KO ‘AISEA 54
54
‘Ko e ‘Ofa ‘a Sihova ‘i ‘Isileli
1HIKI tuē, si‘i pa‘a,
‘A koe na‘e ‘ikai ke fanau;#Kal 4.27
Pā mavava mo fākaulu,
‘A koe na‘e ‘ikai ke langā,
He ‘oku tokolahi ‘a e fānau ‘a e fefine tākatu‘u ‘i he faka‘api
ko e folofola ia ‘a Sihova.
2Fakalahi ‘a e tu‘unga ‘o ho tēniti; pea ko e ngaahi tupenu ‘o ho fu‘u nofo‘anga, tuku ke nau falō atu; ‘oua ‘e ta‘ofi: fakaloloa ho‘o ngaahi maea, pea hunuki ke ma‘u ho ngaahi fa‘o. 3He te ke pā atu ki to‘omata‘u mo to‘ohema, pea ko ho hako te ne tofi‘a ‘aki ‘a e ngaahi pule‘anga, pea te nau nofo‘i ‘ani kolo li‘aki.
4‘Oua te ke manavahē, he ‘e ‘ikai fakamaa‘i koe;
Pea ‘oua te ke puputu‘u, he ‘e ‘ikai ha me‘a te ke kula ai:
He ‘e ngalo ‘iate koe ‘a e mā ‘i ho‘o nofo taka pē,
Pea ‘e ‘ikai te ke toe manatu ‘a e manukia ‘o ho‘o nofo uitou.
5He ko ho husepāniti ‘a e ‘Afio#54.5 ‘Afio; pe ‘Āfifio. na‘a ne ngaohi koe;
Ko Sihova Sāpaoti hono huafa:
Pea ko ho Koeli ‘a e Tāpuhā ‘o ‘Isileli;
‘Oku ui ia ko e ‘Otua ‘o māmani kātoa.
6He hangē ko e uaifi na‘e li‘aki, ‘o nofo loto mamahi, ‘oku pehē ho ui ‘e Sihova. “Ko e uaifi ‘o ‘ete talavou foki, ‘e lava hono motuhi atu?”–ko e folofola ia ‘a ho ‘Otua.
7Na‘a ku li‘aki koe, ka ko e momo‘i kemo pē;
Ka ko ‘eku tānaki mai koe, ‘e fai‘aki ha fu‘ufu‘unga faka‘atu‘i.
8‘I he fā ‘eku ‘ita na‘a ku hanga kehe meiate koe ko e mōmeniti ‘e taha:
Ka ko ‘eku tokanga kiate koe, ‘e fai‘aki ha ‘ofa ta‘engata–
ko e folofola ia ‘a ho Koeli ko Sihova.
9He ‘oku hangē eni kiate au ko e Lōmaki ‘a Noa: hangē na‘a ku fuakava#Sēn 9.8-17 ‘e ‘ikai toe hoko ki he fonua ‘a e Lōmaki ‘a Noa, ‘oku pehē ‘eku fuakava ‘e ‘ikai te u ‘ita kiate koe, pea ‘e ‘ikai te u ha‘aki valoki‘i koe.
10Seuke, ‘e hiki nai ‘a e ngaahi mo‘unga,
Pea ngaue ‘a e ngaahi potu mā‘olunga;
Kae ‘ikai hiki ‘eku ‘ofa meiate koe,
Pea ‘e ‘ikai ngaue ‘eku kovinānite melino–
ko e folofola ia ‘a Sihova ‘oku ne faka‘atu‘i koe.
11Si‘i fefine ta‘eliekina, si‘i afāngia, si‘i ta‘efakalelua,
Vakai, ko au eni ‘oku ou fakatoka ho ngaahi maka ‘i he vali ‘uli‘uli,
Pea ko ho maka tu‘unga te u ‘ai sāfaia.
12Pea te u ‘ai ho ngaahi taua ko e maka-kula-koloa,
Pea ko ho ngaahi matanikolo ko e koto maka ulo,
Pea ko e kotoa ho kau‘ā ko e koto maka mahu‘inga.#Fkhā 21.18-21
13Pea ko ho‘o fānau fua pē ko e kau ako ‘a Sihova;#54.13 ‘a Sihova; pe ‘e Sihova.
Pea lahi ‘a e fiemālie ‘i ho‘o fānau.
14‘I he fai mā‘oni‘oni ‘e langa hake ai koe:
Fakamama‘o mei he hoha‘a,
He ‘oku ‘ikai ha‘o me‘a ke ke manavahē ai;
Pea mei he mate ilifia,
He ‘ikai ofi ‘a e me‘a kiate koe.
15Sī, ‘oku nau fakatahataha mai ke langa tau, kae ‘atā ‘aupito mo au:
Ko ia ‘oku fakalanga me‘a mo koe,
Ko koe te ne tu‘utāmaki ai.#54.15 te ne tu‘utāmaki ai; ‘Oku toe hiki: te ne tō ki ho‘o fa‘ahi.
16Vakai, ko au ia na‘a ku ngaohi ‘a e tufunga
‘Oku ne ifi ‘a e afi malala,
‘O fakatupu ‘a e mahafu ke fai‘aki ‘a e ngāue;
Ko au foki na‘a ku fakatupu ‘a e tama faka‘auha ke maumau.
17‘Ilonga ha mahafu ‘oku fa‘u ke fai‘aki ha kovi kiate koe,
‘E ‘ikai sia‘a;
Pea ‘ilonga ha ‘elelo ‘oku hopo mo koe ‘i he fakamaau,
Te ke fakahalaia.
Ko e ‘inasi eni ‘o e kau tamaio‘eiki ‘a Sihova,
Pea ko ‘enau fakatonuhia meiate au–
ko Sihova ia mei he Ta‘ehāmai.
Currently Selected:
KO ‘AISEA 54: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
