KO ‘AISEA 44
44
Ko Sihova pē ‘a e ‘Otuá
1KA ko eni, fanongo mai, ‘e Sēkope ko ‘eku sevāniti, mo ‘Isileli ko ‘eku pele. 2Ko e folofola eni ‘a Sihova na‘e ngaohi mo fa‘u koe talu ho fanau‘i, ‘a e taha ‘oku ‘alu atu ke tokoni: ‘Oua te ke manavahē, si‘eku sevāniti ko Sēkope; si‘i Sesuluni kuo u fili ki ai. 3He te u lilingi vai ki he fie inua, pea te u ‘uha lolo ki he kelekele mōmoa: te u lilingi hoku laumālie ki ho hako, mo ‘eku tāpuaki ki ho pikilau: 4pea te nau huluni ‘i he musie, hangē ko e ngaahi uilou ‘i he ve‘e tafenga vai. 5Ko Me‘a te ne pehē, ‘Oku ou kau kia Sihova, pea ko Me‘a te ne takua ‘a e hingoa ‘o Sēkope; pea ko Me‘a te ne tā ‘i hono nima#44.5 tā ‘i hono nimá; pe tā tatau; pe tohi ‘aki hono nimá. ‘a e lea, “‘A Sihova,” pea te ne hingoa-fo‘ou-‘aki ‘a ‘Isileli. 6Ko e folofola eni ‘a Sihova, ko e Tu‘i ‘o ‘Isileli,#‘Ais 48.12; Fkhā 1.17; 22.13 ‘io, ‘a hono Koeli ko Sihova Sāpaoti: Ko e ‘Uluaki au, pea ko au ‘a e Kimui; pea ka tuku au, ‘oku ‘ikai ha ‘Otua. 7Pea ko hai ‘oku tala hangē ko au?–ka pehē, pea ke ne fakamatala, mo hokohoko lelei mai–talu ‘eku ‘ai ‘a e mu‘aki kakai? ‘io, ke nau hanga ‘o fakahā ‘a e ngaahi me‘a ‘o e ‘amui, mo ia ‘oku panaki mai.#44.7 ‘Oku ‘ikai ke mahino ‘a e faka-Hepelū ‘o e vēsí ni. 8‘Oua ‘e mo‘utāfu‘ua, pea ‘oua ‘e tetetete: ‘ikai na‘a ku ongoongo ia kiate koe talu fuoloa, ‘o u fakahaa‘i? pea ko kimoutolu ‘eku kau fakamo‘oni. ‘Oku ai koā ha ‘Otua ‘oka tuku au? ‘io, ‘oku ‘ikai ha makatu‘u.
Ko e Manuki ki he Lotu Tamapuá
9‘io, ‘oku ‘ikai te u ‘ilo ‘e au ha taha. Ko e kau ngaohi ‘īmisi ko e koto lusa kotoa pē; pea ko e ngaahi me‘a ‘oku nau loto‘aki ‘oku ‘ikai ‘aonga: ‘io, ko ‘enau kau fakamo‘oni na ko e fa‘ahinga ‘oku ‘ikai ke sio, pea ‘oku ‘ikai te nau ‘ilo ha me‘a; ko hono ‘ātunga ē honau fakamaa‘i. 10Ko hai ‘oku fa‘u ha ‘Otua,#44.10 ha ‘Otua; pe ha ‘Ela. mo haka ‘īmisi?–ko e fai ha me‘a ‘oku ‘ikai hano ‘aonga. 11Vakai, ‘e mā ‘a e ngaahi kaume‘a ‘o ē; pea ko kinautolu na‘e ngāue ‘i hono ngaohi, ko e hako‘i tangata pē. Ke nau fakataha mai kotoa pē, ke nau tu‘u mai, ke nau mo‘utāfu‘ua, ke nau mā fakataha.
12Ko e tufunga ‘aione ‘oku ne to‘o ha tutu‘u, pea ‘oku ne ngāue‘aki ‘a e malala vela, pea te ne fakaangaanga ‘aki ha ngaahi hāmala, pea ‘oku ne ngaohi ia ‘aki hono nima mālohi. Faifai ‘oku ne fiekaia, pea ‘oku mole ai hono ivi; ka ‘ikai te ne ma‘u ha vai ke inu, te ne ongosia.
13Ko e tufunga ‘akau ‘oku ne falō ha kafa; ‘oku ne faka‘ilonga‘i ‘aki ha sioka; ‘oku ne ngaohi ‘aki ha ngaahi tele, ‘oku ne ango ‘aki ha kāpasa, ‘oku ne ngaohi ia ‘i he tatau ‘o e kakai, pea ‘oku ne ngaohi ia ‘o hangē ko e fōtunga ‘o ha tangata, hangē ha taha faka‘ofo‘ofa, ko e ‘ai ke nofo fale. 14Ko Me‘a ‘oku teu ha ta‘anga sita, pea ‘oku ne to‘o ha ‘akau fefeka, pe ko e ‘oke; ‘io, ‘oku ne fili ha‘ane me‘a ‘i he ngaahi ‘akau ‘o e vao: ‘oku ne tō ha fiki, pea ‘oku fakatupu ia ‘e he ‘uha. 15Pea ‘oku ‘aonga ki he tangata ke fefie ‘aki; pea ‘oku ne to‘o hano me‘a, ‘o fai‘aki ‘ene talikula; ‘io, ‘oku ne faka‘afu ‘aki ha ‘umu, ‘o ta‘o mā: ‘io, ‘oku ne ngaohi ‘aki ha ‘Otua, ‘o hū ki ai; ‘oku ne ngaohi ‘aki ha ‘īmisi, ‘o ne fo‘ohifo ki ai. 16Ko e vaeua ‘oku ne tafu ‘aki ‘a e afi; ‘io, ‘i he funga ‘o e vaeua ko ē ‘oku ne kai kakano; ‘oku ne ta‘o me‘akai, ‘o ne kai ke mākona; ‘oku ne talikula ai foki, ‘o ne pehē, Uoi, kuo u kamata māfana, kuo u ongo‘i ‘a e maama. 17Pea ko hono toe ‘oku ne ngaohi ke ‘otua, ha‘ane ‘aitoli; ‘oku ne fo‘ohifo ki ai, ‘o ne hū, ‘io, ‘oku ne lotu ki ai, ‘o ne pehē, Fakahaofi au; he ko hoku ‘otua koe.
18‘Oku ‘ikai te nau ‘ilo, pea ‘oku ‘ikai hanau ‘atamai: seuke, kuo pulusi honau mata ke ‘oua te nau sio; mo honau loto ke ‘oua te nau poto. 19Pea ‘oku ‘ikai te nau fakakaukau, pea ‘oku ‘ikai ha poto pe ‘atamai ke nau pehē ai, Ko hono vaeua na‘a ku tafu ‘aki ‘a e afi; ‘o u ta‘o mā ‘i he funga malala; ‘o u ta‘o kakano ai ‘o kai; pea ko e pehē koā te u ngaohi ‘aki hono toe ha ‘aitoli?#44.19 ‘aitoli; pe me‘a fakalielia, ko e lea faka-Hepelū ki he ‘aitoli. ‘o u fo‘ohifo ki ha potupotu‘i ‘akau?
20Ko ia ‘oku tauhi ha koto efuefu ‘oku takihee‘i ia ‘e ha loto kuo kākaa‘i, pea ‘oku ‘ikai te ne fakahaofi hono laumālie, pea ‘oku ‘ikai te ne pehē, ‘Ikai ko e loi ia ‘oku ou tōivi hono puke?#44.20 tōivi hono puke? pe puke ‘i hoku to‘omata‘ú.
Ko Sihova, ko e Fakatupu mo e Fakamo‘ui
21Manatu ki he me‘a ko ia, ‘e Sēkope mo ‘Isileli; he ko ‘eku sevāniti koe: ne u fa‘u koe; ‘oku ke tamaio‘eiki kiate au: ‘e ‘Isileli, ‘e ‘ikai te ke ngalo ‘iate au. 22Kuo u tāmate‘i ho‘o ngaahi angahala hangē ha ‘ao, mo ho‘o ngaahi hia hangē ha loa: foki kiate au: he kuo u huhu‘i koe.
23Mavava, ‘a e ngaahi langi,
He kuo lava ia ‘e Sihova;
Hiki tuē ‘a lolofonua;
Ha‘aki mai, ‘a e ngaahi mo‘unga, ho‘omou fiefia;
‘A e vao, mo e ‘akau kātoa ‘oku ‘i ai:
He kuo huhu‘i ‘e Sihova ‘a Sēkope,
Pea ‘oku ne fakalāngilangi‘i ia ‘ia ‘Isileli,
24Ko e folofola eni ‘a Sihova ko ho Koeli, mo ia na‘a ne fa‘u koe talu ho fanau‘i: Ko au Sihova ia ‘oku fai ‘a e me‘a kotoa: na‘e folahi ‘a e langi toko taha pē; ha‘ane lula folahi ‘a māmani ta‘ekau ai ha taha; 25‘oku fakaiku noa ‘a e ngaahi faka‘ilonga ‘a e fa‘ahinga launoa, mo ‘ai ke faha ‘a e kau tongafisi;#1 Kol 1.20 ‘oku fakafoki ‘a e kau poto, ke tu‘u mei mui, ‘o ngaohi ‘a e me‘a kuo nau ‘ilo ki ai ke hā ko e sesele; 26‘oku ne ‘ai ke tu‘u ‘a e lea ‘a ‘ene sevāniti, mo fakaai ‘a e fale‘i ‘a ‘ene kau talafekau; ‘oku ne folofola ki Selusalema, ‘E toe nofo‘ia; pea ki he ngaahi kolo ‘o Siuta, ‘E toe langa, pea ko ‘enau fu‘u holo te u toe fokotu‘u: 27‘oku ne folofola ki he vai‘oho, Mātu‘u, pea te u fakamōmoa ho ngaahi manga: 28‘oku folofola kia Kōlesi, Ko ‘eku tauhi sipi ia, pea te ne fakaai kotoa ‘a e me‘a ‘oku ou loto ki ai;#2 Kal 36.23; ‘Ēsela 1.2 ‘io, he‘ene pehē ki Selusalema, ‘E toe langa ia; pea ki he temipale, ‘E toe tanupou.
Currently Selected:
KO ‘AISEA 44: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
