KO ‘AISEA 7
7
Ko ha Folofola kia ‘Āhasi
1PEA na‘e hoko ‘i he taimi ‘o ‘Āhasi foha ‘o Siotame foha ‘o ‘Ūsaia ko e Tu‘i Siuta, na‘e ‘alu hake ‘a Lēsini ko e Tu‘i Sīlia, mo Peka foha ‘o Lemalaia ko e Tu‘i ‘Isileli, ki Selusalema ke fai tau ki ai; ka na‘e ‘ikai te ne lava ke ikuna ia.#2 Tu‘i 16.5; 2 Kal 28.5-6
2Pea na‘e fakahā ki he Fale ‘o Tēvita, ‘o pehē, Kuo tālolo ‘a Sīlia, ‘o kau mo ‘Ifalemi, Toki ngaue hono loto, mo e loto ‘o hono kakai, ‘o hangē ko e ngaue ‘a e ‘akau ‘o e vao ‘i he falala mai ha matangi.
3Pea folofola ‘a Sihova kia ‘Aisea, Eni, hū ki tua‘ā, ‘a koe mo ho foha ko Sea-sisupi,#7.3 Sea-sisupi; Ko e ‘uhinga ‘o e hingoá ni ‘i he faka-Hepeluú ko e “‘E foaki mai ha tokosi‘i” (vakai ki he 10.20-22). ke fakafetaulaki kia ‘Āhasi, ki he ngata‘anga ‘o e takinga vai ‘o e lepa ‘olunga, ki he hala tanu ‘o e fō kofu. 4Pea ke lea kiate ia ‘o pehē, Tokanga ke nofo nonga; ‘oua te ke manavahē, pea ‘oua na‘a vai ho loto telia ‘a e ongo potu‘i ngau‘aafi kohu na; telia ‘a e ‘ita kakaha ‘a Lēsini mo Sīlia, pea mo e foha ‘o Lemalaia. 5Ko e me‘a ‘i he puleaki‘i koe ‘e Sīlia, ‘Ifalemi, mo e foha ‘o Lemalaia, ‘o pehē,
6“Tau ‘alu hake ki Siuta, ‘o fakahoha‘asi ia;
Pea tau hae atu ma‘atautolu,
Pea tau fokotu‘u ha tu‘i ke tefito ki ai,
‘Io, ‘a e foha ‘o Tapeale.”
7Ko e folofola eni ‘a ‘Ātonai Sihova
‘E ‘ikai tu‘u ia, pea ‘e ‘ikai hoko.
8He ko e ‘ulu ‘o Sīlia ko Tāmasikusi,
Pea ko e ‘ulu ‘o Tāmasikusi ko Lēsini: pea ‘oku kei toe ha ta‘u ‘e onongofulu mā nima, pea laiki ‘a ‘Ifalemi ‘ene nofo ko e kakai:
9Pea ko e ‘ulu ‘o ‘Ifalemi ko Samēlia,
Pea ko e ‘ulu ‘o Samēlia ko e foha ‘o Lemalaia.
Kapau ‘e ‘ikai te mou tui ‘e kimoutolu, tala atu ‘e ‘ikai te mou tu‘u kimoutolu.
Ko e Faka‘ilonga ‘o e ‘Imānuela
10Pea fai atu ‘e Sihova ‘ene folofola kia ‘Āhasi, ‘o pehē, 11Kole ma‘au ha faka‘ilonga meia Sihova ko ho ‘Otua: ‘o fai hifo ki lolofonua, pe fai hake ki he taukakapa.
12Pea tali ‘e ‘Āhasi, ‘E ‘ikai te u kole, he ‘ikai te u fie ala‘aki kia Sihova.
13Pea pehē ‘e ia, Eni, fanongo mai, Fale ‘o Tēvita; lau ‘e au kuo mou topono he fakakina‘i ‘a e kakai, ka te mou fakakina‘i hoku ‘Otua foki? 14Ko ia ‘e ‘atu hamou faka‘ilonga ‘e ‘Ātonai ‘e ia. Vakai, ‘e feitama ‘a e tāupo‘ou,#7.14 tāupo‘ou; Ko e fo‘i lea faka-Hepelū na‘e liliu ‘o tāupo‘oú ‘i he vēsí ni. ‘oku ‘ikai ko e fo‘i lea totonu ia ki he “tāupo‘oú” ka ko ha finemui pē kuo fe‘unga hono ta‘ú ke ne mali. Ko e tu‘u ‘a e tāupo‘oú ‘ia Mātiu 1.23, ko e sio ia ki he liliu faka-Kalisi ‘o e Fuakava Motu‘á (ko e Sepituakiní), ‘a ia na‘e toki fai ‘i he hili ha ta‘u ‘e 500 meia ‘Aisea. pea te ne ‘alo‘i ha tama, pea te ne fakahingoa ko ‘Imānuela.#7.14 ‘Imānuela; pe Ko e ‘Otua ‘iate kitautolu. 15Ko e pota#7.15 pota: Ko e patá eni. mo e honi#7.15 pota mo e honi; Ko e ongo me‘atokoni eni (‘a e patá mo e honí) na‘e ngāue‘aki he kamata‘anga ‘o e hisitōlia ‘o ‘Isilelí. ‘ene me‘akai, fe‘unga mo ‘ene poto ke teke‘i ‘a e kovi mo fili ‘a e lelei. 16He te‘eki ke poto ‘a e tamasi‘i ke teke‘i ‘a e kovi mo fili ‘a e lelei, kuo li‘aki ‘a e kelekele ko ē, ‘a ia ‘oku ke mate teki ki hono ongo tu‘i.
17He ‘omi kiate koe ‘e Sihova, pea ki ho kakai, pea ki he fale ‘o ho tupu‘anga, ha fa‘ahinga ‘aho kuo te‘eki ke hoko talu ‘a e taimi na‘e mavahe ai ‘a ‘Ifalemi meia Siuta–‘io, ‘a e Tu‘i ‘Āsilia.
18Pea ‘e hoko ‘i he taimi ko ia, ‘e tupulū ‘e Sihova ki he lango ‘oku ‘i he ngata‘anga ‘o e ngaahi vaitafe ‘o ‘Isipite, pea ki he pī ‘oku ‘i he fonua ‘o ‘Āsilia. 19Pea te nau omi, ‘o tālolo kotoa ‘i he ngaahi tele‘a fevanuvanu‘i, mo e ngaahi mafahifahi ‘o e makatu‘u, pea ‘i he ngaahi ‘a talatala kotoa pē, pea ‘i he ngaahi kaikai‘anga kotoa pē.
20‘I he taimi ko ia ‘e fai ‘a e fafai ‘e ‘Ātonai ‘aki ‘a e tele ‘oku tuku ke nō ‘i he ongo kauvai ‘o e Vaitafe, ‘io, ko e Tu‘i ‘Āsilia: ‘io, te ne fafai ‘a e ‘ulu mo e fulufulu ‘o e va‘e: pea na‘a mo e kava ‘e tele.
21Pea ‘e hoko ‘i he taimi ko ia ‘e pusiaki ‘e ha tangata ha pulu mui mo ha ongo sipi fefine; ka neongo ia ‘e hulu ‘a e hu‘akau te nau ‘atu, ‘o ne kai pota#7.21 Ko e patá eni. ai: 22he ko e pota#7.22 Ko e patá eni. mo e honi ko e me‘akai ia ‘a e toenga kotoa ‘oku nofo ‘i he fonua.
23Pea ‘e hoko ‘i he taimi ko ia, ‘ilonga pē ha potu na‘e ‘i ai ha afe‘i vaine fe‘unga mo e afe‘i pa‘anga siliva, te u tuku ia ki he talatala mo e ‘akau veli. 24Pea ko e ‘alu ki ai ‘e fai‘aki ‘a e ngahau mo e kaufana: he ko e fonua kotoa ko e koto talatala mo e ‘akau veli. 25Pea ko e ngaahi mo‘unga kotoa na‘e keli ‘aki ‘a e huo, ‘e ‘ikai te ke a‘u ki ai ko e manavahē ki he talatala mo e ‘akau veli; kae hoko ia ko e potu ke tuku atu ki ai ‘a e fanga pulu, pea ke malamalaki ‘e he fanga sipi.
Currently Selected:
KO ‘AISEA 7: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
