Kalētiá 3
3
Ko e Tuí pē ‘oku Lava Aí
1‘A e kau Kalētia ta‘eloto, ko hai kuo ne fakamatavalea‘i kimoutolu? ‘A kimoutolu na‘e fehangahangai tonu mo homou mata ‘a Sīsū Kalaisi, hono faka‘ali‘ali ‘o hono kalusefai. 2Ko e me‘a pē ‘eni ‘oku ou fie ‘ilo meiate kimoutolu, pe na‘a mou ma‘u ‘a e Laumālie mei he ngaahi ngāue faka-Lao, pe mei he malanga‘aki ‘o e tui? 3‘Oku pehē fau ho‘omou ta‘eloto? hili ho‘omou kamata ‘i he Laumālie, ‘oku mou nofo ‘eni koā ke fakakakato mei he kakano? 4Ne mou kātaki koā ‘a e ngaahi fu‘u mamahi ko ia ko e me‘a ke ta‘e‘aonga? ‘O kapau mo‘oni kuo ta‘e‘aonga. 5Pea ko eni, ko ia ‘oku ne tuku kiate kimoutolu ‘a e Laumālie, mo ne fakatupu ‘iate kimoutolu ‘a e mafai mana, ‘oku tefito ‘ene fai ki he ngaahi ngāue faka-Lao, pe ki he malanga‘aki ‘o e tui?
6‘Ā, ‘oku hangē pē ko e folofola, Na‘e tui ‘a ‘Epalahame ki he ‘Otua, pea na‘e lau ia ma‘ane mā‘oni‘oni.#Sēn 15.6; Lom 4.3 7Ko ia, ‘oku mou vakai mei ai, ‘Ilonga ‘a kinautolu ‘oku ‘i he tui, ko kinautolu ia ‘a e hako ‘o ‘Epalahame.#Lom 4.16 8Pea ko e Tohitapu, ‘i he‘ene vakai mama‘o ‘i mu‘a ‘a e fakatonuhia ‘e he ‘Otua ‘a e Senitaile mei he tui pē, ko ia na‘a ne malanga‘aki ‘a e Kōsipeli ‘i mu‘a kia ‘Epalahame, ‘o pehē, ‘E monū‘ia ‘iate koe ‘a e fa‘ahinga kotoa pē.#Sēn 12.3 9Ko ia, ko kinautolu ‘oku ‘i he tui, te nau monū‘ia fakataha mo si‘i tui ko ‘Epalahame.
10Seuke, ‘ilonga kinautolu ‘oku tefito ki he ngaahi ngāue faka-Lao, te nau mo‘ulaloa ki ha mala: he kuo tohi, ‘oku mala‘ia ‘a e tangata kotoa pē ‘oku ‘ikai ke nofo‘aki fai ‘a e ngaahi me‘a kotoa pē kuo tohi ‘i he Tohi Lao.#Teu 27.26 (LXX) 11Pea ko eni, ko e pehē ‘oku ‘ikai fakatonuhia ha toko taha ‘i he ‘ao ‘o e ‘Otua he‘ene tu‘unga ki he Lao, ‘oku mahino ia mei he folofola ni, Ko e mā‘oni‘oni te ne mo‘ui mei he tui.#3.11 Ko e mā‘oni‘oni te ne mo‘ui mei he tui; pe ‘Oku ngali tonu hono hiki ‘o: ‘Oku ngata pē ‘i ha taha kuo fakalelei mo e ‘Otuá ‘i he tuí, ‘e mo‘uí, pe Ko ia kuo fakalelei mo e ‘Otuá, ‘e mo‘ui ‘i he tui. #Hap 2.4 12Ka ko e Lao ‘oku ‘ikai tefito ki he tui: ka ‘oku pehē ‘e he Folofola, Ko ia kuo ne fai ‘a e ngaahi me‘a ko ia te ne mo‘ui ai.#Lev 18.5
13Ne huhu‘i kitautolu ‘e Kalaisi mei he mala‘ia faka-Lao, he‘ene hoko ko e koto mala‘ia koe‘uhi ko kitautolu; (he kuo tohi, ‘Ilonga ‘a ia ‘oku tautau ‘i ha ‘akau ko e mala‘ia ia):#Teu 21.23 14koe‘uhi ke hoko ki he Senitaile ‘ia Sīsū Kalaisi ‘a e tāpuaki ‘a ‘Epalahame; ka tau ma‘u ‘i he‘etau tui ‘a e tala‘ofa, ko e Laumālie.
Ko e Laó mo e Tala‘ofa
15Kāinga, ka u lea fakaetangata: neongo ko e fuakava ‘a ha tangata, ka ‘o kapau kuo fakapapau ia, tala‘ehai ‘oku tāmate‘i ia ‘e ha taha, pe fakalahi. 16Pea ko eni, na‘e fai ‘a e ngaahi tala‘ofa ma‘a ‘Epalahame mo hono hako. ‘Oku ‘ikai te ne pehē, Pea mo ho ngaahi hako, ‘o hangē ko ha‘ane lau ki ha tokolahi; ka hangē ko ‘ene lau ki ha toko taha pē, ‘o pehē, Pea mo ho hako: ‘a ia ko Kalaisi.#Sēn 12.7 17Pea ko ‘eni ia ‘a e me‘a ‘oku ou lau ki ai, ko e Fuakava ‘a ia kuo loa hono fakapapau ‘e he ‘Otua, ‘e ‘ikai lava ‘e he Lao ke vete ia, ‘o fakaka‘anga ‘a e Tala‘ofa: he na‘e ki mui ‘ene hoko ‘a‘ana, kuo hili ‘a e ta‘u ‘e fāngeau mā tolungofulu.#‘Eki 12.40 18He kapau na‘e tefito ki he Lao ‘a e ma‘u ‘o e tofi‘a, tā ‘oku ‘ikai tefito ki he Tala‘ofa: ka na‘e tō ia kia ‘Epalahame ko e me‘a‘ofa ‘a e ‘Otua, koe‘uhi ko e Tala‘ofa.#Lom 4.14
19Pea kapau ko ia, pea ko e hā ai ‘a e Lao? ‘Ā, na‘e kanoni ‘aki ia koe‘uhi ko e ngaahi fai hala, kae‘oua ke hoko mai ‘a e hako ne fai ki ai ‘a e tala‘ofa; pea na‘e talafono ‘aki ‘e ha kau ‘āngelo, ‘o fakafai ‘i ha fakalaloa. 20Pea ko eni, ko ha fakalaloa ‘oku ‘ikai ko ha me‘a ‘o ha fa‘ahi taha: ka ko e ‘Otua ‘oku taha tofu pē.#3.20 ka ko e… tofu pē; pe pea ‘oku ngāue tokotaha pē ‘a e ‘Otuá ia.
Ko e Taumu‘a ‘o e Laó
21Pea kapau ko ia, pea ‘oku fepaki koā ‘a e Lao mo e ngaahi tala‘ofa ‘a e ‘Otua, ‘ō? Molekemama‘o! seuke ka ne ‘omi ha lao ‘a ia te ne lava ke fakamo‘ui ‘a e mate, pehē ‘e tefito mo‘oni ‘a e fakatonuhia ki he Lao. 22Kaekehe na‘e loki ‘e he folofola ‘a e me‘a kotoa pē ke mo‘ulaloa ki he angahala, koe‘uhi ke foaki ‘a e tala‘ofa ki he kakai tui, koe‘uhi pē ko e tui kia Sīsū Kalaisi.
23Ka ‘i he te‘eki ke hoko mai ‘a e tui, na‘e tauhi pilīsone kitaua ‘i he pule ‘a Lao, ‘o loki ki he tui na‘e ene ke faka‘ilo mei he Ta‘ehāmai. 24Pea tā ko e Lao ko hota fakale‘o ma‘a Kalaisi, kae fakatonuhia kitaua mei he tui. 25Ka ‘i he hoko mai ko eni ‘a e tui, pea ‘oku ‘ikai te ta kei fāiekina ki ha fakale‘o.
26Seuke, ko e ngaahi Foha ‘o e ‘Otua ‘a kimoutolu kotoa pē, ko e me‘a ‘i he tui ‘oku fai kia Kalaisi Sīsū. 27‘Io, ‘ilonga kimoutolu na‘e papitaiso kia Kalaisi, na‘a mou kofu ‘aki ai ‘a Kalaisi. 28‘Oku ‘ikai ai ha Siu pe ha Kalisi, ‘oku ‘ikai ai ha pōpula pe ha tau‘atāina, ‘oku ‘ikai ai ke tangata mo fefine: he ko kimoutolu kātokatoa ko e toko taha tofu pē ‘ia Kalaisi Sīsū. 29Pea kapau ko e konga ‘o Kalaisi ‘a kimoutolu, pea tā ko e hako ‘o ‘Epalahame ‘a kimoutolu, ko e ngaahi ‘ea ‘o fakatatau ki he Tala‘ofa.#Lom 4.13
Currently Selected:
Kalētiá 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
