ‘eka ko e pate pē taha, pea ko e homa pulopula ‘e utu mei ai ha efa pē.
11‘Oiauē ‘a kinautolu
‘Oku tu‘u hengihengi hake
Ko e fakakī kava mālohi;
‘Oku nau lavaki nofo efiafi,
‘O fakamāfana ‘aki kinautolu ‘a e uaine!
12Pea ko honau sō ko e ha‘ape pē mo e helefilo,
Ko e nafa fāngongo pē mo e fangufangu mo e uaine;
Ka ‘oku ‘ikai te nau tokanga‘i ‘a e me‘a ‘oku fai ‘e Sihova,
Pea ko e ngāue ‘a hono nima ‘oku ‘ikai te nau sio ki ai.
13Ko hono ō ia ‘e ‘ave pōpula ‘a hoku kakai ta‘e te nau ‘ilo;#5.13 ta‘e te nau ‘ilo; pe ko e ta‘e te nau ‘ilo. pea ‘e hoko honau kau lāngilangi ko e kau ‘alefa, pea ko hono uōuōtu‘u ‘e hoko ko e kau pakukā he fie inu. 14Ko hono ō ia kuo mafa‘a ‘e Lolofonua ‘ene havala, mo fakaava hono ngutu ta‘ehano fakangatangata: pea ‘oku ‘alu hifo ki ai hono kau lāngilangi, mo hono uōuōtu‘u, mo hono ongoonga‘a, mo ia fua pē ‘oku fiefia ‘i he kolo.
15Pea ko lāuvale ‘e mapelu, pea ‘e fakamo‘ulaloa ‘a hou‘eiki, pea ko e mata ‘o e hīkisia ‘e laea. 16Kae mahiki ‘a Sihova Sāpaoti ‘i he fai fakamaau, pea ko ‘Ela ko e Tāpuhā te ne fakatāpuhaa‘i ia ‘e ia ‘i he faitotonu. 17Toki kaikai ai ‘a e fanga lami hangē ‘oku nau ‘i honau toafa ‘onautolu, pea ko e ngaahi ‘api ‘o e fa‘ahinga nge‘enge‘e, ‘a ia kuo lala, ‘oku fanga sipi ai ‘a e kakai hē fano.#5.17 ‘Oku ‘ikai ke mahino ‘a hono faka-Hepelū ‘o e vēsí ni.
18‘Oiauē ‘a kinautolu
‘Oku nau toho ‘a e kovi ‘aki ‘a e ngaahi maea muna,
Mo toho ‘a e angahala hangē ko e fai‘aki ‘a e leta ‘o e sāliote!
19‘A kinautolu ‘oku nau pehē,
“Ke ne fai to‘oto‘o mu‘a,
Ke ne fakavave ‘ene ngāue
Koe‘uhi ke mau sio ki ai;
‘Io, ke nga‘unu mai mo ha‘u
‘a e me‘a kuo fakakaukau ki ai ‘a e Tāpuhā ‘o ‘Isileli,
Ke mau ‘ilo ia!”
20‘Oiauē ‘a kinautolu
‘Oku lau ‘a e kovi ko e lelei,
Pea ‘oku lau ‘a e lelei ko e kovi;
‘Oku nau tuku ‘a e po‘uli ko e maama,
Mo e maama ko e po‘uli;
‘Oku nau tuku ‘a e kona ko e melie,
Mo e melie ko e kona!
21‘Oiauē ‘a kinautolu
‘Oku poto ‘i he vakai ‘anautolu,
Pea ‘oku fe‘ao ma‘u pē mo kinautolu ‘enau fakapotopoto!
22‘Oiauē ‘a kinautolu
Ko e kau mafi he inu uaine,
Mo e kakai fita he hu‘i kava:
23‘a e fa‘ahinga ‘oku nau fakatonuhia ‘a e pau‘u koe‘uhi ko ha koloa,
‘O fa‘ao mei he faitotonu ‘ene tonuhia!
24Ko ia, hangē ‘oku keina ‘a e veve ‘e he ‘elelo ‘o e afi, ‘o koto ‘a e musie tauaki ‘e he ulo, pehē ‘e hoko honau aka ko e koto popo, pea ‘e ‘oho hake honau fisi hangē ko e efu; koe‘uhi kuo nau fakatale‘i ‘a e lao ‘a Sihova Sāpaoti, pea ko e folofola ‘a e Tāpuhā ‘a ‘Isileli kuo nau manuki ki ai.
25Ko hono ō ia kuo tafunaki ‘a e houhau ‘o Sihova ki hono kakai, pea kuo ne mafao atu hono nima ke tautea ia, pea kuo ne taa‘i ia, pea ‘oku tete ‘a e ngaahi mo‘unga, pea ‘oku tu‘utu‘u holo honau ‘anga‘anga ‘i he ngaahi hala, ‘o hangē ko e ngaahi fokotu‘unga veve ‘i he tafi.
Ka neongo ia kotoa,
Ka ‘oku ‘ikai lolou hono houhau,
Pea ‘oku kei mafao atu hono nima!
26Pea ‘oku ne fokotu‘u ha fuka ki he ngaahi pule‘anga#5.26 ngaahi pule‘anga; Ko hono faka-Hepeluú ia, ka ‘oku ngali tonu ‘a hono hiki ‘o: pule‘anga. mama‘o atu,
Pea ‘oku ne tupulū ki ai ke ha‘u mei he ngaahi ngata‘anga ‘o māmani.
Pea vakai ‘oku ve‘ekimokimo ‘ene ha‘u.
27Koloto ke ‘i ai ha taha ‘oku ongosia, pe ‘oku humu;
‘Oku ‘ikai te nau mohe, pea ‘oku ‘ikai te nau tule;
Pea ‘oku ‘ikai ke kōkō honau no‘o,
Pea ‘oku ‘ikai ke motu ‘a e me‘a tau sū.
28Ko e fa‘ahinga ‘oku māsila ‘enau ngahau,
Pea ko ‘enau kaufana kuo ‘ai uka kotoa;
Pea ko e nge‘esi va‘e ‘o ‘enau fanga hoosi tā ko e makahunu tofu pē,
Pea ko e va‘e ‘o ‘enau sāliote ‘oku hangē ko e ‘ahiohio.
29‘Oku ō mo ia ha ‘u‘ulu hangē ha laione toutama;
‘Oku kālou hangē ni manu hau:
‘Io, ‘oku ne ngulungulu, ‘o ne puke ‘ene ‘a‘alu,
‘O ne ‘ave noa, ‘o ‘ikai ha fakahaofi.
30‘Io, ‘oku ne ngulungulu ki ai ‘i he taimi ko ia
‘O hangē ko e ‘u‘ulu ‘o e tahi:
Pea ka vakai si‘i me‘a ki hono fonua, pea tā ko e po‘uli fakamamahi,
Pea hoko hono maama ko e po‘uli ‘i he ‘ao‘aofia hono langi.#5.30 Ko e potu fihi eni. ‘Oku faikehekehe hono hiki ‘e he kau poto.
Currently Selected:
KO ‘AISEA 5: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
