Kalētiá 1
1
1TŪ KO KIMAUTOLU–‘a Paula ko ha ‘aposetolo, (ka na‘e ‘ikai tupu ‘eku lakanga mei ha tu‘unga tangata, ‘uma‘ā hano ‘omi ‘e ha tangata, ka na‘e ‘omi ‘e Sīsū Kalaisi, pea mo e ‘Otua ko e Tamai, ‘a ia na‘a ne fokotu‘u ia mei he pekia); 2pea mo e kāinga lotu kotoa pē ‘oku fononga mo au–ko ‘emau tohi ki he ngaahi siasi ‘o Kalētia.
3‘Ofa ke mou ma‘u kelesi mo e fiemālie mei he ‘Otua ko e Tamai, mo hotau ‘Eiki ko Sīsū Kalaisi, 4‘a ‘Ene ‘Afio na‘a ne foaki ia ‘e ia koe‘uhi ko ‘etau ngaahi angahala, ke ne fakahaofi kitautolu mei he nofo kovi ‘oku lolotonga ni: ‘o fakatatau ki he finangalo ‘o e ‘Otua ko ‘etau Tamai. 5Ke ‘o ‘Ene ‘Afio ‘a e kolōlia ‘o lauikuonga pea ta‘engata! ‘Ēmeni.
Ko e Kōsipeli pē ‘e Taha
6‘Oku te ofo ‘i he vave pehē fau ho‘omou kamata tafoki meiate ia na‘a ne fakaului kimoutolu ‘aki ‘a e kelesi ‘a Kalaisi,#1.6 ‘a e kelesi ‘a Kalaisi; ‘Oku pehē ‘i hono ngaahi hiki fuoloa ‘e ni‘ihi: ‘ene kelesí. ‘o mou hiki ki ha kōsipeli kehe. 7‘A ia ‘oku ‘ikai ko ha kōsipeli; kehe ‘oku ai ha ni‘ihi ‘oku ue‘i kimoutolu, mo nau feinga ke liliu ‘a e Kōsipeli ‘o Kalaisi. 8Ka neongo ko kimautolu, pe ko ha ‘āngelo mei Langi, ka ‘o kapau te ne malanga‘aki ha kōsipeli ‘oku makehe atu mo ia na‘a mau malanga‘aki atu, ke ne hoko ko e mala‘ia. 9Hangē ko ‘emau lea mu‘a, ko ia ‘oku ou toe tala ni, kapau ‘e malanga‘aki atu ‘e ha taha ha kōsipeli ‘oku makehe atu mo ia na‘a mou ma‘u, ke ne hoko ko e mala‘ia.
10He ko e fē ‘eni ‘oku ou fai ke loto mai? ‘a e kakai, pe ko e ‘Otua? Pe ko ‘eku feinga ‘eni ke mālie‘ia ‘a e kakai? Ka ne u kei fai ke mālie‘ia ‘a e kakai ‘iate au, pehē ‘oku ‘ikai te u nofo ni ko ha pōpula ‘a Kalaisi.
Ko e Fakamatala ‘a Paula ki he‘ene Hoko ko e ‘Apositolo
11Pea ko eni, kāinga, ‘oku ou fakamahino atu, ko e kōsipeli ne malanga‘aki ‘e au, ‘oku ‘ikai ko ha me‘a fakaetangata ia. 12He ko ‘ete ma‘u ia foki ‘e kita, tala‘ehai ko e ma‘u mei ha tangata, pe ‘i he‘ete ako, ka ko e fakahā mei he ta‘ehāmai ‘e Sīsū Kalaisi.
13He na‘a mou fanongo ki he‘eku tō‘onga mu‘a ‘i he lotu faka-Siu; ‘a e makehe atu ‘o ‘eku fakatanga‘i ‘a e siasi ‘a e ‘Otua, mo ‘eku laiki ia:#Ngā 8.3; 22.4-5; 26.9-11 14mo ‘eku ‘amo atu ‘i he tokolahi ‘o hoku kakai na‘e to‘ume‘a mo au ‘i he lotu faka-Siu, ‘o u hulu atu ‘i he mamahi‘i ‘o e ngaahi tu‘utu‘uni na‘e tukufakaholo mei he‘eku ngaahi kui.#Ngā 22.3
15Ka ko e ‘Otua, ‘a ia na‘a ne polo‘i au mei he manava ‘o ‘eku fa‘ē, mo ne ui au ‘aki ‘ene kelesi.#Ngā 9.3-6; 22.6-10; 26.13-18 16‘I he ‘iloange na‘a ne finangalo ke faka‘ilo mei he ta‘ehāmai ‘a hono ‘Alo ‘i hoku loto, koe‘uhi ke u ongoongoa ai pē ia ‘i he lotolotonga ‘o e Senitaile; ko e me‘a na‘a ku fai leva na‘e ‘ikai te u huhū ki ha kakano mo toto, 17‘uma‘ā ha‘aku ‘alu hake ki Selusalema kiate kinautolu na‘e tomu‘a ‘aposetolo ‘iate au, ka te ‘alu pē mei he potu ko ia ki ‘Ālepea, pea u toe foki mei ai ki Tāmasikusi. 18Pea na‘e toki hili ‘a e ta‘u ‘e tolu, pea u ‘alu hake ki Selusalema ke ‘a‘ahi kia Kīfasi; pea u nofo mo ia ‘o ‘aho hongofulu mā nima.#Ngā 9.26-30 19Ka na‘e ‘ikai te ma fe‘iloaki mo ha taha kehe ‘o e kau ‘Aposetolo, ko Sēmisi pē ko e tokoua ‘o e ‘Eiki.#1.19 mo ha taha kehe ‘o e kau ‘aposetolo, ko Sēmisi pē; pe mo ha toe ‘aposetolo; ko e tokotaha pē na‘á ku sio ki aí ko Sēmisi.
20Pea ko e ngaahi me‘a ‘oku ou tohi atu, ko e ‘Otua ē, ‘oku ‘ikai ko ‘eku loi.
21Hili ia na‘a ku ‘alu ki he ngaahi feitu‘u ‘o Sīlia mo Silisia: 22pea u nofo ai pē, ‘o ‘ikai ‘iloa hoku mata ni ‘e he ngaahi siasi ‘o Siutea na‘e Kalisitiane: 23ka na‘e ngata pē ‘i he‘enau fa‘a ma‘u talanoa, Tokua, ko ia na‘a ne fakatanga mu‘a kiate kitautolu, ‘oku ne malanga‘aki ‘eni ‘a e lotu na‘a ne motu‘a laiki. 24Pea nau fakahīkihiki‘i ‘a e ‘Otua he‘ene hā ‘iate au.
Currently Selected:
Kalētiá 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
