KO TEUTALŌNOME 6
6
Ko e Fekau Lahí
1PEA ko eni ‘a e ngaahi fekau mo lao mo konisitūtone kuo fekau ‘e Sihova ko homou ‘Otua ke ako kiate kimoutolu, ke mou fai ki ai ‘i he fonua ‘oku mou ‘alu ki ai ke ma‘u. 2Koe‘uhi ke ke ‘apasia kia Sihova ko ho ‘Otua ke tauhi ‘ene ngaahi fekau mo tu‘utu‘uni ‘a ia ‘oku ou kouna atu, ‘a koe, mo ho foha, mo e foha ‘o ho foha, ‘i he ‘aho kotoa pē ‘o ho‘o mo‘ui, pea koe‘uhi ke lahi ho ngaahi ‘aho. 3Ko ia ke ke fanongo mai, ‘a ‘Isileli, ‘o tokanga ke fai ki ai; ka ke tu‘umālie, mo ke tupu lahi, ‘o hangē ko e folofola kiate koe ‘e Sihova ko e ‘Otua ‘o ho‘o ngaahi kui, ‘i he fonua ‘oku mahutafea ‘i he hu‘akau mo e honi.
4Fanongo mai, ‘a ‘Isileli, Ko Sihova ko hotau ‘Otua ko e taha‘i Sihova ia:#6.4 Ko Sihova… Sihova ia; pe Ko Sihova, ko hotau ‘Otuá, ko e ‘otuá pē ia; pe Ko Sihova ko hotau ‘Otuá ‘oku taha pē. #Ma‘ake 12.29 5pea te ke ‘ofa ki he ‘Eiki ko ho ‘Otua ‘aki ‘a e kotoa ‘o ho loto, mo e kotoa ‘o ho laumālie, mo e kotoa ‘o ho ivi.#Māt 22.37; Ma‘ake 12.30; Luk 10.27 6Pea ko e ngaahi fo‘i folofola ko eni ‘oku ou kouna atu he ‘aho ni ‘e fuesia ‘e ho loto:#Teu 11.18-20 7pea te ke uhu‘i ki ho‘o fānau, pea te ke lea ki ai ‘i ho‘o nofo ‘i ho fale, pea ‘i ho‘o ‘alu ‘i he hala, pea ‘i ho‘o tokoto hifo, pea ‘i ho‘o tu‘u hake. 8Pea te ke no‘o ia mo‘o faka‘ilonga ‘i ho nima, pea te nau tu‘u mo‘o failaketeli ‘i ho vaha‘a mata. 9Pea te ke tohi ia ki he ngaahi pou matapā ‘o ho fale, pea ki ho ngaahi matanikolo.
10Pea ka faifai pea fakahū koe ‘e Sihova ko ho ‘Otua ki he fonua na‘a ne fuakava ai ki ho tupu‘anga, kia ‘Epalahame, kia ‘Aisake, pea kia Sēkope, tokua te ne foaki ia kiate koe; ko e ngaahi kolo lalahi mo lelei, ‘a ia na‘e ‘ikai te ke langa,#Sēn 12.7; 26.3; 28.13 11mo e ngaahi fale kuo fonu ‘i he ngaahi lelei fua pē, ka na‘e ‘ikai ko ho‘o fakafonu, mo e ngaahi lepa tā, ka na‘e ‘ikai ko ho‘o tā, ‘a e ngaahi ngoue vaine mo e ngaahi fu‘u ‘ōlive na‘e ‘ikai te ke tō, pea ke kai ai ‘o mākona; 12pea ke ke toki lamasi koe na‘a ngalo ‘a e ‘Eiki, ‘a ia ne ne fakahao mai koe mei ‘Isipite, ‘a e fale pōpula. 13Ko Sihova ko ho ‘Otua te ke ‘apasia ki ai, pea ko ia ia te ke tauhi ki ai, pea ko hono huafa te ke fuakava ai.#Māt 4.10; Luk 4.8 14‘E ‘ikai te ke muimui ki ha ngaahi ‘otua kehe, hani ‘otua ‘o e ngaahi kakai ‘oku nofo takatakai kiate kimoutolu; 15he ko e ‘Otua fua‘a ‘a Sihova, ‘a ho ‘Otua ‘oku ‘afio ‘i ho lotolotonga; na‘a langa‘i ai ‘a e houhau ‘a Sihova ko ho ‘Otua, pea ne faka‘auha koe mei he funga kelekele.
16‘E ‘ikai te mou ala ‘aki kia Sihova ko homou ‘Otua, ‘o hangē ko ho‘omou ala ‘aki kiate ia ‘i Masa.#‘Eki 17.1-7; Māt 4.7; Luk 4.12 17Te mou tauhi ke matauhi ‘a e ngaahi tu‘utu‘uni ‘a Sihova ko homou ‘Otua, mo ‘ene ngaahi fakamo‘oni, mo ‘ene ngaahi fekau, ‘a ia kuo ne tu‘utu‘uni atu. 18Pea te ke fai ‘a e me‘a ‘oku hā totonu mo lelei kia Sihova, koe‘uhi ka ke tu‘umālie, pea ke hū atu ‘o ma‘u ‘a e fonua lelei na‘e fuakava ai ‘a Sihova ki ho‘o ngaahi kui, 19ka ne kapusi ho ngaahi fili mei ho ‘ao: ‘o hangē ko e folofola ‘a e ‘Eiki.
20Ka ‘eke kiate koe ‘e ho foha ‘amui, ‘o pehē, Ko e hā ‘a e ngaahi fakamo‘oni, mo e ngaahi fekau mo konisitūtone, ‘a ia kuo tu‘utu‘uni atu ‘e Sihova ko hotau ‘Otua? 21Pea te ke toki pehē ki ho foha, Na‘a mau nofo ko e kau tamaio‘eiki kia Felo ‘i ‘Isipite; 22pea na‘e fakahao mai kimautolu ‘e Sihova mei ‘Isipite ‘aki ‘a e nima mālohi: pea na‘e ‘ai ‘e Sihova ha ngaahi faka‘ilonga mo me‘a fakaofo, ko e ngaahi me‘a lalahi mo kovi ki ‘Isipite, kia Felo mo hono fale kotoa, ka mau sio ki ai: 23pea ne fakahū mai kimautolu mei ai koe‘uhi ke ne fakahū kimautolu, ke ne foaki mai ‘a e fonua na‘a ne fuakava ai ki he‘etau ngaahi kui. 24Pea na‘e fekau mai ‘e Sihova ke fai ‘a e ngaahi fekau ni kotoa, ke ‘apasia kia Sihova ko hotau ‘Otua, ma‘a ‘etau lelei ai pē, koe‘uhi ke ne fakahaofi mo‘ui kitautolu, ‘o hangē ko ia he ‘aho ni. 25Pea ‘e tu‘u ia ma‘atau mā‘oni‘oni, ‘o kapau te tau tokanga ke fai hono kotoa ‘o e fekau ni ‘i he ‘ao ‘o Sihova ko hotau ‘Otua, ‘o hangē ko ‘ene tu‘utu‘uni mai.#6.25 Pea ‘e tu‘u ia… ko ‘ene tu‘utu‘uni mai. pe Ko e me‘a ‘oku totonu ke tau faí, ko ‘etau tokanga ke fai e me‘e kotoa pē kuo fekau ‘e he ‘Otuá ke tau faí.
Currently Selected:
KO TEUTALŌNOME 6: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
