KO TEUTALŌNOME 5
5
Ko e Fekau ‘e Hongofulú
(‘Eki 20.1-17)
1PEA ui ange ‘e Mōsese ‘a ha‘a ‘Isileli kātoa, ‘o ne pehē kiate kinautolu, Fanongo mai, ‘a ‘Isileli, ki he ngaahi fekau mo konisitūtone, ‘a ia ‘oku ou ‘a‘au ‘i homou telinga he ‘aho ni, ke mou ako ai, ‘o tokanga ke fai ia. 2Ko Sihova ko hotau ‘Otua na‘a ne feia ha fuakava mo kitautolu ‘i Hōlepi. 3Na‘e ‘ikai ko ‘etau ngaahi tamai na‘a ne fai ai ‘a e fuakava ni, ka ko kitaua pē, ‘a kitautolu ‘oku fehaofaki mo‘ui he ‘aho ni. 4Ko e fefolofolai ‘a Sihova mo kimoutolu ‘i he mo‘unga mei he loto afi ko e femātaaki. 5Na‘a ku tu‘u ‘i he vaha‘a ‘o Sihova mo kimoutolu ‘i he taimi ko ia ke fakahā kiate kimoutolu ‘a e folofola ‘a e ‘Eiki: he na‘a mou manavahē ‘i he ‘ao ‘o e afi, ‘o ‘ikai te mou ‘alu hake ki he mo‘unga; pea ne folofola mai:
6Ko au ko Sihova ko ho ‘Otua, ‘a ia na‘a ku ‘omi koe mei ‘Isipite, mei he fale pōpula.
7‘Oua na‘a ai hao ‘Otua kehe, ‘o ua ‘aki au.
8‘Oua te ke ngaohi ma‘au ha tamapua, ha momo‘i fakatātā ‘o ha me‘a ‘o e langi ‘i ‘olunga na, pe ‘o māmani ‘i lalo ni, pe ‘o e tahi ‘i lolofonua:#Lev 26.1; Teu 4.15-18; 27.15 9‘oua te ke hū ki ai, pea ‘oua te ke tauhi ki ai: he ko au Sihova ko ho ‘Otua ko e ‘Otua fua‘a au, ‘oku ou ‘eke ‘a e kovi ‘a e mātu‘a ki he fānau, ‘o a‘u ki he tolu mo e faa‘i to‘utangata, ‘a kinautolu ‘oku fakafili mai;#‘Eki 34.6-7; Nōm 14.18; Teu 7.9-10 10ka ‘oku ou fai meesi ki he afe‘i to‘utangata,#5.10 afe‘i to‘utangata; pe toko lauiafe. ‘a kinautolu ‘oku ‘ofa kiate au, mo tauhi ‘eku ngaahi fekau.
11‘Oua te ke takuanoa ‘a e huafa ‘o Sihova ko ho ‘Otua: he ‘e ‘ikai lau ‘e Sihova ‘oku ta‘ehalaia ia ‘a ia ‘oku ne takuanoa hono huafa.#Lev 19.12
12Tokanga ki he ‘aho Sāpate ke tauhi ia ke tapu, ‘o hangē ko e tu‘utu‘uni koe ‘e Sihova ko ho ‘Otua.#‘Eki 16.23-30; 31.12-14 13Ko e ‘aho ‘e ono te ke ngāue, ‘o fai ai ho ngaahi nafa kehekehe;#‘Eki 23.12; 31.15; 34.21; 35.2; Lev 23.3 14ka ko hono ‘aho fitu ko e Sāpate ia ‘a Sihova ko ho ‘Otua; tapu ha‘o fai ai ha momo‘i ngāue, ‘a koe mo ho‘o fānau tangata pe fānau fefine, ko ho‘o tamaio‘eiki pe ko ho‘o kaunanga, pe ko ho‘o pulu, pe ko ho‘o ‘asi, pe ha taha ‘o ho‘o fanga manu, pe ko ha ‘āunofo ‘oku ‘i ho kolo; koe‘uhi ke mālōlō ‘a ho‘o tamaio‘eiki mo ho‘o kaunanga ‘o hangē ko koe. 15Pea te ke manatu na‘a ke nofo koe ko e tamaio‘eiki ‘i ‘Isipite, pea na‘e fakahao mai koe ‘e Sihova ko ho ‘Otua ‘aki ha nima mālohi mo ha nima kuo hiki tā: ko hono ‘uhinga ia na‘e tu‘utu‘uni koe ‘e Sihova ko ha ‘Otua ke tauhi ‘a e ‘aho Sāpate.
16Faka‘apa‘apa ki ho‘o tamai mo ho‘o fa‘ē, ‘o hangē ko e tu‘utu‘uni koe ‘e Sihova ko ho ‘Otua: koe‘uhi ke lahi ho ngaahi ‘aho, pea koe‘uhi ke ke tu‘umālie ‘i he kelekele ‘oku foaki kiate koe ‘e Sihova ko ho ‘Otua.#Teu 27.16; Māt 15.4; 19.19; Ma‘ake 7.10; 10.19; Luk 18.20; ‘Efe 6.2,3
17‘Oua na‘a ke fakapō.#Sēn 9.6; Lev 24.17; Māt 5.21; 19.18; Ma‘ake 10.19; Luk 18.20; Lom 13.9; Sēm 2.11
18Pea ‘oua na‘a ke tono ‘unoho.#Lev 20.10; Māt 5.27; 19.18; Ma‘ake 10.19; Luk 18.20; Lom 13.9; Sēm 2.11
19Pea ‘oua na‘a ke kaiha‘a.#Lev 19.11; Māt 19.18; Ma‘ake 10.19; Luk 18.20; Lom 13.9
20Pea ‘oua na‘a ke tu‘u ko e fakamo‘oni loi ki ho kaungā‘api.#‘Eki 23.1; Māt 19.18; Ma‘ake 10.19; Luk 18.20
21‘Oua te ke holi ki he uaifi ‘o ho kaungā‘api; pea ‘oua te ke mānumanu ki he fale ‘o ho kaungā‘api, ki hano ‘api, pe ki ha‘ane tamaio‘eiki, pe ki ha‘ane kaunanga, ki ha‘ane pulu, pe ki ha‘ane ‘asi, pe ki ha me‘a ‘e taha ‘oku ‘a ho kaungā‘api.#Lom 7.7; 13.9
22Ko e ngaahi lea ko ia na‘e folofola‘aki mai ‘e Sihova ki ho‘omou fakataha kātoa ‘i he mo‘unga, mei he loto afi, mei he loa mo e po‘uli matolu, ‘o le‘o lahi: pea ‘ikai ha‘ane toe folofola. Pea ne tohi ia ‘i ha ongo makatohi, ‘o ‘omi kia au.#Hep 12.18-19
Ko e Manavahē ‘a e Kakaí
(‘Eki 20.18-21)
23Pea ‘i he ‘iloange na‘a mou fanongo ki he le‘o mei he fakapo‘uli, kae vela ‘a e mo‘unga ‘i he afi, na‘a mou ‘unu‘unu mai kiate au, ‘a e hou‘eiki ‘o homou ngaahi matakali, mo homou kau mātu‘a; pea na‘a mou pehē, 24Ko eni, ko Sihova ko hotau ‘Otua kuo ne fakahā mai hono lāngilangi mo hono fotu, pea kuo mau ongo‘i hono le‘o mei he loto afi: kuo mau mamata he ‘aho ni tā ‘oku fefolofolai ‘a e ‘Otua mo e tangata ka ne mo‘ui pē. 25Pea ko eni, kae‘uma‘ā ke mau mate he keina kimautolu ‘e he afi lahi ni? kapau te mau toe fanongo ki he le‘o ‘o hotau ‘Otua pea te mau mate. 26He ko hai ‘i he kakano kotoa pē kuo ongo‘i ‘a e le‘o ‘o e ‘Otua Mo‘ui ‘oku ne folofola mei he loto afi, ‘o hangē ko kitautolu, ka ne mo‘ui? 27‘Unu‘unu atu koe, ‘o tali ‘a e me‘a kehekehe ‘oku folofola‘aki mai ‘e Sihova ko hotau ‘Otua, pea ke ‘a‘au mai kiate kimautolu ‘a e ngaahi me‘a ‘e fakahā kiate koe ‘e Sihova ko hotau ‘Otua; pea te mau fanongo fie fanongo, ‘o fai ki ai.
28Pea na‘e ongo‘i ‘e Sihova ‘a e le‘o ‘o ho‘omou ngaahi lea ‘i ho‘omou fai kiate au, pea ne folofola mai, Kuo u ongo‘i ‘a e le‘o ‘o e lea ‘a e kakai ni, ‘a ia kuo nau fai kiate koe: ‘oku lelei kotoa ‘a e lea kuo nau fai. 29Pehēange mai kuo pehē honau loto ma‘u pē, ke nau ‘apasia kiate au, mo tauhi ‘eku ngaahi fekau, koe‘uhi ke nau tu‘umālie mo ‘enau fānau foki, ‘o ta‘engata! 30‘Alu ‘o tala kiate kinautolu, Mou foki ki homou ngaahi tēniti. 31Ka ko koe, ke ke tu‘u heni, ‘o taka ofi kiate au, pea te u ‘a‘au kiate koe ‘a e ngaahi tu‘utu‘uni mo lao mo konisitūtone, ‘a ia te ke ako‘i kiate kinautolu, ke nau fai ‘i he fonua ‘oku ou foaki kiate kinautolu ke ma‘u.
32Ko ia ke mou tokanga ke fai ‘o fakatatau ki he tu‘utu‘uni ‘a Sihova ko homou ‘Otua kiate kimautolu: ‘e ‘ikai te mou afe ki he to‘omata‘u pe ko e to‘ohema. 33Ko e hala kotoa kuo tu‘utu‘uni ‘e Sihova ko homou ‘Otua ma‘amoutolu, te mou fou ai; koe‘uhi ke mou mo‘ui, pea ke mou tu‘umālie, pea ke lahi homou ngaahi ‘aho ‘i he fonua te mou ma‘u.
Currently Selected:
KO TEUTALŌNOME 5: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
