Hepelū 10
10
1HE ko e me‘a ‘i he ma‘u ‘e he Lao ‘a e ‘ata pē ‘o e ngaahi lelei ka hoko, ‘o ‘ikai ko e ‘īmisi totonu ‘o e ngaahi me‘a, ko ia ‘i he fai hokohoko ta‘u ‘aki ‘a e ngaahi feilaulau pē ko ia, ‘a ia ‘oku nau ‘atu ‘o ‘ikai ngata, ‘oku ‘ikai te nau momo‘i lava ke fakahaohaoa ai ‘a e kakai ‘oku ha‘u ki he ‘Otua. 2He ka ne pehē, ‘ikai ‘e tuku hono ‘atu? koe‘uhi ko e ‘ikai ke kei ongo‘i ha angahala ‘e he kakai ‘oku lotu ‘aki ia, ‘o kapau kuo ‘osi ‘a fakama‘a kinautolu. 3Ka ‘i he fai ‘o e ngaahi feilaulau ko ia, ‘oku ‘i ai ha fakamanatu angahala ‘i he ta‘u kotoa pē. 4Seuke, he ‘oku ‘ikai malava ke ‘ave angahala ‘e he toto ‘o e fanga pulu mo e fanga kosi.
5Ko ia ai, ‘i he hoko ‘a ‘Ene ‘Afio ki māmani, ‘oku ne me‘a,#Saame 40.6-8 (LXX)
Na‘e ‘ikai te ke tangi ki ha feilaulau pe ha foaki,
Ka kuo ke teuteu ha sino mo‘oku:
6Ko e ngaahi feilaulau li‘aki,
Mo e ngaahi feilaulau he angahala na‘e ‘ikai te ke hōhō‘ia ai.
7Pea u toki pehē, Ko eni kuo u ha‘u
(‘I he takainga tohi kuo tohi kia au)
Ke fai ho‘o tu‘utu‘uni, ‘e ‘Otua.
8Na‘a ne pehē ‘anenai, Ko e ngaahi feilaulau, mo e ngaahi foaki, mo e ngaahi feilaulau li‘aki, mo e ngaahi feilaulau he angahala, na‘e ‘ikai te ke tangi ki ai, ‘uma‘ā ha‘o hōhō‘ia ai, ‘a e ngaahi fa‘ahinga me‘a ‘oku ‘atu ‘i he tu‘utu‘uni fakalao. 9Ka ‘oku ne pehē ‘eni, Ko eni kuo u ha‘u ke fai ho‘o tu‘utu‘uni. Tā ‘oku ne ‘ave ‘a e ‘uluaki koe‘uhi ke ne fokotu‘u ‘a hono ua. 10Pea ‘i he tu‘utu‘uni ko ia kuo ‘osi tapui kitautolu, ko e me‘a ‘i he ‘oatu ‘o e sino ‘o Kalaisi ke tātu‘otaha pē.
11Pea ‘ilonga ha taula‘eiki, ‘oku ne tu‘u ‘o hokohoko ‘aho pē he fai ‘ene ngāue, ‘io, he ‘atu tātu‘olahi ‘a e ngaahi feilaulau tatau ai pē, ‘a ia ko e ngaahi feilaulau ‘e ‘ikai si‘i lava ‘i ha taimi ke ‘ave ‘aupito ‘a e angahala.#‘Eki 29.38 12Ka ko e Toko Taha ni, hili ‘ene ‘atu koe‘uhi ko e angahala ha fo‘i feilaulau tofu pē taha ‘o ta‘engata, na‘a ne nofo hifo mei he to‘omata‘u ‘o e ‘Otua.#Saame 110.1 13Pea tālunga ia mo ‘ene nofo‘aki tali kae‘oua ke ngaohi hono ngaahi fili ko hono tu‘unga va‘e. 14He ‘i he ‘oatu feilaulau tātu‘otaha ko ia, kuo ne fakahaohaoa ‘o ta‘engata ‘a kinautolu kuo tapui.
15Kae‘uma‘ā ‘oku fakahā ia kiate kimautolu ‘e he Laumālie Mā‘oni‘oni foki: 16he hili ‘ene pehē ‘Oku folofola ‘a e ‘Eiki, Ko eni ia ‘a e fuakava te u fai ma‘anautolu hili ‘a e taimi ko ia,#Sel 31.33 Te u ‘ai ‘eku ngaahi lao ki honau loto, pea te u tohi tongi ia ‘i honau ‘atamai; hili ia ‘oku ne toki pehē, 17Pea ko ‘enau ngaahi angahala, pea mo ‘enau ngaahi maumau lao, ‘e ‘ikai te u toe manatua.#Sel 31.34 18Pea ka ai leva ha fakamolemole ‘o e ngaahi me‘a ko ia, pea ‘oku ‘ikai ā ha toe ‘atu feilaulau koe‘uhi ko e angahala.
Ko e Poupou mo e Fakatokanga
19Ko ia, kāinga, ko e me‘a ‘i he‘etau ma‘u ‘a e lotolahi ‘i he ta‘ata‘a ‘o Sīsū, ke hū ki he Potu Toputapu; 20‘i he hala fo‘ou mo mo‘ui ne ne tofa mo‘otautolu, he‘ene ‘asi atu ‘i he tatau, ‘a ia ko hono kakano; 21pea ‘i he‘etau ma‘u ha taula‘eiki ‘oku fungani, ‘a ia ‘oku pule ki he ‘api ‘o e ‘Otua; 22ko ia ke tau ‘unu‘unu atu mo e loto mo‘oni, kuo ma‘uma‘uluta ‘etau tui, kuo luluku hotau loto ‘o fakama‘a mei he konisēnisi kovi, pea kuo pālutu hotau sino ‘i he vai fakama‘a.#Lev 8.30; ‘Isi 36.25 23Ke tau kuku ma‘u, ta‘engaue, ‘a e fai fakahā ‘o ‘etau fakatu‘amelie, (seuke, ko ia na‘a ne tala ‘a e ngaahi palōmesi ko e toko taha ‘oku fai ki he‘ene lea). 24Pea ke tau fetokanga‘aki, ke fefaka‘ai‘ai‘aki ‘a kitautolu ki he fe‘ofa‘aki mo e ngāue lelei: 25‘o ‘oua na‘a tau li‘aki ‘etau ngaahi fakataha, ‘o hangē ko e anga ‘o e ni‘ihi; ka mou feenginaki‘aki, pea ‘āsili he ‘oku mou sio ki he fakaofiofi mai ‘a e ‘aho.
26He kapau ‘oku tau angahala fie angahala hili ‘etau ‘ilo kānokano ki he mo‘oni, ‘oku ‘ikai kei toe ha feilaulau koe‘uhi ko e angahala. 27Ka ‘oku toe pē ‘ete nofo‘aki tali ilifia ki he fakamaau, pea ‘oku toe pē ‘a e fua‘a ‘a ha afi, ‘a ia te ne keina ‘a e kakai ‘oku angatu‘u.#‘Ais 26.11 (LXX) 28Ka ta‘etoka‘i ‘e ha taha ‘a e lao ‘a Mōsese, na‘e ‘ikai felave ha ‘ofa; ka ‘oka ai ha fakamo‘oni ‘e toko ua, pe toko tolu, ‘oku ne mate tāmate‘i.#Teu 17.6; 19.15 29Mou faka‘uta ki he kovi ange ‘ānoa ‘o e tautea ‘e lau ‘oku tuha mo ia kuo ne mala ‘i he ‘Alo ‘o e ‘Otua, pea kuo ne lau ‘a e ta‘ata‘a fuakava ko e me‘a noa pē, ‘a e ta‘ata‘a ne fakatāpui ai ia, pea kuo ne pā‘usi‘i ‘a e Laumālie ‘oku mei ai ‘ete kelesi!#‘Eki 24.8 30He ‘oku tau ‘ilo ‘a e anga ‘o e Toko Taha ko ia ‘oku ne pehē,
‘Oku ‘a‘aku ‘a e sauni,
Ko au te u ‘atu hono tuha–
Ko e folofola ē ‘a Sihova.
Mo ne toe pehē
‘E fakamaau ‘e he ‘Eiki hono kakai.#Teu 32.35,36
31‘Ē, ko e me‘a fakailifia ke te tō ki he nima ‘o e ‘Otua ‘oku Mo‘ui.
32Ka mou fakamanatu hake ‘a e ngaahi ‘aho mu‘a, ‘a ia, hili homou fakamaama, na‘a mou fai kītaki pē ‘a e fu‘u fefa‘uhi, ‘a ia ko e koto fakamamahi pē. 33Ko e me‘a ni‘ihi ‘i he fakatakataka ‘aki kimoutolu he ngaahi manuki mo e fakatanga; pea ko e me‘a ni‘ihi ‘i ho‘omou hoko ‘o kaungāme‘a mo kinautolu na‘e mo‘ui ‘aki ‘a e me‘a ko ia. 34He na‘e ‘ikai ngata pē ‘i ho‘omou kaungā mamahi mo kinautolu na‘e nofo pilīsone; ka na‘a mou tali fiefia foki ‘a e fa‘aoa ‘o ho‘omou nga‘oto‘ota, ko ho‘omou ‘ilo ‘oku ‘i ai ha‘amou koloa ‘oku lelei hake pea tolonga. 35Ko ia, ‘oua te mou li‘aki ho‘omou lotolahi; he ko e me‘a ia ‘oku lahi hono fakakoloa, he ‘oku tuha mo kimoutolu ‘a e kītaki; 36koe‘uhi ke mou fai ke ‘osi ‘a e finangalo ‘o e ‘Otua, ‘o mou lava‘i ‘a e tala‘ofa. 37He ‘oku toe pē ha ki‘i momo‘i taimi, pea ha‘u ‘a Tu‘unukumai; ‘io, ‘e ‘ikai te ne fakatotoka.#Hap 2.3-4 (LXX) 38Ka ko e tangata mā‘oni‘oni ‘a‘aku, te ne mo‘ui ‘i he tui: ka ‘o kapau te ne holomui, ‘e ‘ikai hōifua hoku laumālie ‘iate ia. 39Ka ko kitaua ‘oku ‘ikai ko e ha‘a holomui ‘oku tō ki mala, ka ko e ha‘a tui ai pē ke ma‘u mai hota laumālie.
Currently Selected:
Hepelū 10: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
