KO ‘AISEA 19
19
‘E Tautea ‘e he ‘Otuá ‘a ‘Isipite
1KO E kavenga ‘a ‘Isipite mei he Ta‘ehāmai.#Sel 46.2-26; ‘Isi 29.1–32.32 Vakai, ‘oku heka ‘a Sihova ki ha ‘ao ifilele, ‘o ne hā‘ele ki ‘Isipite: pea ‘oku tete ‘a e ngaahi ‘aitoli ‘o ‘Isipite ‘i he‘ene fotu mai, pea ‘oku vai ‘a e loto‘i loto ‘o e kau ‘Isipite.
2Pea te u kinisi ‘a ‘Isipite ke fai mo ‘Isipite: pea te nau tau, ‘a e tangata mo hono kāinga, ‘a e tangata mo hono kaungā‘api; ‘a e kolo mo e kolo, ‘a e pule‘anga mo e pule‘anga. 3Pea ‘oku maha ‘a e laumālie ‘i he loto ‘o ‘Isipite; pea ko ‘enau fakakaukau ‘oku ou folofua: pea ‘oku nau huhū ki he ngaahi ‘aitoli, pea ki he fa‘ahinga fakalou‘akau, pea ki he kau fakahā‘ele fa‘ahikehe, pea ki he kau tuki fakatēvolo. 4Pea te u loki ‘a ‘Isipite ke fa‘iteliha ai ha pule fefeka; pea ‘e pule kiate kinautolu ha tu‘i kaukaua–ko e folofola ia mei he Ta‘ehāmai ‘a ‘Ātonai Sihova Sāpaoti.
5Pea ‘e fakamātu‘u ‘a e vai mei he tahi na, pea ‘e mōmoa mo pakukā ‘a e vaitafe. 6Pea ‘e taufa mei hono ngaahi manga ha namukū; ‘oku mamaha mo mōmoa ‘a e ngaahi vaitaki ‘o e ‘Isipite ‘e taha: ‘oku pakukā ‘a e kaho mo e limu. 7Ko e ngaahi potu tafangafanga ‘oku tu‘u ki Naila ‘i hono ve‘e vai, pea mo hono ngaahi toutu‘u koane, ‘oku mōmoa, ‘oku mo‘ui hopohopo pē, pea mole. 8Pea ‘oku to‘e ‘a e kau toutai ika, pea ‘oku tangilāulau ‘a kinautolu ‘oku lafo māta‘u ki Naila, pea ko kinautolu ‘oku ‘a‘au kupenga ki he fukahi vai kuo nau faka‘au hifo. 9Pea ‘oku puputu‘u ‘a e kakai ‘oku ngāue ki he helu falakesi, mo e kau lalanga kalekō. 10Pea ‘e momosi hono ngaahi pou; ‘oku loto puputu‘u ‘a kinautolu fua pē ‘oku ngāue totongi.
11‘Ā, kuo koto vale pē ‘a e hou‘eiki ‘o Soani, ‘a e kau poto ‘oku fale‘i ‘a Felo; ko e poto ‘a e fakataha tokoni ko e koto vale. Fēfē ho‘omou lau kia Felo, “Ko e foha au ‘o ha‘a poto, ko e hako ‘o e ngaahi tu‘i mu‘a?” 12Pea nau ‘i fē koā, ho‘o kau poto? ‘Io, ke nau fakahā mu‘a kiate koe; pea ke nau ‘ilo ‘a e me‘a ‘oku fakakaukau‘i ‘e Sihova Sāpaoti ke fai ki ‘Isipite. 13Kuo vale ‘a e hou‘eiki Soani, kuo fiemua‘i ‘a e hou‘eiki ‘o Mēfisi; pea kuo takihee‘i ‘a ‘Isipite ‘e kinautolu ko e makatuliki ‘o hono ngaahi matakali. 14Kuo lingi ‘e Sihova ki loto ‘Isipite ‘a e laumālie fakaninimo: ko ia kuo nau takihee‘i ‘a ‘Isipite ‘i he‘enau ngaahi ngāue kehekehe, ‘o hangē ko e sipa holo ‘a e tangata konā ‘i he‘ene lua. 15Pea ko ia ‘oku ‘ikai hā ‘i ‘Isipite ha ngāue ‘oku lava ai ha me‘a, ‘a e ‘ulu pe ko e iku, ‘a e lou paame pe ko e kutu.
16‘I he taimi ko ia ‘e hoko ‘a e kau ‘Isipite ‘o hangē ko ha kau fefine: pea te nau tete mo manavahē he tākalo ‘a e nima ‘o Sihova Sāpaoti, ‘a ia ‘oku ne apo ki ai. 17Pea ‘oku hoko ‘a e fonua ‘o Siuta ko e me‘a ke fakailifia ‘aki ‘a e kau ‘Isipite; ka ai ha‘anau lau‘i ia ki ai, pea ilifia leva, telia ‘a e tu‘utu‘uni ‘a Sihova Sāpaoti, ‘a ia ‘oku ne tātāupe ki ai.
18‘I he taimi ko ia ‘e ai ha nima‘i kolo ‘i ‘Isipite ‘oku nau lea‘aki ‘a e lea faka-Kēnani, pea ‘oku fuakava ‘ia Sihova Sāpaoti; ko honau taha ‘e ui ko Kolo-faka‘auha.#19.18 Ko hono hiki totonú ia, ka ‘oku mahalo ‘a e ni‘ihi ‘oku hala ‘a e tohi faka-Hepeluú, pea nau hiki: Kolo-‘o-la‘ā.
19‘I he taimi ko ia ‘e tu‘u ha ‘ōlita ‘o Sihova ‘i he loto fonua ‘o ‘Isipite, pea mo e pou tapu ‘o Sihova ofi ki hono kau‘ā. 20Pea ‘e hoko ia ko e faka‘ilonga mo e fakamo‘oni ma‘a Sihova Sāpaoti ‘i he fonua ‘o ‘Isipite: he te nau tautapa kia Sihova telia honau kau fakamamahi, pea te ne tuku atu ki ai ha taha fai fakamo‘ui mo ha mafi, ‘a ia te ne fakahaofi kinautolu. 21Pea ‘e faka‘ilo ia ‘e Sihova ki he kau ‘Isipite, pea ‘e ‘ilo ‘a Sihova ‘e he kau ‘Isipite ‘i he taimi ko ia; pea te nau ngāue kia Sihova ‘aki ‘a e feilaulau mo e me‘a‘ofa, pea te nau fai tukumo‘ui ki ai, mo fakaai. 22Pea ‘e taa‘i ‘e Sihova ‘a ‘Isipite, ‘ene taa‘i mo faito‘o; ‘io, ka nau ka foki kia Sihova ‘oku ne tuku ke tau ‘enau hū, ‘o ne faito‘o kinautolu.
23‘I he taimi ko ia ‘e ai ha hala tanu mei ‘Isipite ki ‘Āsilia; pea ‘e ha‘u ‘a e ‘Āsilia ki ‘Isipite, mo e ‘Isipite ki ‘Āsilia; pea ‘e tauhi ki ai ‘a e ‘Isipite fakataha mo e ‘Āsilia. 24‘I he taimi ko ia ‘e toko tolu ‘aki ‘a ‘Isileli ‘a ‘Isipite mo ‘Āsilia ‘i he hoko ko e monū‘ia‘anga ‘i he lotolotonga ‘o māmani. 25‘E tāpuaki‘i kinautolu ‘e Sihova Sāpaoti, ‘o pehē, Ke ke monū‘ia koe, ‘a ‘Isipite ko hoku kakai, mo ‘Āsilia ko e ngāue ‘a hoku nima, mo ‘Isileli ko hoku tofi‘a.
Currently Selected:
KO ‘AISEA 19: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
