Hepelū 11
11
Ko e Tui ‘a e Kakai ‘a e ‘Otuá
1PEA ko eni, ko e anga ‘o tui, ‘oku ne fakasino ‘a e ngaahi me‘a ‘oku ‘amanekina, ‘oku ne mafakamo‘oni ‘a e ngaahi me‘a ‘oku ‘ikai hā. 2He vakai, ko eni ia ‘a e me‘a na‘e ma‘u ai ‘e he kau Mātu‘a ‘enau ongoongolelei.
3Ko tui ‘oku tau ‘utangi ai, ne langa ‘a e ngaahi ‘ūnivēsi ‘e he folofola ‘a e ‘Otua; ‘o pehē, kuo ‘ikai tupu ‘a e me‘a ‘oku tau sio ki ai mei ha ngaahi me‘a ‘oku hā.#Sēn 1.1; Saame 33.6,9; Sioné 1.3
4Ko tui na‘e ‘atu ki he ‘Otua ‘e ‘Ēpeli ha feilaulau, ‘o lelei hake ‘i ha‘a Keini; ‘io, ko ia ia na‘e fakamo‘oni ai ma‘ana ‘oku ne mā‘oni‘oni he na‘e fakamo‘oni ‘e he ‘Otua ‘i he funga ‘o e ngaahi me‘a na‘a ne ‘omi: pea ko ia ia ‘oku ne kei lea ai, neongo kuo pekia.#Sēn 4.3-10
5Ko tui na‘e hiki ai ‘a ‘Īnoke, ke ‘oua te ne mamata ki he mate; pea na‘e ‘ikai ‘iloa, koe‘uhi kuo hiki ia ‘e he ‘Otua: he ‘i he te‘eki ke hiki ia ne fakamo‘oni ma‘ana, kuo ne fakahōifua ‘a e ‘Otua.#Sēn 5.21-24 (LXX) 6Ka ‘oka ta‘ekau ‘a e tui, ‘oku ‘ikai momo‘i lava ha‘ate fakahōifua ia: he ko ia ‘oku ‘unu‘unu ki he ‘Otua, kuo pau ‘oku ne tui ‘oku ‘i ai ia, pea te ne hanga ‘o totongi kiate kinautolu ‘oku kumi hakili kiate ia.
7Ko tui na‘e ngāue ai ‘a Noa, ‘i hono valokia ki ha ngaahi me‘a kuo te‘eki hā mai; pea ‘i he‘ene manavahē ki ai, na‘a ne fa‘u ‘a e ‘A‘ake mo‘o fakamo‘ui hono ‘api: ‘io, ko ia ia na‘a ne fakahalaia ai ‘a māmani, ‘o ne hoko ko e ‘ea ki he mā‘oni‘oni fakatui.#Sēn 6.13-22
8Ko tui na‘e talangofua ai ‘a ‘Epalahame ‘i hono ui, ‘o ne ‘alu atu mei hono fonua ki ha potu te ne toki ma‘u mōno tofi‘a; ‘io, na‘a ne ‘alu atu, ‘o ‘ikai te ne ‘ilo pe ko ‘ene ‘alu ki fē.#Sēn 12.1-5 9Ko tui na‘a ne hanga ‘o ‘āunofo ai ki he Fonua ‘o e Tala‘ofa, ‘o hangē ko e nofo muli; ‘o ne fale ‘aki ‘a e tēniti pē, fakataha mo ‘Aisake mo Sēkope, ‘a ia na‘a nau kaungā‘ea ki he tala‘ofa ko ia.#Sēn 35.27 10He na‘a ne nofo ‘amanaki ki he kolo ‘oku ‘o‘ona ‘a e ngaahi tu‘unga, ‘a ia ko hono fakafuofua mo hono tufunga lahi ko e ‘Otua.
11Ko tui na‘e ma‘u mālohi ai ‘a Sela foki ke tu‘itu‘ia, ‘io, neongo kuo ne tauhili mo e taimi ko ia, ko e me‘a ‘i he‘ene lau#11.11 Ko tui… ‘i he‘ene lau (‘e Sela); ‘Oku pehē ‘i hono ngaahi hiki fuoloa ‘e ni‘ihi: Ko e tui na‘e lava ‘o fanau ai ‘a ‘Epalahamé… ‘i he‘ene lau (‘e ‘Epalahame). ko e toko taha ia ‘oku fai ki he‘ene lea ‘a ia kuo ne tala‘ofa.#Sēn 18.11-14; 21.2 12Ko ia ai, foki na‘e tupu mei ha toko taha, pea na‘a mo ia ko e koto mate pē, ‘io, na‘e tupu meiate ia ha kakai ke hangē ko e fetu‘u ‘o e langi hono tokolahi, pea hangē ko e ‘one‘one ‘i he matātahi ‘a ia ‘oku ‘ikai malau.#Sēn 15.5; 22.17; 32.12
13Ko kinautolu ni kotoa pē na‘a nau pekia tui pē, kuo ‘ikai te nau lava‘i ‘a e ngaahi tala‘ofa; ka kuo nau sio ki ai mei he mama‘o, pea kuo nau fetapa ki ai, pea kuo nau fakahā, ko e ‘āunofo mo e muli kinautolu ‘i māmani.#Sēn 23.4; 1 Kal 29.15; Saame 39.12 14He ka pehē ha lea ‘a ha ni‘ihi, ‘oku hā mahino mei ai ‘oku nau ha‘ao hanau fonua tonu. 15Seuke, ka ne nau manatu ki he fonua ko ia na‘a nau ha‘u mei ai, na‘a nau ma‘u ai pē ha faingamālie ke nau foki. 16Ka ‘i hono anga ko eni, ko e fonua lelei hake ‘oku nau holi ki ai, ko hono ‘uhinga ko e fonua fakalangi: ko ia, ‘oku ‘ikai maa‘i kinautolu ‘e he ‘Otua ke ui ia ko honau ‘Otua, he na‘a ne teuteu mo‘onautolu ha kolo.
17Ko tui ne feilaulau ‘aki ai ‘e ‘Epalahame ‘a ‘Aisake ‘i hono ‘ahi‘ahi na‘e fai; ‘io, ko ia kuo ne tali ‘a e ngaahi tala‘ofa na‘e kamata ‘e ia ke feia hono foha tofu pē taha;#Sēn 22.1-14 18‘io, ‘e ia na‘e folofola ki ai, ‘E ngata ‘ia ‘Aisake ‘a e lau ko ho hako.#Sēn 21.12 19He na‘a ne pehē, Na‘a mo e pekia, ka ‘oku mafai ‘e he ‘Otua ke fokotu‘u mei ai; ‘io, na‘a ne toe ma‘u foki ia mei ai ‘i he lau fakatātā.
20Ko tui ne tāpuaki ai ‘e ‘Aisake ‘a Sēkope mo ‘Īsoa, ‘o ne lau ki he ngaahi me‘a kaha‘u foki.#Sēn 27.27-29,39-40
21Ko tui na‘e tāpuaki‘i ai ‘e Sēkope ‘a e ongo foha ‘o Siosifa tāutaha, ‘i he‘ene teu pekia, pea ne hūfaki ki hono ‘ulu‘i tokotoko.#Sēn 47.31 (LXX); 48.1-20
22Ko tui na‘e lau ai ‘e Siosifa ki he ‘Ekisoto ‘a ha‘a ‘Isileli, ‘i he‘ene teu pekia, ‘o ne fai tu‘utu‘uni ki hono ‘anga‘anga.#Sēn 50.24-25; ‘Eki 13.19
23Ko tui na‘e fufū ai ‘a Mōsese ‘e he‘ene mātu‘a ‘i hono fanau‘i, ‘o māhina tolu, koe‘uhi na‘a na vakai ko e tama faka‘ofo‘ofa ia; ‘io, na‘e ‘ikai te na manavahē ki he fekau ‘a e tu‘i.#‘Eki 2.2; 1.22
24Ko tui na‘e fakatale‘i ai ‘e Mōsese ‘i he‘ene tangata hono lau ko e tama ‘a e ‘ōfefine ‘o Felo;#‘Eki 2.10-12 25he‘ene fili mu‘a ke kaungā ngaohikovia mo e kakai ‘a e ‘Otua, ‘i ha‘ane ma‘u fakataimi pē ha mālie tu‘u he angahala; 26he na‘a ne lau ‘a e manuki‘i ‘o Kalaisi ko e koloa na‘e hulu atu ‘i he ngaahi fokotu‘unga koloa ‘o ‘Isipite: he na‘a ne sio fakamama‘u atu ki he totongi.
27Ko tui na‘a ne li‘aki ai ‘a ‘Isipite, ‘o ‘ikai te ne manavahē ki he tuputāmaki ‘a e tu‘i: he na‘a ne kītaki he‘ene sio ki he Tu‘i Ta‘ehāmai. 28Ko tui na‘a ne fai ai ‘a e Pāsova mo e afuhi ‘aki ‘a e toto, koe‘uhi ke ‘oua na‘a ala kiate kinautolu ‘e ia ‘oku faka‘auha ‘a e ngaahi ‘uluaki.#‘Eki 12.21-30
29Ko tui na‘a nau ‘asi atu ai ‘i he Tahi Kulokula, ‘o hangē ko e ‘alu ‘i he mōmoa; ‘a ia ‘i he ‘ahi‘ahi ki ai ‘e he kakai ‘Isipite na‘e fōngia ai kinautolu.#‘Eki 14.21-31
30Ko tui na‘e holo ai ‘a e ngaahi ‘ā ‘o Sielikō, ‘i he hili hono ‘alu takai‘i ‘o ‘aho fitu.#Sios 6.12-21 31Ko tui na‘e ‘ikai ‘auha ai ‘a Lēhapi fe‘auaki, fakataha mo e kau talangata‘a; he kuo ne tali lelei ‘a e ongo mataki.#Sios 2.1-21; 6.22-25
32Pea ko ‘eku toe lea atu ke hā? he ‘oku si‘i ‘a e taimi ke fakamatala kia Kitione mo Pēlaki mo Samisoni mo Sēfita, kia Tēvita foki mo Sāmiuela mo e kau palōfita;#Fkm 6.11–8.32; 4.6–5.31; 13.2–16.31; 11.1–12.7; 1 Sām 16.1–1 Tu‘i 2.11; 1 Sām 1.1–25.1 33‘a e fa‘ahinga, ‘a ia ‘i he fai‘aki ‘o tui na‘a nau ikuna ‘a e ngaahi pule‘anga, na‘a nau feia e mā‘oni‘oni, na‘a nau lava‘i ‘a e ngaahi tala‘ofa, na‘a nau tāpuni ‘a e ngutu ‘o e fanga laione,#Tān 6.1-27 34na‘a nau tāmate‘i ‘a e mālohi ‘o e afi, na‘a nau hao mei he mata ‘o e heletā, na‘e fakaake mālohi mei he vavai, na‘a nau hoko ‘o to‘a ‘i he tau, na‘a nau tulia ‘a e ngaahi matatau ‘o e muli.#Tān 3.1-30 35Ma‘u ai ‘eni fafine honau pekia kuo toetu‘u;#1 Tu‘i 17.17-24; 2 Tu‘i 4.25-37 ka ka fakamamahi‘i ‘a e tu‘unga me‘a ni‘ihi, ‘o ‘ikai te nau fie tali ‘a e lau fakahaofi, koe‘uhi ke nau lava‘i ‘a e toetu‘u lelei hake.
36Pea na‘e ‘ahi‘ahi‘i ‘aki ha ni‘ihi ‘a e ngaahi manuki fakamamahi, mo e haha, kae‘uma‘ā ‘a e nofo ha‘isia mo e pilīsone.#1 Tu‘i 22.26-27; 2 Kal 18.25-26; Sel 20.2; 37.15; 38.6 37Na‘e tolomaka‘i ha ni‘ihi, na‘e kilisi ua,#11.37 ‘Oku ‘ikai ‘ilo pe ko e hā ‘a e lea ‘oku hoko mo ia. ‘Oku mahalo ‘a e ni‘ihi ko e tūfana‘i, ka ko e ni‘ihi ko e tutu. na‘e fakapoongi heletaa‘i; na‘a nau hēhētu‘u, ‘o kofu kili‘i sipi mo kili‘i kosi, he kuo nau masiva mo fakatanga‘i mo ngaohikovia;#2 Kal 24.21 38(ka ko e fa‘ahinga na‘e ‘ikai ke taau mo kinautolu ‘a e maama ko eni) na‘a nau nofo holo ‘i he ngaahi toafa mo e ngaahi mo‘unga mo e ngaahi ‘ana ‘o e fonua.
39‘Io, ko kinautolu ni, neongo na‘a nau ma‘u kotoa pē ha ongoongolelei ‘i he‘enau tui, ka na‘e ‘ikai te nau lava‘i ‘a e Tala‘ofa: 40koe‘uhi kuo tokonaki ‘e he ‘Otua ha me‘a lelei hake ma‘atautolu, pea koe‘uhi ke ‘oua na‘a fakahaohaoa ‘a kinautolu ta‘e te tau kau ai.
Currently Selected:
Hepelū 11: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
