Popular Bible Verses from Hepelū 11

Share

PEA ko eni, ko e anga ‘o tui, ‘oku ne fakasino ‘a e ngaahi me‘a ‘oku ‘amanekina, ‘oku ne mafakamo‘oni ‘a e ngaahi me‘a ‘oku ‘ikai hā. He vakai, ko eni ia ‘a e me‘a na‘e ma‘u ai ‘e he kau Mātu‘a ‘enau ongoongolelei.

Ka ‘oka ta‘ekau ‘a e tui, ‘oku ‘ikai momo‘i lava ha‘ate fakahōifua ia: he ko ia ‘oku ‘unu‘unu ki he ‘Otua, kuo pau ‘oku ne tui ‘oku ‘i ai ia, pea te ne hanga ‘o totongi kiate kinautolu ‘oku kumi hakili kiate ia.

Ko tui ‘oku tau ‘utangi ai, ne langa ‘a e ngaahi ‘ūnivēsi ‘e he folofola ‘a e ‘Otua; ‘o pehē, kuo ‘ikai tupu ‘a e me‘a ‘oku tau sio ki ai mei ha ngaahi me‘a ‘oku hā.

Ko tui na‘e talangofua ai ‘a ‘Epalahame ‘i hono ui, ‘o ne ‘alu atu mei hono fonua ki ha potu te ne toki ma‘u mōno tofi‘a; ‘io, na‘a ne ‘alu atu, ‘o ‘ikai te ne ‘ilo pe ko ‘ene ‘alu ki fē. Ko tui na‘a ne hanga ‘o ‘āunofo ai ki he Fonua ‘o e Tala‘ofa, ‘o hangē ko e nofo muli; ‘o ne fale ‘aki ‘a e tēniti pē, fakataha mo ‘Aisake mo Sēkope, ‘a ia na‘a nau kaungā‘ea ki he tala‘ofa ko ia.

Ko tui na‘e ngāue ai ‘a Noa, ‘i hono valokia ki ha ngaahi me‘a kuo te‘eki hā mai; pea ‘i he‘ene manavahē ki ai, na‘a ne fa‘u ‘a e ‘A‘ake mo‘o fakamo‘ui hono ‘api: ‘io, ko ia ia na‘a ne fakahalaia ai ‘a māmani, ‘o ne hoko ko e ‘ea ki he mā‘oni‘oni fakatui.

Ko tui na‘e hiki ai ‘a ‘Īnoke, ke ‘oua te ne mamata ki he mate; pea na‘e ‘ikai ‘iloa, koe‘uhi kuo hiki ia ‘e he ‘Otua: he ‘i he te‘eki ke hiki ia ne fakamo‘oni ma‘ana, kuo ne fakahōifua ‘a e ‘Otua.

Ko tui na‘e ‘atu ki he ‘Otua ‘e ‘Ēpeli ha feilaulau, ‘o lelei hake ‘i ha‘a Keini; ‘io, ko ia ia na‘e fakamo‘oni ai ma‘ana ‘oku ne mā‘oni‘oni he na‘e fakamo‘oni ‘e he ‘Otua ‘i he funga ‘o e ngaahi me‘a na‘a ne ‘omi: pea ko ia ia ‘oku ne kei lea ai, neongo kuo pekia.

Ko tui na‘e ma‘u mālohi ai ‘a Sela foki ke tu‘itu‘ia, ‘io, neongo kuo ne tauhili mo e taimi ko ia, ko e me‘a ‘i he‘ene lau ko e toko taha ia ‘oku fai ki he‘ene lea ‘a ia kuo ne tala‘ofa.

He na‘a ne nofo ‘amanaki ki he kolo ‘oku ‘o‘ona ‘a e ngaahi tu‘unga, ‘a ia ko hono fakafuofua mo hono tufunga lahi ko e ‘Otua.

Ko tui na‘e fakatale‘i ai ‘e Mōsese ‘i he‘ene tangata hono lau ko e tama ‘a e ‘ōfefine ‘o Felo; he‘ene fili mu‘a ke kaungā ngaohikovia mo e kakai ‘a e ‘Otua, ‘i ha‘ane ma‘u fakataimi pē ha mālie tu‘u he angahala; he na‘a ne lau ‘a e manuki‘i ‘o Kalaisi ko e koloa na‘e hulu atu ‘i he ngaahi fokotu‘unga koloa ‘o ‘Isipite: he na‘a ne sio fakamama‘u atu ki he totongi. Ko tui na‘a ne li‘aki ai ‘a ‘Isipite, ‘o ‘ikai te ne manavahē ki he tuputāmaki ‘a e tu‘i: he na‘a ne kītaki he‘ene sio ki he Tu‘i Ta‘ehāmai.

Ko tui ne feilaulau ‘aki ai ‘e ‘Epalahame ‘a ‘Aisake ‘i hono ‘ahi‘ahi na‘e fai; ‘io, ko ia kuo ne tali ‘a e ngaahi tala‘ofa na‘e kamata ‘e ia ke feia hono foha tofu pē taha

Ko tui na‘e ‘ikai ‘auha ai ‘a Lēhapi fe‘auaki, fakataha mo e kau talangata‘a; he kuo ne tali lelei ‘a e ongo mataki.

Ko tui na‘a nau ‘asi atu ai ‘i he Tahi Kulokula, ‘o hangē ko e ‘alu ‘i he mōmoa; ‘a ia ‘i he ‘ahi‘ahi ki ai ‘e he kakai ‘Isipite na‘e fōngia ai kinautolu.

Ko tui na‘e holo ai ‘a e ngaahi ‘ā ‘o Sielikō, ‘i he hili hono ‘alu takai‘i ‘o ‘aho fitu.

Ko tui na‘a ne fai ai ‘a e Pāsova mo e afuhi ‘aki ‘a e toto, koe‘uhi ke ‘oua na‘a ala kiate kinautolu ‘e ia ‘oku faka‘auha ‘a e ngaahi ‘uluaki.

Ko tui na‘e lau ai ‘e Siosifa ki he ‘Ekisoto ‘a ha‘a ‘Isileli, ‘i he‘ene teu pekia, ‘o ne fai tu‘utu‘uni ki hono ‘anga‘anga.

Ko tui na‘e tāpuaki‘i ai ‘e Sēkope ‘a e ongo foha ‘o Siosifa tāutaha, ‘i he‘ene teu pekia, pea ne hūfaki ki hono ‘ulu‘i tokotoko.

Ko tui ne tāpuaki ai ‘e ‘Aisake ‘a Sēkope mo ‘Īsoa, ‘o ne lau ki he ngaahi me‘a kaha‘u foki.