Kalētiá 2
2
Ko e Paula mo e Kau ‘Aposetolo Kehe
1PEA ‘i he‘ene ‘osi ai pē ‘a e ta‘u ‘e hongofulu mā fā, pea u toe ‘alu hake ki Selusalema fakataha mo Pānepasa: pea u ‘alu mo au ‘a Taitusi foki.#Ngā 11.30; 15.2 2Pea ko ‘eku ‘alu ko ia na‘e ‘i he funga ‘o ha fekau mei he Ta‘ehāmai. Pea na‘a ku fakapā kiate kinautolu ‘i he kōsipeli ‘oku ou malanga‘aki ni ki he Senitaile, kae fakaekimautolu pē mo e kau tu‘ukimu‘a, na‘a ‘iloange ‘e iku noa ‘a e lele ‘oku ou fai, pe ko ia kuo u fai. 3Ka na‘a mo Taitusi, ‘a ia na‘e ‘alu mo au, neongo ko e Kalisi, ka na‘e ‘ikai kouna ke ne kamu: 4ka koe‘uhi pē ko e kau lotu loi kuo moulu mai, ‘a e fa‘ahinga na‘a nau totolo mai ke mataki‘i ‘a e tau‘atāina ‘oku tau ma‘u ‘ia Kalaisi Sīsū, ka nau fai ke fakapōpula‘i ‘aupito kitautolu: 5‘a ia na‘e ‘ikai te mau momo‘i ‘unua ki ai ‘i ha houa ‘e taha, ke fai ‘a e fakavaivai na‘a nau tangi ki ai; koe‘uhi ke nofo ma‘u kiate kimoutolu ‘a e totonu ‘o e Kōsipeli.
6Ka ko e me‘a kiate kinautolu ‘oku lau ko ha me‘a, (ko ia ai pē pe na‘a nau fēfē ‘i mu‘a, ko e hā ia kiate au? Tala‘ehai ‘oku filifilimānako ‘e he ‘Otua ki he tangata) seuke, na‘e ‘ikai ‘omi ha me‘a kiate au ‘e he kau tu‘ukimu‘a na.#Teu 10.17 7Kaekehe, ‘i he‘enau vakai kuo tu‘anaki au, ‘o tuku mai ‘a e Kōsipeli ma‘a e ta‘ekamu, ‘o hangē ā kia Pita ma‘a e kamu; 8(he ko ia na‘a ne tokoni ma‘a Pita ke ne lava ‘ene ngāue faka‘aposetolo ki he ha‘a Kamu, na‘a ne tokoni foki ma‘aku ke u lava ‘eku ngāue ki he Senitaile): 9‘io, ko Sēmisi mo Kīfasi mo Sione, ‘a ia ‘oku lau ko e ngaahi pou, ‘i he‘enau vakai ‘a e kelesi kuo tuku mai kiate au, na‘a nau tuku mai kiate au mo Pānepasa ‘a e nima to‘omata‘u ‘o e kautaha, koe‘uhi ke ‘amaua ‘a e ngāue ki he Senitaile, kae ‘anautolu ‘a e fai ki he ha‘a Kamu. 10Ngata pē, na‘a nau kole ke ma manatua ‘a e kau masiva; ‘a ia foki ko e me‘a pē na‘a ku mātu‘aki loto ke fai.#2.10 na‘á ku; pe kuó u.
Ko e Fakatonutonu ‘e Paula ‘a Pita ‘i ‘Anitioke
11Pea ‘i he hoko mai ‘a Kīfasi ki ‘Aniteoke, na‘a ku tu‘u ke ta‘ofi tonu kiate ia; he na‘e mahino ‘ene hala. 12Koe‘uhi ‘i he te‘eki ke hoko hifo ha ni‘ihi meia Sēmisi, na‘a ne keinanga fakataha mo e Senitaile: ka ‘i he‘enau hoko hifo leva, na‘a ne kamata faka‘ehi‘ehi ‘o nofo kehe, he‘ene manavahē telia ‘a ha‘a kamu. 13Pea fai mālualoi mo ia ‘a hono toe ‘o e kau Siu: ko ia na‘a mo Pānepasa na‘e ‘auhia ‘i he mālualoi ‘anautolu. 14Ka ‘i he‘eku vakai ‘oku ‘ikai ke hu‘ufa tonu ‘enau laka ki he mo‘oni ‘o e Kōsipeli, ko ia na‘a ku lea kia Kīfasi ‘i he ‘ao ‘onautolu kotoa, ‘o pehē, Kapau ‘oku ke mo‘ui faka-Senitaile, ‘o ‘ikai faka-Siu, ‘a koe ko e Siu, pea fakafēfē ai ho‘o tohoaki ‘a e Senitaile ke fai faka-Siu.
Ko e Fakatou Mo‘ui ‘a e Kakai Siú moe Kakai Senitailé ‘i e Tuí
15Neongo ko e tupu Siu kitaua, ‘o ‘ikai ko e ongo angahala mei he Senitaile, 16ka ‘i he‘eta ‘ilo ‘oku ‘ikai fakatonuhia ha tangata mei he ngaahi ngāue faka-Lao, kae ngata pē ‘i he tui kia Sīsū Kalaisi, ko ia, ko kitaua foki na‘a ta tui kia Kalaisi Sīsū, koe‘uhi ke ta ma‘u fakatonuhia mei he tui kia Kalaisi, ‘o ‘ikai mei he ngaahi ngāue faka-Lao: koe‘uhi ko e me‘a ki he ngaahi ngāue faka-Lao, ‘e tu‘u mola ai ‘a e kakano kotoa pē, ‘o ‘ikai hanau fakatonuhia mei ai.#Saame 143.2; Lom 3.20,22 17Pea kapau, lolotonga ‘eta nofo ke ma‘u tonuhia he tu‘u ‘ia Kalaisi, fakafokifā kuo hā ko e ongo angahala foki kitaua, pea tā kuo hoko ‘a Kalaisi ko e tokoni ‘o angahala, ‘ikai ko ia? Molekemama‘o ha me‘a pehē! 18Seuke, kapau kuo te holoki ha ngaahi me‘a, ka te hanga ‘o toe langa hake ‘a e ngaahi me‘a pē ko ia, tā ‘oku ou fakamo‘oni ‘e au ko e fai hala au. 19He ko kita, ko e me‘a ‘i he Lao na‘a te mate ki he Lao; koe‘uhi ke u mo‘ui ki he ‘Otua. 20Kuo tutuki au ki he Kolosi mo Kalaisi: pea ko ‘eku mo‘ui ‘oku fai, ‘oku ‘ikai kei ko au, ka ko e mo‘ui ‘oku fai ‘e Kalaisi ‘iate au: ‘io, ko e mo‘ui ‘oku ou fai ‘eni ‘i he kakano ko e mo‘ui ‘i he tui, ko e tui ki he ‘Alo ‘o e ‘Otua, ‘a ia na‘a ne ‘ofeina au, mo ne foaki ia ‘e ia ke pekia koe‘uhi ko au. 21‘Oku ‘ikai te te fakata‘e‘aonga ‘e kita ‘a e kelesi ‘a e ‘Otua; he kapau ‘oku fou mei he Lao ‘a e mā‘oni‘oni, pea tā na‘e pekia ‘a Kalaisi ta‘ehano ‘uhinga.
Currently Selected:
Kalētiá 2: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
