Hepelū 12
12
Ko ha Kau Fakamo‘oni Tokolahi
1‘AUA, pea ko e me‘a ‘i he kāpui ‘a kitautolu ‘e ha ‘ao kau fakamo‘oni ‘oku fu‘u pehē fau, ko ia ke tau hu‘ihu‘i ‘a e fakamamafa kotoa pē, mo e angahala ‘oku tau mo‘uangofua ki ai, pea tau kītaki atu ‘etau lele he fakapuepue kuo tala humaki mai kiate kitautolu; 2‘o tau sio fakamama‘u atu ki he Takimu‘a ‘i he tui mo hono Fakaa‘u, ‘io, ‘a Sīsū; ‘a ia, ko e me‘a ke ne ma‘u ‘a e fiefia na‘e tala humaki kiate ia, ko ia na‘a ne kātaki ‘a e mate kalusefai, na‘e ‘ikai te ne toka‘i hono fakamaa‘i, pea kuo ne nofo hifo foki mei he to‘omata‘u ‘o e taloni ‘o e ‘Otua.
3Seuke, mou fua kimoutolu mo e Toko Taha na‘a ne kātaki ‘a e fu‘u angatu‘u pehē fau ko ia ‘a e koto angahala kiate kinautolu, telia na‘a mou mafasia he po‘epo‘ea homou laumālie. 4Kuo te‘eki ke mou talitu‘u ke toto ‘i ho‘omou fuhu mo e angahala. 5Pea kuo ngalo ‘aupito ‘iate kimoutolu ‘a e enginaki ‘a ia ‘oku ne lea kiate kimoutolu ‘o hangē ha fānau, Si‘oku foha, ‘oua te ke ta‘etokanga‘i ‘a e kini ‘oku fai ‘e he ‘Eiki, ‘uma‘ā ha‘o vaivai ‘i ho valoki‘i ‘e ia.#Siope 5.17; Pal 3.11-12 (LXX) 6He ko ia ia ‘oku ‘ofa ki ai ‘a e ‘Eiki, ‘a ia ‘oku ne kinisi; ‘io, ‘oku ne taa‘i ‘a e foha takitaha ‘oku ne ma‘u. 7Ko homou kinisi ia ‘oku mou kātaki na: ko e ngaohi ‘o e fānau ia ‘oku fai ‘e he ‘Otua kiate kimoutolu; he ko e fe‘ia ha foha ‘a ia ‘oku ‘ikai ke kinisi ‘e he‘ene tamai? 8He kapau leva ‘oku mou ‘ata‘atā mei he kinisi, ‘a ia kuo ‘inasi ai kotoa pē, pea tā ko e koto tupu fe‘auaki kimoutolu, pea ‘oku ‘ikai ko e fānau. 9Kae‘uma‘ā, na‘a tau ma‘u mu‘a ke kinisi kitautolu ‘a e ngaahi tamai ‘a hotau kakano, pea na‘a tau faka‘apa‘apa ki ai; hono ‘ikai taau ange noa pē ‘etau anganofo ki he Tamai ‘a e ngaahi laumālie, ka tau mo‘ui? 10‘Io, ko e fa‘ahinga ko ē foki na‘a nau kinisi kitautolu ‘o ‘aho si‘i pē, ‘o fakatatau ki he me‘a na‘e hā lelei kiate kinautolu; ka ko e toko taha ko ē, ko e fai ke ‘aonga mo‘oni, koe‘uhiā ke tau kau ‘i he mā‘oni‘oni ‘a‘ana. 11Pea ko eni, ka fai ha kinisi, tala‘ehai ‘oku tau ongo‘i leva ko e me‘a fakafiefia ia, kaekehe, ko e me‘a fakamamahi; ka ‘e faifai pea tupu ai kiate kinautolu kuo ‘osi ‘a ako ai, ha fua ‘oku hoa mo e melino, ko e koto mā‘oni‘oni.
12Ko ia, mou ‘ai ke mafao ‘a e ngaahi nima ‘oku tāupe, mo e ngaahi tui ‘oku mate;#‘Ais 35.3 13pea tofa ‘aki homou topuva‘e ha ngaahi ‘alunga totonu, koe‘uhi ke ‘oua na‘a fasi ‘a si‘i ketu, kaekehe ke ne mo‘ui.
Ko e Fakatokanga he Tafoki mei he ‘Otuá
14Tuli ke mou melino mo e kakai kotoa pē; pea ki he mā‘oni‘oni, ‘a ia ka ‘ikai ma‘u, ‘e ‘ikai mamata ‘e ha taha ki he ‘Eiki. 15‘O mou vakavakai lelei, na‘a ai ha taha kuo ne kamata fakatōtōmui mei he kelesi ‘a e ‘Otua; ‘io, na‘a ai ha aka kona ‘oku tupu hake ‘o fakafiu‘i kimoutolu, pea pihia ai hono kotoa;#Teu 29.18 (LXX) 16‘io, na‘a ‘oku ‘i ai ha taha fe‘auaki, pe ha taha ‘oku fakaetangata pē, hangē ko ‘Īsoa, ‘a ia na‘a ne fakatau ki ha fo‘i me‘akai pē taha ‘a e tu‘unga hoko na‘e ‘o‘ona.#Sēn 25.29-34 17He ‘oku mou ‘ilo, ‘i he faifai pea ne loto mo ia foki ke tō ma‘ana ‘a e tāpuaki, ka na‘e li‘aki pē; ‘io, na‘e ‘ikai te ne ‘ilo ha ava ki he‘ene fakamatala, neongo na‘a ne kumi hakili ki ai, mo tangi lo‘imata.#12.17 na‘á ne kumi hakili ki ai; pe na‘á ne feinga ke ma‘u ‘a e tāpuakí. #Sēn 27.30-40
18He tala‘ehai kuo mou ‘unu‘unu ki he me‘a ‘oku faa‘i, mo e afi kuo tutu, pe ki he loa mo e fakapo‘uli mo e afā, pe ki he le‘o ‘o e talupite mo e ongo mai ha ngaahi fo‘i folofola;#‘Eki 19.16-22; 20.18-21; Teu 4.11-12; 5.22-27 19‘a ia ‘i he fanongo ki ai ‘a e kakai na‘a nau fakafisi, ke ‘oua na‘a toe fai ha lea kiate kinautolu: 20he na‘e ‘ikai te nau kātaki ‘a e me‘a na‘e tu‘utu‘uni, pea neongo ko ha manu pē ‘e lave ki he mo‘unga, ka ‘e tolomaka‘i.#‘Eki 19.12-13 21‘Io, na‘e pehē hono fakailifia ‘o e me‘a na‘e hā, ko ia na‘e pehē ai ‘e Mōsese, ‘Oku ou manavahē ‘aupito mo tetetete.#Teu 9.19
22Ka kuo mou ‘unu‘unu ki he mo‘unga ko Saione, mo e kolo ‘o e ‘Otua Mo‘ui ko Selusalema fakalangi, pea ki he ngaahi toko mano ‘āngelo. 23Ko e kātoanga mo fakataha ‘o e ngaahi ‘uluaki foha kuo tohi ‘i langi, pea ki he ‘Otua ko e Fakamaau ‘o e kakai kotoa pē, pea ki he ngaahi laumālie ‘o e kau angatonu kuo fakahaohaoa. 24Pea kia Sīsū ko e Fakalaloa ‘o e Fuakava Fo‘ou, pea ki he ta‘ata‘a luluku, ‘a ia ‘oku ne lea ‘o lelei hake ‘ia ‘Ēpeli.#Sēn 4.10
25‘Ē, vakai ke ‘oua te mou fakafisi ‘a e toko taha ‘oku lea ni. He kapau na‘e ‘ikai hao ‘e kinautolu, he‘enau fakafisi kiate ia na‘e folofola mai ‘i māmani, huanoa kitaua, ‘o kapau te ta fulitu‘a kiate ia ‘oku folofola mei langi:#‘Eki 20.22 26‘a ‘Ene ‘Afio na‘e lulu‘i ‘e hono le‘o ‘a māmani ‘i he taimi ko ia, ka ‘i he taimi ni kuo ne tala‘ofa ‘o pehē, ‘Oku toe tu‘o taha pē ‘eku lulu, ‘a ia ‘e ‘ikai fai ki māmani pē, ka ki he langi foki. 27Pea ko eni ko e lea ko ia, ‘Oku toe tu‘o taha pē, ‘oku ne fakahā ‘a e ‘ave ‘o e ngaahi me‘a ‘oku lulu‘i, he ko e ngaahi me‘a kuo ngaohi; koe‘uhiā ke tu‘u ai pē ‘a e ngaahi me‘a mata‘elulu‘i.
28Ko ia ko e me‘a ‘i he‘etau ma‘u ha pule‘anga, ‘a ia ‘e ‘ikai fa‘a lulu‘i, ke tau fakafeta‘i mu‘a, pea ke tau fai ai ki he ‘Otua ha ngāue te ne hōhō‘ia ai, fai mo e faka‘apa‘apa mo e manavahē, 29he ko hotau ‘Otua ko e afi faka‘auha.#Teu 4.24
Currently Selected:
Hepelū 12: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
