KO TEUTALŌNOME 4
4
Ko Hono Fakakouna ‘e Mōsese ‘a e Kakaí ke nau Talangofua
1PEA ko eni, ‘e ‘Isileli, ke ke tokanga ki he ngaahi tu‘utu‘uni mo konisitūtone, ‘a ia ‘oku ou ako ni kiate kimoutolu, ke fai ki ai; koe‘uhi ke mou mo‘ui, pea ke mou hū, ‘o ma‘u ‘a e fonua ‘oku foaki atu ‘e Sihova, ko e ‘Otua ‘o ho‘omou ngaahi kui. 2‘E ‘ikai te mou fakalahi, pea ‘e ‘ikai te mou fakasi‘isi‘i ki he me‘a ‘oku ou tu‘utu‘uni atu, ‘i ho‘omou tauhi ‘a e ngaahi fekau ‘a Sihova ko homou ‘Otua, ‘a ia ‘oku ou kouna atu.#Fkhā 22.18-19 3Ko homou mata na‘e māta‘i ‘a e me‘a na‘e fai ‘e Sihova ‘ia Peali-Peoli: he ‘ilonga ha tangata na‘e muimui kia Peali-Peoli kuo faka‘auha ia ‘e Sihova ko ho ‘Otua mei ho lotolotonga.#Nōm 25.1-9 4Ka ko kimoutolu na‘e pīkitai kia Sihova ko homou ‘Otua ‘oku mou mo‘ui kotoa pē he ‘aho ni.
5Vakai, kuo u ako kiate kimoutolu ha ngaahi tu‘utu‘uni mo konisitūtone, ‘o hangē ko hoku fekau ‘e Sihova ko hoku ‘Otua, ke mou fai hangē ko ia ‘i he fonua ‘oku mou ‘alu ki ai ke ma‘u. 6Ko ia mou tauhi ia, mo fai ki ai; he ko ho‘omou ngali poto ia, mo ho‘omou ngali ‘atamai ‘i he vakai ‘a e ngaahi kakai, ‘a ia te nau fanongo ki he koto tu‘utu‘uni ni, pea te nau pehē, Tā ko e fu‘u pule‘anga ni ko e kakai poto mo ‘atamai.
7He ko e fe‘ia ha fu‘u pule‘anga ‘oku ai hanau ‘Otua ofi mai, ‘o hangē ko e ofi ‘a Sihova ko hotau ‘Otua ‘oka tau ka tautapa ki ai? 8Pea ko e fe‘ia ha fu‘u kakai ‘oku ai ha‘anau ngaahi tu‘utu‘uni mo konisitūtone totonu, ‘o hangē ko e lao ko ‘eni ‘a ia ‘oku ou tuku ‘i homou ‘ao he ‘aho ni? 9Kae sinoeme‘a ke ke tokanga kia koe, mo lamalama lahi ho laumālie ‘i he ‘aho kotoa pē ‘o ho‘o mo‘ui, na‘a ngalo ‘a e ngaahi me‘a ne māta‘i ‘e ho mata, pea na‘a mole ia mei ho loto; ka ke fakamatala ia ki ho‘o fānau, mo e fānau ‘a ho‘o fānau– 10‘a e ‘aho na‘a ke tu‘u ‘i he ‘ao ‘o Sihova ko ho ‘Otua ‘i Hōlepi,#4.10 Hōlepi; pe Sainai. mo e folofola mai ‘a Sihova, Fakataha mai ‘a e kakai kiate au, ka u tuku ke nau ongo‘i ‘eku lea, ke nau ako ai ke ‘apasia kiate au lolotonga ‘oku nau mo‘ui ‘i he funga kelekele, pea ke nau ako ‘enau fānau.
11Pea na‘a mou ‘unu‘unu mai, ‘o mou tutu‘u ‘i he lalo mo‘unga; pea na‘e vela ‘a e mo‘unga ‘i he afi ‘o a‘u ki he loto langi; ai mo e fakapo‘uli, ‘a e loa, mo e po‘uli matolu.#‘Eki 19.16-18; Hep 12.18-19 12Pea na‘e folofola ‘a Sihova kiate kimoutolu mei he loto afi: ko e le‘o ‘o e ngaahi lea na‘a mou ongo‘i, ka na‘e ‘ikai te mou sio ha ‘ata‘i me‘a, ko e le‘o pē. 13Pea na‘a ne fakamatala kiate kimoutolu ‘ene fuakava, ‘a ia na‘a ne tu‘utu‘uni ke mou fai ki ai, ‘a e Hongofulu‘i Fekau: ‘o ne tohi ‘i ha ongo makatohi.#‘Eki 31.18; 34.28; Teu 9.10 14Pea na‘a ne fekau au ‘i he taimi ko ia ke ako kiate kimoutolu ha ngaahi tu‘utu‘uni mo konisitūtone, ke mau fai ki ai ‘i he fonua ‘oku mou laka atu ki ai ke ma‘u.#‘Eki 21.1
Ko e Fakatokanga he Tauhi ‘Aitolí
15Ko ia, ke mou lamalama ‘aupito homou laumālie, he na‘e ‘ikai te mou momo‘i sio ki ha ‘ata‘i me‘a ‘i he ‘aho na‘e folofola mei ai ‘e Sihova kiate kimoutolu ‘i Hōlepi mei he loto afi: 16na‘a ‘iloange te mou fakalielia‘i kimoutolu, ‘o mou ngaohi ma‘amoutolu ha tamapua, ko e fakatātā ‘o ha me‘a, ko e tatau ‘o ha tangata pe fefine,#‘Eki 20.4; Lev 26.1; Teu 5.8; 27.15 17ko e tatau ‘o ha manu ‘o e fonua, ko e tatau ‘o ha manu kapakau ‘oku puna ‘i he ‘atā,#Lom 1.23 18ko e tatau ‘o ha me‘a ‘oku totolo ‘i he kelekele, ko e tatau ‘o ha ika ‘oku ‘i he vai ‘i lolofonua. 19Pea na‘a ke tāngaki ho mata ki langi, pea ke sio ki he la‘ā mo e māhina mo e ngaahi fetu‘u, ‘a e hōsitē kotoa ‘o langi; pea na‘a tohoaki ai koe, ‘o ke lotu ki ai mo tauhia; ‘osi, ko e me‘a ia kuo vahe ‘e he ‘Eiki ko ho ‘Otua ki he ngaahi kakai kotoa ‘i lalo langi. 20Ka ko kimoutolu kuo to‘o ‘e Sihova, pea kuo ne ‘omi mei he fōnise haka ‘aione, mei ‘Isipite, ke mou nofo ko hono kakai tofi‘a, ‘o hangē ko ia he ‘aho ni.#‘Eki 19.5; Teu 7.6; 14.2; 26.18; Tait 2.14; 1 Pit 2.9 21Pea na‘e ‘ita foki ‘a Sihova kiate au koe‘uhi ko kimoutolu, ‘o ne fuakava ‘e ‘ikai te u a‘a atu ‘i Soatani, ‘o ‘ikai te u hū ki he fonua lelei na, ‘a ia ‘oku foaki atu ‘e Sihova ko ho ‘Otua mo‘ao tofi‘a.#Nōm 20.12 22Ka ko au te u mate ‘i he fonua ni: tokua ‘e ‘ikai te u laka atu au ‘i Soatani na: ka ko kimoutolu te mou laka atu ‘o ma‘u ‘a e fonua lelei ko ena. 23Mou lamasi kimoutolu, na‘a ngalo ‘a e kovinānite ‘a Sihova ko homou ‘Otua, ‘a ia na‘a ne fai mo kimoutolu, ‘o mou ngaohi ma‘amoutolu ha tamapua, ko e fakatatau ‘o ha me‘a kuo tapui ‘e Sihova ko ho ‘Otua. 24He ko e ‘Eiki ko homou ‘Otua ko e afi faka‘auha: ko e ‘Otua fua‘a ia.#Hep 12.29
25Ka mou ka ma‘u fānau mo e makapuna, pea kuo mou fuoloa ‘i he fonua, pea kuo mou fakalielia‘i kimoutolu, mo mou ngaohi ha tamapua ko e fakatātā ‘o ha me‘a, pea mou fai kovi ‘i he ‘ao ‘o Sihova ko ho ‘Otua ke fakatupu ‘ene houhau: 26‘oku ou ui ki he langi mo māmani ke hopo he ‘aho ni mo kimoutolu, ‘o fakamo‘oni te mou mātu‘aki mole ke vave mei he funga fonua ‘oku mou a‘a ai ‘i Soatani ke ma‘u; ‘e ‘ikai fakalahi homou taimi ai, ka te mou mātu‘aki ‘auha. 27Pea ‘e fakamovetevete kimoutolu ‘e he ‘Eiki ki he ngaahi kakai, pea te mou iku ko e hiku‘i kakai ‘i he lotolotonga ‘o e ngaahi pule‘anga, ‘a ia ‘e fakateka kimoutolu ki ai ‘e Sihova.#Teu 28.36 28Pea te mou tauhi ai ha ngaahi ‘otua, ‘a ia ko e ngāue ‘a e nima ‘o e tangata, ko e ‘akau mo e maka, ‘a ia ‘oku ‘ikai mamata, pea ‘ikai fanongo, pea ‘ikai kai, pea ‘ikai nanamu. 29Ka ‘o kapau te mou kumi mei ai kia Sihova ko ho ‘Otua, te ke ‘ilo ia, ‘o kapau te ke ha‘ao ki ai ‘aki ho loto kotoa, pea ‘aki ho laumālie kotoa.#Sel 29.13 30Ka hoko ‘a e mamahi kiate koe, pea mo‘ua koe ‘e he ngaahi me‘a na, ‘e fakakuokuonganoa ange ha taimi te ke foki mei ai kia Sihova ko ho ‘Otua, ‘o fanongo ki hono le‘o: 31he ko e ‘Otua ‘alo‘ofa ‘a Sihova ko ho ‘Otua: ‘e ‘ikai te ne li‘aki koe, pea ‘e ‘ikai te ne faka‘auha koe, pea ‘e ‘ikai ngalo ‘iate ia ‘a e fuakava mo ho‘o ngaahi kui, ‘a ia na‘a ne fakapapau mo kinautolu.
32He ke ke fehu‘i mu‘a ki he ngaahi ‘uluaki taimi, ‘i he te‘eki ke ke ‘i ai, mei he ‘aho na‘e ngaohi ai ‘e he ‘Otua ‘a e tangata ‘i he funga ‘o māmani, pea fai mei he potu langi ‘e taha ‘o a‘u ki he potu langi ‘e taha, pe kuo ‘i ai ha me‘a hangē ko e me‘a lahi ni, pe kuo fanongo ki hano tatau? 33Kuo fanongo koā ‘e ha kakai ki he le‘o ‘o e ‘Otua ‘oku ne folofola mei he loto afi, ‘o hangē ko ho‘o fanongo, ‘o nau mo‘ui? 34Pe kuo ala‘aki ‘e he ‘Otua, ‘o ‘alu ‘o to‘o mo‘ona ha pule‘anga mei he lotolotonga ‘o ha pule‘anga, ‘aki ‘a e ngaahi ‘ahi‘ahi, mo e ngaahi faka‘ilonga, mo e ngaahi mana, mo e tau, mo e nima mālohi, mo e nima kuo hiki tā, mo e ngaahi me‘a fakailifia lahi, hangē ko e fu‘u me‘a na‘e fai ma‘amoutolu ‘e Sihova ko homau ‘Otua ‘i ‘Isipite, ‘o ke sio tonu ai? 35Ko koe na‘e fakahā ki ai, koe‘uhi ke ke ‘ilo ko Sihova ko ‘Elohimi ia; pea ‘oku ‘ikai ha taha mo ia.#Ma‘ake 12.32 36Na‘a ne tuku ke ke fanongo ki hono le‘o mei langi ke ne ako‘i koe; pea ‘i māmani na‘a ne tuku ke ke mamata ki hono fu‘u afi, pea na‘a ke fanongo ki he‘ene folofola mei he loto afi. 37Pea ko e me‘a ‘i he‘ene ‘ofa ki ho‘o ngaahi kui, ko ia na‘a ne fili ai honau hako kimui, ‘o ne fakahao mai koe mei ‘Isipite ‘aki hono fōtunga, pea ‘aki hono fu‘u ivi; 38ke kapusi mei ho ‘ao ha ngaahi kakai ‘oku lahi mo kaukaua ‘iate koe, ka ne fakahū mai koe, ‘o foaki atu kiate koe honau fonua mo‘o tofi‘a, ‘o hangē ko ia he ‘aho ni. 39Ko ia ke ke ‘ilo he ‘aho ni, ‘o ke ta‘ofi ‘aki ho loto ‘a e me‘a ni, Ko Sihova ko e ‘Otua ia ‘i hēvani ‘i ‘olunga mo māmani ‘i lalo ni: ‘oku ‘ikai mo ha taha. 40Pea te ke tauhi ‘a e ngaahi fekau mo tu‘utu‘uni ‘a‘ana, ‘a ia ‘oku ou kouna atu he ‘aho ni, koe‘uhi ke ke tu‘umālie, ‘a koe mo ho‘o fānau ‘amui, pea koe‘uhi ke lahi ho ngaahi ‘aho ‘i he funga kelekele ‘oku ‘atu ‘e Sihova ko ho ‘Otua ‘o lauikuonga.
Ko e ngaahi Kolo Hūfanga‘anga mei he Fakahahake ‘o e Vaitafe ko Soataní
41Na‘e toki vahe‘i ‘e Mōsese ha kolo ‘e tolu ‘i he kauvai ‘o Soatani ki he hopo‘anga la‘a;#Sios 20.8-9 42ke hola ki ai ‘a e fakapō kuo ne tāmate‘i ha taha ‘i he fāinoa, ka na‘e ‘ikai te ne fehi‘a ki ai mu‘a; koe‘uhi ka hola ‘e ia ki ha taha ‘o e ngaahi kolo ko ia, pea mo‘ui: 43‘a Pēseli ‘i he toafa, ‘i he Misoa, ma‘a ha‘a Lūpeni; pea mo Lemoti ‘i Kiliati ma‘a ha‘a Kata; pea mo Kōlani ‘i Pēsani ma‘a ha‘a Manase.
Ko e Talateu ki Hono Tuku Mai ‘o e Lao ‘a e ‘Otuá
44Pea ko eni ‘a e lao na‘e fokotu‘u ‘e Mōsese ‘i he ‘ao ‘o ha‘a ‘Isileli: 45ko e ngaahi fakamo‘oni eni, mo e ngaahi fekau, mo e ngaahi kupu‘i konisitūtone na‘e lea‘aki ‘e Mōsese ki ha‘a ‘Isileli ‘i he‘enau hū mai mei ‘Isipite, 46‘i he kauvai ko ē ‘o Soatani, ‘i he talalo ‘o e mo‘unga, ‘o hanga ki Pete-peoli, ‘i he fonua ‘o Sīhoni ko e Tu‘i ‘Āmoli, ‘a ia na‘e nofo ‘i Hesiponi, ‘a ia na‘e taa‘i ‘e Mōsese mo ha‘a ‘Isileli ‘i he‘enau hū mai mei ‘Isipite: 47pea nau puke hono fonua, mo e fonua ‘o ‘Oki ko e Tu‘i Pēsani: ko e ongo tu‘i ia ‘o e kau ‘Āmoli na‘e nofo ‘i he feitu‘u ‘o Soatani ki he hopo‘anga la‘a; 48mei ‘Aloeli, ‘a ia ‘oku ‘i he kau tele‘a ‘o ‘Alanoni, ‘o a‘u ki he mo‘unga ko Sioni#4.48 Sioni; ‘Oku pehē hono faka-Hepeluú, ka ‘oku pehē ‘i he hiki fuoloa ‘e taha: Silioni. (ko Heamoni ia), 49mo e ‘Alapā kotoa ki he hahake ‘o Soatani, ‘o a‘u ki he tahi ‘o e ‘Alapā, ko e talalo ‘o e ngaahi lauua ‘o Pīsika.
Currently Selected:
KO TEUTALŌNOME 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
