KO ‘AISEA 55
55
Ko e Tala‘ofa ‘a e ‘Otuá
1ENI, ‘ilonga ‘a e fie inua, ha‘u ki he ngaahi vai;
Mo ia foki ‘oku ‘ikai ha‘ane pa‘anga;
Omi pē, tokonaki ‘o kai;
‘Io, mou omi pē; fakatau uaine mo e hu‘akau.
Ta‘eha pa‘anga, pea ta‘eha totongi.
2Koe‘uma‘ā ho‘omou ‘atu pa‘anga ki he ‘ata‘i mā?
Mo e fua ‘o ho‘omou ongosia ki he me‘a ‘oku ‘ikai fakamākona?
Fei mo fanongo kiate au,
Mo kai ‘a e me‘a ‘oku lelei,
Pea ke hākahaka homou laumālie ‘i he kai me‘a ngako.
3Fokotu‘u telinga mai, pea omi kiate au;#Ngā 13.34
Fakafanongo kae mo‘ui homou laumālie:
Pea te u fai mo kimoutolu ha kovinānite ta‘engata,
Ko e ngaahi tala‘ofa kia
Tēvita, ‘A ia kuo pau.
4Vakai, kuo u tuku ia ko e fakamo‘oni ki he ngaahi kakai, ko e ‘Eiki mo e angi ki he ngaahi kakai. 5Vakai, te ke ui ki ha fu‘u kakai na‘e ‘ikai te ke ‘iloa; pea ko ha fu‘u kakai na‘e ‘ikai te nau ‘ilo koe, te nau lele mai kiate koe, koe‘uhi ko Sihova ko ho ‘Otua, pea ko e me‘a ‘i he Tāpuhā ‘o ‘Isileli, hono kuo ne ngaohi koe ke ngingila.
6Vivili ki he ‘Eiki lolotonga ‘oku ala ma‘u,
Ui kiate ia lolotonga ‘ene kei ofi:
7Ke li‘aki ‘e he angahala hono ‘alunga,
Mo e tangata kovi ‘ene ngaahi fakakaukau:
Pea ke ne foki ki he ‘Eiki,
Pea te ne ‘alo‘ofa kiate ia;
‘Io, ki hotau ‘Otua,
He lōlahi ‘ene fakamolemole.
8He ‘oku taha ‘eku ngaahi fakakaukau, pea taha ha‘amoutolu, pea ‘oku taha homou ‘alunga, pea taha ‘o‘oku–ko Sihova ia mei he Ta‘ehāmai. 9He hangē ‘oku mā‘olunga ‘a e langi ‘i māmani, pehē ‘oku mā‘olunga hoku ngaahi ‘alunga ‘i he ngaahi ‘alunga ‘omoutolu, mo ‘eku ngaahi fakakaukau ‘i he ngaahi fakakaukau ‘amoutolu. 10He hangē ‘oku hifo ‘a e ‘uha mo e sinou mei langi,#2 Kol 9.10 ‘o ‘ikai te ne foki ki ai, kae‘oua ke ne fakaviviku ‘a e fonua, ‘o ngaohi ia ke fakatupu me‘a, mo laku muka mai; ‘o ‘oua foki ke ai ha tenga ma‘a e tangata tūtuu‘i, mo ha me‘akai ma‘a e fiekaia; 11‘e pehē pē mo ‘eku lea ‘oku ‘alu atu mei hoku ngutu: ‘e ‘ikai foki nge‘esi mai, kae‘oua ke ne fai ‘a e me‘a ne u loto ki ai, mo fakaa‘u ‘a e me‘a ne u fekau atu ai ia.
12He te mou hū ki tu‘a mo e fiefia,
Pea ‘e taki atu kimoutolu mo e melino:
Ko e ngaahi mo‘unga mo e ngaahi sia
Te nau pā mavava ‘i ho‘omou hā mai,
Pea ko e ‘akau kotoa ‘o e vao ‘e pasipasi nima,
13‘E ‘oho hake ‘a e paini ‘o fetongi ‘a e talatala,
Pea ‘e ‘oho hake ‘a e maile ko e fetongi ‘o e hefa;
Pea ‘e tupu ai ha huafa fo‘ou ‘o e ‘Eiki,
Ha faka‘ilonga ta‘engata ‘e ‘ikai motu.
Currently Selected:
KO ‘AISEA 55: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
