KO ‘AISEA 45
45
Ko Hono Fakanofo Tu‘i ‘e Sihova ‘a Kōlesi
1KO E folofola eni ‘a Sihova ki he‘ene Pani, kia Kōlesi, ‘a e toko taha kuo u puke hono to‘omata‘u, ke ‘ohifo ‘a e ngaahi pule‘anga ‘i hono ‘ao, pea ‘oku ou vete ‘a e no‘o ‘o e ngaahi tu‘i; ke fakaava ‘a e ngaahi lau matapā ‘i hono ‘ao, mo e ngaahi matanikolo, ‘o ‘oua ‘e kei songo. 2Te u ‘alu mu‘omu‘a kiate koe, ‘e au, ‘o u fakatokalelei ‘a e ngaahi tanu; te u laiki matapā palasa, pea ko e me‘a fakama‘u ‘aione te u tu‘usi: 3pea te u ‘atu kiate koe ‘a e ngaahi koloa kuo tuku ‘i he po‘uli, mo e ngaahi me‘a mahu‘inga kuo tuku fufū, koe‘uhi ke ke ‘ilo ko au Sihova na‘e ui hingoa koe, ko e ‘Otua ‘o ‘Isileli. 4Koe‘uhi ko ‘eku sevāniti ko Sēkope, mo ‘Isileli ko ‘eku pele, ko ia kuo u ui ai koe, ‘o lau ho hingoa: na‘a ku fakahingoa fo‘ou koe; ‘osi, na‘e ‘ikai te ke ‘ilo au. 5Ko Sihova au, pea ‘oku ‘ikai mo ha taha; ka tuku au ‘oku ‘ikai ha ‘Otua: na‘a ku ‘ai mahafu koe; ‘osi, na‘e ‘ikai te ke ‘ilo au. 6Koe‘uhi ke nau ‘ilo mei he hopo‘anga la‘ā, pea mei hono tō‘anga, ‘oku ‘ikai ha me‘a ‘o ‘atā mo au: ko Sihova au, pea ‘oku ‘ikai mo ha taha. 7‘A au ‘oku ou fa‘u ‘a e maama, mo fakatupu ‘a e po‘uli; ‘oku ou feia ‘a e melino, mo fakatupu ‘a e kovi: ko Sihova au, pea ‘oku ou fai ‘a e ngaahi me‘a ko ia kotoa.
8Fakatafe mai, ‘a e ngaahi langi, mei ‘olunga,
Pea ke ‘uha mā‘oni‘oni ‘a e ‘atā;
Ke fakamanga ‘a e fonua,
Kae fisi ‘a e fakamo‘ui mo e mā‘oni‘oni,
Ke na muka fakataha mai.
Ko au Sihova kuo u fakatupu ia.
Ko e ‘Eiki ‘o e Fakatupú mo e Hisitōliá
9‘Oiauē ‘a ia ‘oku fakakikihi mo ia na‘a ne ngaohi ia–ha ipu, ha taha ‘i he ngaahi ipu kelekele! ‘E lau ‘a e ‘umea kiate ia ‘oku ngaohi ia, Ko e hā ‘au ‘oku fai? pea ‘e lau ‘e he me‘a ‘oku ke fa‘u, ‘Ā, ‘oku ‘ikai hano nima ‘o e taha ko ē? 10‘Oiauē ‘a e taha ‘oku ne pehē ki he‘ene tamai, Ko e hā ‘oku pehē ai ho‘o fakatupu? Pea ki ha fefine, Ko e hā kuo ke fā‘ele‘i ai ha me‘a peheni? 11Ko eni ‘a e folofola ‘a Sihova ko e Tāpuhā ‘o ‘Isileli, mo e ‘Afio na‘a ne ngaohi ia: Te mou ‘eke kiate au ‘a e ngaahi me‘a ka hoko mai? te mou fai tu‘utu‘uni kiate au#45.11 tu‘utu‘uni kiate au; ‘Oku fihi. ‘Oku hiki ‘e he ni‘ihi: ‘Eke kiate au ‘a e. ‘i he‘eku fānau mo e ngāue ‘a hoku nima? 12Ko au na‘a ku ngaohi ‘a māmani, pea u fakatupu ‘a e tangata ‘oku ‘i ai: ko e nima ‘o‘oku ni na‘e falō ‘a e ngaahi langi, pea na‘a ku fai tu‘utu‘uni ki honau hōsitē kotoa. 13Ko au kuo u ue‘i hake ‘a e tangata ko ē ‘i he mā‘oni‘oni, pea te u fakatokalelei hono ngaahi hala: ko ia ia te ne langa ‘eku kolo, pea te ne tuku atu hoku kau fakahee‘i, ‘o ‘ikai koe‘uhi ko ha totongi, pea ‘ikai koe‘uhi ko ha me‘a‘ofa: ko e folofola ia ‘a Sihova Sāpaoti.
14Ko eni ‘a e folofola ‘a Sihova, Ko e fita‘a ‘a e kau ‘Isipite, mo e koloa ma‘u fakatau ‘a ‘Itiopea,#45.14 ‘Itiopea; Vakai ki he “Ngaahi Huluhulu”. mo e kau Sapa, ko e fa‘ahinga lōloa, te nau laka atu kiate koe, pea te nau hoko ko ho‘o me‘a; te nau muimui kiate koe; te nau ‘ai seini ‘o laka atu: pea te nau hū kiate koe, te nau lotu kiate koe, te nau pehē, Tā ‘oku ‘iate koe ‘a e ‘Otua,#45.14 ‘a e ‘Otuá; pe ‘a ‘Ela. pea ‘oku ‘ikai mo ha taha, ‘oku ‘ikai ‘aupito ha ‘Otua. 15Ka tā ko ‘Ela koe ‘oku ke fai fūfūnaki, si‘i ‘Otua ‘o ‘Isileli, si‘i fai fakamo‘ui. 16‘Oku nau mā kotoa pē, mo puputu‘u foki: ‘oku nau ‘alu fakataha ki he puputu‘u, ‘a e kau ngaohi ‘īmisi. 17‘Oku fakamo‘ui ‘a ‘Isileli ‘e Sihova ‘aki ha fakamo‘ui lau ‘ītāniti: ‘e ‘ikai te mou mā, pea ‘e ‘ikai te mou puputu‘u, ‘o lauikuonga pea ta‘engata. 18He ko e folofola eni ‘a Sihova, ‘a e ‘Afio na‘e fakatupu ‘a e ngaahi langi (ko ‘Elohimi ia), ‘a e ‘Afio na‘a ne fa‘u ‘a e fonua mo ngaohi ia; (ko ia na‘a ne teu ia, na‘e ‘ikai te ne fakatupu ia ke maomaonganoa, na‘a ne fa‘u ia ke nofo‘anga) ko Sihova au, pea ‘oku ‘ikai mo ha taha. 19Na‘e ‘ikai te u lea ‘i he fufū, ‘i ha potu ‘o e fonua ko Po‘uli; na‘e ‘ikai te u pehē ki he hako ‘o Sēkope, Kumi kiate au ‘i he maomaonganoa: ko Sihova au, ko e taha lea totonu, ‘oku ou fakahā ‘a e ngaahi me‘a ‘oku hangatonu.
Ko e ‘Eiki ‘o Māmani mo e ngaahi ‘Otua Tamapua ‘o Pāpiloné
20Mou fakataha, ‘o omi; mou ‘unu‘unu mai, ‘a e hao ‘o e ngaahi pule‘anga: ‘oku ‘ikai hanau ‘atamai, ‘a e kakai ‘oku fua ‘a e ‘akau ‘o honau ‘īmisi, mo lotu ki ha ‘Otua ‘oku ‘ikai ke lava ke fakamo‘ui. 21Mou fakahā mo fokotu‘u mai; ‘io, tuku ke nau alea fakataha: ko hai kuo ne fanongonongo me‘a pehē mei mu‘a? kuo ne fakahā ia talu mei mu‘a fuoloa? ‘ikai ko au Sihova? pea ‘oku ‘ikai ha toe ‘Otua, ‘oka tuku au; ha ‘Otua ‘oku faitotonu, pea ‘oku fakamo‘ui; ‘oku ‘ikai ha taha mo au. 22Hanga mai kiate au, ka mou mo‘ui, ‘a e ngaahi ngata‘anga ‘o māmani: he ko e ‘Otua au, pea ‘oku ‘ikai mo ha taha. 23Kuo u fuakava ‘iate au#Lom 14.11; Filip 2.10-11 –kuo ‘alu atu ‘a e lea mei hoku ngutu mā‘oni‘oni, pea ‘e ‘ikai foki–‘e peluki kiate au ‘a e tui kotoa pē, ‘e fuakava kiate au ‘a e ‘elelo kotoa. 24‘Oku ‘ia Sihova ‘a e ‘ū mā‘oni‘oni mo e mālohi–ko e lau ia ‘e fai kiate au–‘oku nau a‘u mai ki He‘ene ‘Afio, pea ‘e fakamaa‘i ‘a kinautolu kotoa na‘e ‘ita kiate ia. 25‘E fakatonuhia‘i ‘ia Sihova pē ‘a e hako kotoa ‘o ‘Isileli, pea ko ia ia ‘e fai ai ‘enau pōlepole.
Currently Selected:
KO ‘AISEA 45: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
